Gêdêŋ ŋasawa tonaŋ lau Israel dêdi sêja gebe sênac siŋ êndêŋ lau Pilisti. Êsêac sê nêŋ becobo sêŋgôŋ Ebeneser, ma lau Pilisti sê nêŋ becobo sêŋgôŋ malac Apek ŋagala. 2 Go lau Pilisti têdênaŋ tau su ma sebo sêsa gêdêŋ lau Israel. Siŋ kapôêŋ kêsa e lau Pilisti sêku lau Israel tulu ma sêjac lau amboac 4,000 êndu sêc siŋ ŋamala.

3 Ma gêdêŋ taŋ lau Israel nêŋ siŋwaga sêmu sêmêŋ maleŋ su naŋ, Israel nêŋ laumata sêsôm gebe “Kêtu asageŋŋa Apômtau kêkêŋ lau Pilisti sêku aêac tulu gêdêŋ ocsalô tonec. Ajôc, takôc Apômtaunê poac ŋakatapa aŋga Silo êmêŋ gebe mêŋêmoa aêac ŋaluŋ ma ênam aêac kêsi aŋga nêŋ ŋacjo lemeŋ.” 4 Amboac tonaŋ sêsakiŋ lau sêja Silo ma sêkôc Apômtau, lau siŋ undambêŋa nêŋ ŋatau, taŋ gêŋgôŋ kerubim ŋaô naŋ, nê poac ŋakatapa sêmêŋ. Ma Eli latuagêc Hopni agêc Pinehas sêwiŋ poac ŋakatapa.

5 Gêdêŋ taŋ poac ŋakatapa jagêô lasê lau Israel nêŋ malac becoboŋa naŋ, lau Israel samob sêjam lasê to ŋaclaigeŋ e nom kêwiwic. 6 Lau Pilisti sêŋô ŋaôndu tonaŋ ma têtu kênac tauŋ gebe “Sêjam lasê toŋaclaigeŋ aŋga Ebolainêŋ gamêŋ tonaŋ ŋam amboac ondoc.” Sêŋô gebe Apômtaunê poac ŋakatapa mêŋgêô lasê 7 tec têtêc tauŋ ŋanô gebe êsêac sêsôm gebe “Anôtô mêŋgêô lasê êsêacnêŋ malac. Ojae aêacmêŋ. Gêŋ amboac tonaŋ talic teŋ su gêmuŋ atomanô. 8 Ojae aêacmêŋ. Asa ênam aêac kêsi aŋga Anôtô ŋaclai tonaŋ lêma. Anôtô tonaŋ kêku lau Aiguptu tulu ŋa gêŋwapac tokaiŋ-tokaiŋ aŋga gamêŋ sawa. 9 O Pilisti, ajôc, apuc taôm tôŋ. Anac siŋ amboac ŋacgeŋ. Embe masi, go atu lau Ebolai nêŋ gêŋôma, êtôm êsêac têtu amacnêm gêŋôma. Akô amboac ŋac ma anac siŋ.”

10 Amboac tonaŋ lau Pilisti sêjac siŋ ma sêku lau Israel tulu e sêc siŋ su sêlêti sêja nêŋ andu gêdêŋ-gêdêŋgeŋ. Siŋ tau kapôêŋ ma lau Israel nêŋ siŋwaga 30,000 sêjaŋa bêc tageŋ. 11 Ma sêjaŋgo Apômtaunê poac ŋakatapa su ma sêjac Eli latuagêc Hopni agêc Pinehas êndu.

12 Ŋac Benjaminŋa teŋ kêsu aŋga siŋ ŋamala ma kêlêti e mêŋgêô lasê malac Silo gêdêŋ oc tageŋ tonaŋ. Nê ŋakwê gêŋgic ma nom gê eŋ môkêapac. 13 Gêdêŋ taŋ ŋac tau gêô lasê naŋ, Eli gêŋgôŋ nê lêpôŋ, mataanô gêdêŋ intêna gêsuŋgeŋ gebe nê ŋalêlôm ŋatutuc kêtu Apômtaunê poac ŋakatapaŋa. Gêdêŋ taŋ ŋac tau kêsa malac ma gêjac miŋ biŋ naŋ, lau malacŋa samob têtaŋ lasê. 14 Eli gêŋô taŋiboa ma gêjam kênac gebe “Gamêŋ ŋadiŋdiŋ tonaŋ ŋam amboac ondoc.” Go ŋac tau kêlêti gêdêŋ Eli ma kêsôm biŋ tau lasê gêdêŋ eŋ. 15 Elinê jala kêtu 98 ma mataanô kêtu waô e gêlic gamêŋ atom. 16 Go ŋac tau kêsôm gêdêŋ Eli gebe “Aê ŋac, taŋ gamêŋ aŋga siŋ ŋamala. Aê gaêc siŋ gêdêŋ ocsalô tonec.” Ma Eli kêtu kênac gebe “Latucenec, biŋ amboac ondoc.” 17 Ŋac jaeŋŋa gêjô eŋ awa gebe “Lau Israel sêc lau Pilisti ma siŋ geseŋ lau taêsam su. Aôm latômagêc Hopni agêc Pinehas sêmac êndu ma sêjaŋgo Apômtaunê poac ŋakatapa su amboac tonaŋgeŋ.” 18 Gêdêŋ taŋ eŋ kêsam Apômtaunê poac ŋakatapa naŋ, Eli gêu tau kêsô gedecgeŋ aŋga lêpôŋ, taŋ kêkô kêsi malac ŋasacgêdô naŋ, ŋamuŋa e kêpôŋ gêsu tulu ma gêmac êndu, gebe eŋ kêtu ŋamalacanô ma ŋawapac kêsa. Eŋ gajam gôliŋ Israel jala 40.

19 Eli lawao, Pinehasnê awê, taê e kêdabiŋ gebe akôc ŋapalê. Eŋ gêŋô ŋawae gebe sêjaŋgo Apômtaunê poac ŋakataŋa su to lawa agêc nê akweŋ sêmac êndu naŋ, ma eŋ gewec gebe ŋapalê kêtuŋ eŋ e kêkôc ŋapalê su. 20 Gêc e kêdabiŋ gebe êmac êndu ma lauo, taŋ sêjam jaom eŋ naŋ, sêsôm gebe “Ôtêc taôm atom. Aôm kôkôc ŋapalê ŋac teŋ.” Mago eŋ gêjô biŋ atom ma kêkêŋ taŋa biŋ, taŋ êsêac sêsôm naŋ atom. 21 Eŋ gê ŋapalênê ŋaê gebe Ikabod, ŋam gebe” Ŋawasi kêkac tau su aŋga lau Israelnêŋ”, gebe sêjaŋgo Anôtônê poac ŋakatapa ma kêtu lawa to nê akweŋŋa. 22 Ma eŋ kêsôm gebe “Ŋawasi kêkac tau su aŋga Israelnêŋ gebe sêjaŋgo Anôtônê poac ŋakatapa su.”

<- SAMUELNÊ 1 3SAMUELNÊ 1 5 ->