1 Gêdêŋ kiŋ Babilonŋa Belsasar nê gôliŋ ŋajala kêtu ŋamataŋa Daniel gêc mê to gêlic gêŋ ŋakatu gêdêŋ gêbêc. Go keto mê tau sa, taŋ gêc ŋabiŋ kêsêp papia amboac tonec 2 “Aê Daniel, galic ŋakatu gêdêŋ gêbêc. Ma galic undambê ŋamutêna aclê gêli gwêcsawa sa. 3 Ma bôcsêga kaiŋ aclê sêpi aŋga gwêc sêmêŋ. 4 Bôc kêtu ŋamataŋa gêjam lewe teŋ laŋô ma ŋamagê amboac momboaŋ. Aê kasala gamoa ma sêbuc ŋamagê sa ma sêôc bôc tau sa kêkô ŋaakaiŋ luagêcgeŋ amboac ŋamalac teŋ ma sêkêŋ ŋamalac nêŋ kauc gêdêŋ eŋ. 5 Go aê galic bôcsêga teŋ kêtu luagêcŋa gêjam bôc saleŋŋa ber laŋô ma kêkô gêôc lêma sageŋ. Eŋ keseŋeŋ ŋabi têlêac gêc awasuŋ ŋalêlôm ma sêsôm gêdêŋ eŋ gebe’ Ajôc, najau nêm deô.’ 6 Tonaŋ su, go galic bôcsêga taŋ kêtu têlêacŋa gêjam pusipbôm kapôêŋ (leopard) laŋô tomoc ŋamagê aclê kêkô dêmôêtêkwa ma môkêapac aclê. Ma sêkêŋ nom ŋagôliŋ gêdêŋ eŋ. 7 Tonaŋ su, go gaê mê e galic bôc teŋ kêtu aclêŋa. Bôc tau gêŋsêga kaiŋ teŋ ŋanô ma ŋajaŋa sec ma ŋaluluŋ ki kapôêŋ ma geŋ gêŋ ŋawaô to kêkaku gêŋ popoc ma kêlêsa ŋapopoc-popoc kêtiam ŋa akaiŋ. Bôc tau kêtôm bôc ŋamataŋa têlêac tônê atom gebe ŋajabo 10. 8 Aê kasala jabo tonaŋ gamoa e jabo sauŋ teŋ kêpi ŋasawa kêtiam ma gêbuc jabo laŋgwa têlêac toŋawakacgeŋ sa ma galic gebe jabo tonaŋ ŋamataanô amboac ŋamalacnêŋ ma ŋaawasuŋ teŋ gêc, taŋ kêsôm biŋ ketoc tau saŋa naŋ.

9 “Aê kasala gamoa ma galic gebe sêkêŋ lêpôŋ kiŋŋa ŋagêdô kêkô ma ŋac, taŋ gêmoa teŋgeŋ naŋ, jagêŋgôŋ teŋ ŋaô. Nê ŋakwê sêpôma amboac tao kwalam ma môkêlauŋ kêtôm domba ŋaôlilu sêp samuc amboac gwêc ôpic. Nê lêpôŋ kêkô jawaô ŋalêlôm ma lêpôŋ ŋaakaiŋ amboac ja ŋawaô. 10 Ja ŋawaô amboac bu gêc ŋasamac kêsêwa kêsa aŋga tônê. Ma lau tausen to tausen sêjam sakiŋ eŋ. Lau tentausen dim tentausen sêkô eŋ laŋônêm. Mêtôcwaga sêŋgôŋ sebe sêmêtôc biŋ, tec sêkac buku sa.

11 “Aê galic ma gaŋô biŋ ketoc tau saŋa samob, taŋ kêsa jabo tonaŋ awasuŋ. Ma gêdêŋ tonaŋ sêjac bôc kêtu aclêŋa êndu ma sêbaliŋ ŋanô tau kêpi jawaô e geŋ su. 12 Ma sêkac nom ŋagôliŋ su aŋga bôc ŋagêdô nêŋ, mago sêjac têku nêŋ têm sêmoa mateŋ jaliŋa ŋasawa teŋ gêwiŋ. 13 Aê gaêc mê gêdêŋ gêbêc ma galic ŋakatu teŋ amboac ŋamalac latu gêmêŋ gêmoa tao undambêŋa ŋalêlôm jakêtu gasuc ŋac, taŋ gêmoa teŋgeŋ naŋ, ma sêwê eŋ gêdêŋ eŋ sêja. 14 Ma sêkêŋ ŋaclai to wae ma gamêŋ gôliŋŋa gêdêŋ eŋ gêwiŋ. Ma tenteŋlatui to lau tomôkê-tomôkê ma lau aweŋ teŋ-aweŋ teŋ samob sêjam sakiŋ gêdêŋ eŋ. Ênê ŋaclai oc ênêc teŋgeŋ. Ênê gamêŋ gôliŋŋa ênac pep atom.

15 “Ma aê Daniel, ŋoc katuc kelendec ŋanô ma gêŋ ŋakatu, taŋ galic gêc ŋoc kauclêlôm naŋ, kêtakê aê êndu-êndu. 16 Aê katu gasuc lau, taŋ sêkô tonaŋ naŋ, nêŋ teŋ ma kateŋ eŋ gebe êwa gêŋ tonaŋ ŋam sa acgom. Tec eŋ gêwa ŋam sa gêdêŋ aê ma kêsôm gebe 17 ‘Bôcsêga aclê tonaŋ têtôm kiŋ aclê, taŋ oc sêsa aŋga nom. 18 Mago Ŋac Lôlôcŋa nê lau dabuŋ oc sêwê kaiŋ gamêŋ to sênam gôliŋ gamêŋ tau totêm-totêm endeŋ tôŋgeŋ.’

19 “Go kateŋ eŋ gebe êwa bôc kêtu aclêŋa, taŋ kêtôm bôc têlêac ŋagêdô tonaŋ atom naŋ, ŋam sa êndêŋ aê. Bôc tonaŋ gêŋsêga kaiŋ teŋ ŋanô, nê luluŋ ki to kêku ki kopa. Eŋ kêlêsa to kêdaŋgôŋ gêŋ ŋawaô ma kêka ŋagêdô popoc. 20 Ma aê kateŋ eŋ gebe êwa jabo lemelu, taŋ kêkô môkêapac ŋaô naŋ, ma ŋajabo teŋ, taŋ kêsa ma geseŋ jabo laŋgwa têlêac su naŋ, ma tomataanô to awasuŋ kêsôm biŋ ketoc tau saŋa sec ma kêtu kapôêŋ kêlêlêc ŋagêdô su naŋ, sa êwiŋ.

21 “Aê kasala gamoa ma galic jabo tau gêjac siŋ gêdêŋ Anôtônê lau dabuŋ e kêku êsêac tulu, 22 go ŋac, taŋ gêmoa teŋgeŋ naŋ, mêŋgêô lasê ma kêmêtôc biŋ ma kêkêŋ ŋaclai gêdêŋ Ŋac Lôlôcŋa nê lau dabuŋ ma gêdêŋ noc tonaŋ lau dabuŋ sêwê kaiŋ gamêŋ kiŋŋa.

23 “Ŋac taŋ kateŋ naŋ, kêsôm amboac tonec gebe ‘Bôc kêtu aclêŋa ŋam gebe gamêŋ kiŋŋa êtu aclêŋa oc mêŋêsa. Ma gamêŋ tonaŋ kaiŋ teŋ, oc êtôm gamêŋ ŋagêdô atom. Gamêŋ tau oc êndaŋgôŋ nom ŋagamêŋ samob su ma êka tôŋ êsêp nom to êlêsa popoc. 24 Ma jabo lemelu ŋam amboac tonec gebe Kiŋ lemelu oc sêsa aŋga gamêŋ tonaŋ ma teŋ oc êsa êtiam êndaŋguc êsêac. Eŋ oc êtôm êsêacnêŋ ŋagêdô atom ma oc êkôniŋ kiŋ têlêac tôŋ. 25 Eŋ oc êsôm biŋ alôb-alôb êpi Ŋac Lôlôcŋa tau ma êlênsu Ŋac Lôlôcŋa nê lau dabuŋ. Eŋ oc ênsaê gebe ênam mêtê to om ŋagôliŋ samob ôkwi. Ma lau dabuŋ oc sêsêp eŋ lêma êtôm ŋasawa samuc tageŋ ma ŋasawa samuc têlêac ma ŋasêku teŋ êwiŋ. 26 Mago mêtôcwaga oc sêkôc nêŋ kôm sa ma oc sêjaŋgo kiŋ tonaŋ nê ŋaclai su ma senseŋ eŋ su ênaŋa samucgeŋ. 27 Ma mêtôcwaga sêkêŋ ênê gamêŋ to gôliŋ ma gamêŋ samob, taŋ gêc umboŋ ŋalabu naŋ, êndêŋ Ŋac Lôlôcŋa nê lau dabuŋ. Êsêacnêŋ gamêŋ oc ênêc endeŋ tôŋgeŋ ma gamêŋ samob oc sênam sakiŋ ma taŋeŋ wamu êndêŋ êsêac.’

28 “Biŋ tau tonaŋgeŋ. Ma aê Daniel, katakê ŋanô e laŋôcanô kêtu sêp, ma gajam biŋ tau tôŋ gêc ŋoc kauclêlômgeŋ.”

<- DANIEL 6DANIEL 8 ->