JOAŊNÊ papia ŋamataŋa
“Joaŋnê papia ŋamataŋa” nec ŋac tau keto kêtu ŋam kapôêŋ luagêcŋa. Teŋ gebe êkêli lau-sêsamwaga gebe sêmbiŋ tauŋ tôŋ tamiŋ Anôtô agêc Latu Jesu Kilisi, go teŋ gebe ênam la êsêac gebe sejop tauŋ êndêŋ mêtê-geowaga. Embe têndaŋguc êsêacnêŋ mêtê geo, oc êkac êsêac su aŋga Anôtô agêc Kilisi nêŋ. Mêtê keso ŋam kêsêp lau, taŋ seboc tamoa nom nec sec, tec têdôŋ gebe Anôtônê Latu Jesu mêŋkêtu ŋamalac ŋanô atom. Kedôŋwaga dansaŋ tonaŋ sêsôm gebe ŋamalac sêmoa nom nec, kêtu sec ŋamanô tau. Takôniŋ nêŋ dabe tamoa mateŋ jaliŋa tôŋ acgom, go amboac tajam tauŋ kêsigac. Go lau tonaŋ têdôŋ biŋ keso amboac tec gêwiŋ seboc Anôtô ênam lau kêsiŋa gêjac lêŋ mansaŋ to têntac êwiŋ tauŋŋa ŋawae atom.
Joaŋ tec geseŋ biŋ keso tonaŋ ŋai ma gêwa Jesu kêtu ŋamalac ŋanô ŋabiŋ sa gêc awêgeŋ, go kêwaka biŋ tonec sa gêc awê gêwiŋ gebe lau samob, taŋ sêkêŋ gêwiŋ Jesu to têntac gêwiŋ Anôtô naŋ, têntac êwiŋ elom tau amboac tonaŋgeŋ.
Ŋadênaŋ
1. Joaŋ gêjac m papia tau 1:1-4
2. Ŋawê to ŋakesec 1:5–2:29
3. Anôtônê ŋapalê to Sadaŋne ŋapalê 3:1-24
4. Biŋŋanô to biŋdansaŋ 4:1-6
5. Têntac êwiŋ lauŋa gêjac samob ŋawae 4:7-21
6. Takêŋ gêwiŋ ŋanô kêku gêŋ nomŋa samob tulu 5:1-21

Biŋ taŋ kêtu daŋgôŋ matêŋ jali ŋaŋamôkê

1 Aêac ato gêdêŋ amac kêpi biŋ, taŋ kêtu daŋgôŋ mateŋ jali ŋaŋamôkê naŋ. Biŋ tau tonaŋ gêmoa gêdêŋ Anôtô kêkêŋ undambê to nom atomgeŋ. Aêac aŋô biŋ tau to alic ŋa mateŋanô. Aêac asala to ma lemeŋ amoasac biŋ tau. 2 Mateŋ jali ŋaŋamôkê geoc tau lasê, tec aêac alic to awa sa ma asôm lasê gêdêŋ amac. Mateŋ jali ŋaŋamôkê teŋgeŋŋa tau gêmoa gêwiŋ Tama ma geoc tau lasê gêdêŋ aêac. 3 Biŋ taŋ alic to aŋô naŋ, aêac asôm lasê gêdêŋ amac amboac tonaŋgeŋ, gebe êmbiŋ aêac tôŋ tapi tageŋ dawiŋ Tameŋi agêc Latu Jesu Kilisi. 4 Aêac ato biŋ tonaŋ gebe têntac ŋajam ênac dabiŋ tau.

Anôtô eŋ ŋawê

5 Ŋawae taŋ aêac aŋô aŋga ênê ma asôm lasê gêdêŋ amac naŋ, biŋ tau tonec gebe Anôtô eŋ ŋawê, ma ŋakesec teŋ gêc eŋŋa atomanô. 6 Aêac embe tasôm gebe aêac to eŋ dabiŋ tauŋ tôŋ tapi tageŋ, mago embe tasa lêŋ ŋakesecŋa, oc tansau biŋdansaŋ ma daŋgôm biŋŋanô tau ŋanô êsa atom. 7 Aêac embe tasa lêŋ ŋawêŋa amboac eŋ tau gêmoa ŋawê ŋalêlôm, go aêac tauŋ dambiŋ tauŋ tôŋ ma Anôtônê Latu Jesu nê dec êkwasiŋ aêacnêŋ sec samob su tatu selec. 8 Aêac embe tasôm gebe nêŋ sec masi, oc tansau tauŋ ma biŋŋanô ênêc aêacnêŋ ŋalêlôm atom. 9 Ma embe daoc nêŋ sec lasê, oc ŋac ŋaŋêŋ to gêdêŋ tau êsuc aêacnêŋ sec ôkwi ma êkwasiŋ aêacnêŋ biŋ geo samob su tatu selec. 10 Aêac embe tasôm gebe dagôm sec atom, oc takêŋ Anôtô êtu dansaŋtêna, ma ênê biŋ ênêc aêacnêŋ ŋalêlôm atom.

JOAŊ 1 2 ->