1 Kilisi gêôc ŋandaŋ kêpi tau ôli. Amboac tonaŋ amansaŋ taôm e nêm ŋalêlôm êtôm ênê acgom, gebe ŋac, taŋ gêôc ŋandaŋ kêpi tau ôli naŋ, sec kêlêwaŋ eŋ. 2 Tec ŋamalacnêŋ têntac ŋakalac ênam gôliŋ amac êndêŋ têm amoa nomŋa êtiam atom, Anôtônê biŋgeŋ ênam gôliŋ amac. 3 Gêdêŋ têm, taŋ gêjaŋa su naŋ, amac agôm lau samuc nêŋ biŋ kêtu tôŋ, tec kêtômgac. Amac asa nêm lêŋ mockaiŋo to mockaiŋŋa ma amoa totêmtac ŋakalac. Gêŋ kêjaŋiŋ amac ma aeŋ lasam to anôm anaboa aŋgôŋ awiŋ taôm to ajam sakiŋ gêdêŋ gwam aseŋ Anôtônê biŋsu su. 4 Ma galoc asêlêŋ awiŋ lau samuc ma asa nêŋ lêŋ wauc-waucgeŋŋa kêtiam atom, tec sêlic sec ma sêsôm biŋ alôb-alôb kêpi amac. 5 Mago êsêac oc sêwa nêŋ biŋ sa êndêŋ ŋac, taŋ kêmasaŋ tau su gebe êmêtôc mateŋ jali to ŋacmatê nêŋ biŋ naŋ. 6 Kêtu biŋ amboac tonaŋŋa eŋ kêsôm ŋawae ŋajam lasê gêdêŋ ŋacmatê gebe êsêac têtap mêtôc sa kêtôm ŋamalac têtap sa, mago ŋalau sêmoa mateŋ jali kêtôm Anôtô gêmoa mata jali.

7 Gêŋ samob ŋatêku êsuŋa ŋanoc kêdabiŋgac. Amboac tonaŋ taêm ênam taôm ma ateŋ nêm mec totekwem sakigeŋ. 8 Tonec tec tasôm êtu ŋamata gebe akêŋ têmtac gêwiŋ elom tau ŋanôgeŋ gebe têntac gêwiŋ êŋgênduc sec samob auc. 9 Aŋgôm ja lau atu môsi atom. 10 Anam sakiŋ taôm êndêŋ-êndêŋgeŋ êtôm moasiŋ, taŋ akôc naŋ, ma atu Anôtônê moasiŋ tokaiŋ-tokaiŋ ŋagejobwaga ŋajam. 11 Ŋac teŋ embe ênam mêtê, naŋ êsôm êtôm Anôtônê biŋgeŋ. Teŋ embe ênam sakiŋ, naŋ ênam êtôm ŋaclai, taŋ Anôtô kêkêŋ gêdêŋ eŋ naŋ. Aŋgôm gêŋ samob tonaŋ gebe Anôtônê ŋawasi êsa êtu Jesu Kilisiŋa. Ŋawasi to ŋajaŋa êndêŋ eŋ teŋgeŋ ma teŋgeŋ. Biŋŋanô.

12 O lauace, alic ŋandaŋ, taŋ kêlêtôm amac gêmoa naŋ, amboac gêŋ kaiŋ teŋ, taŋ kêtap amac sa naŋ atom. 13 Têmtac ŋajam êsa gebe awê kaiŋ Kilisinê ŋandaŋ awiŋ. Ma êndêŋ noc eŋ eoc nê ŋawasi lasêŋa naŋ, amac oc atu samuc totêmtac ŋajamgeŋ. 14 Embe sêmbu amac êtu Kilisinê ŋaêŋa, oc aoc êôc amac, gebe Anôtônê Ŋalau ŋawasi wacêpi amac. 15 Amacnêm teŋ êôc ŋandaŋ amboac ŋac, taŋ gêjac ŋamalac êndu me gêjam geŋgeŋ gêŋ me gêgôm sec me kêgabec launêŋ kôm paliŋ-paliŋgeŋ naŋ atom. 16 Mago amac embe aôc ŋandaŋ atôm Kilisinê lau, naŋ majem atom. Alambiŋ Anôtô gebe kêkêŋ amac awê kaiŋ ŋaê tonaŋ.

17 Noc kêdabiŋ gebe Anôtô êmêtôc biŋ ênac m aŋga eŋ tau nê gôlôac. Embe êŋgôm êndêŋ aêac amboac tonaŋ, ma êsêac, taŋ taŋeŋpêc gêdêŋ Anôtônê ŋawae ŋajam naŋ, oc êŋgôm êsêac amboac ondocgeŋ.