SAN LUCAS 3

Yet yalnicꞌo naj Juan anican̈ haꞌ iswiꞌ anma Istzotiꞌ Comam Dios

(Mt 3:1-12; Mr 1:1-8; Jn 1:19-28)

1 Ayxaco yin̈ isholan̈eb habil yoc naj Tiberio yahawilo Roma, walpaxo naj Poncio Pilato, haꞌ naj ayco gobernadoral yin̈ txꞌotxꞌ Judea, haxapaxo xin naj Herodes ayco gobernadoral yin̈ txꞌotxꞌ Galilea. Haxa yuẍta naj chiyij Felipe, haꞌ naj ayco gobernadoral yin̈ huneꞌxa txꞌotxꞌ chiyij Iturea yeb txꞌotxꞌ Traconite. Haxa naj Lisanias, ayco naj gobernadoral yin̈ txꞌotxꞌ Abilinia. 2 Wal naj Anás yeb naj Caifás, haꞌ ebnaj ayco yahawilo yin̈ sacerdote Israel. Hayet huneꞌ tiempohal tuꞌ xin, naj Juan iscꞌahol icham Zacarías, ay naj bey huneꞌ txꞌotxꞌ desierto. Haꞌ tuꞌ xin tzotel Comam Dios tet naj. 3 Yu tzet yal Comam Dios tet naj, yuxin to naj bey sunilej txꞌotxꞌ ayco istila haꞌ niman Jordán. Yalni naj tet anma tato caw yilal isbejnicano sunil ismachiswalilal, cat yahcano haꞌ iswiꞌ; hac tuꞌ xin chu yakꞌnicano nimancꞌulal Comam Dios yin̈ ismul anma tuꞌ. 4 Hac tiꞌ yu yijnicano isba tzet tzꞌibn̈ebil yu naj Isaías, ischejab Comam Dios yet payat, bay chala:

Ay huneꞌ naj chiawi yin̈ caw ip bey huneꞌ txꞌotxꞌ desierto, chihalni hacaꞌ tiꞌ: “Watxꞌeweco heyanma, yuto chihul Comam Dios Jahawil. Hacaꞌ chu istoholban̈elax hunu beh yet chihul huno naj yahaw, hac tuꞌ cheyute heyanma.

5 Hacaꞌ isnohtzelax nimeta hocan, hacaꞌ iskꞌajlaxayo nimeta witz yun̈e yacꞌalbiloj, yeb xin iswon̈quiẍtajil. Hacaꞌ istoholban̈elaxico huntekꞌan beh cótxquiltan̈e yeqꞌui, hacaꞌ chu yacꞌaln̈elax huntekꞌan beh hopquiẍtan̈e,

6 hac tuꞌ cheyute heyanma haxinwal chiillax yu sunil anma ta ay huneꞌ Hecolomal chejbilti yu Comam Dios,” ẍi naj, ẍiayoj.

7 Caw niman anma apni iscꞌatan̈ naj Juan tuꞌ yu yah haꞌ iswiꞌ, yalni naj tet anma:

—Walex hex tiꞌ, caw hacaꞌtan̈e heyicꞌal heba yeb noꞌ laba. ¿Mac chihalni teyet ta yu chꞌah haꞌ hewiꞌ chexcolcha yalan̈ huneꞌ niman isyaꞌtajil chihul teyiban̈ yu ishowal Comam Dios? 8 Wal xin bejwecano istxꞌojal, yeb xin caw yilal cꞌul cheyute heba, hac tuꞌ chu heyeniloj ta xahelcha henabal. Tajca chetxum hacaꞌ tiꞌ: “Yin̈ icham Abraham titnajon̈, yuxin xacon̈colchahan̈ yalan̈ isyaꞌtajil chati Comam Dios,” tajca quexchi. Wal xin chisje iswatxꞌenico Comam huntekꞌan chꞌen chꞌen tiꞌ anmahil, cat xin yoc yuninalo icham Abraham heseleloj, ẍi naj Juan tuꞌ. 9 Yalnipaxo naj Juan:

—Haꞌ huneꞌ niman isyaꞌtajil lan̈an yul teyiban̈, lahan hacaꞌ huno te teꞌ ayxaco chꞌen eche yich xeꞌ yu iskꞌajlaxayoj. Yuto sunil te teꞌ mach cꞌulu sat chiyakꞌa, chitzocꞌlaxcan̈ teꞌ, cat yocto teꞌ yul kꞌaꞌ, ẍi naj Juan tet anma tuꞌ.

10 Istakꞌwi anma:

—¿Tzet wal juten cobahan̈, chal tuꞌ? ẍi anma tet naj Juan.

11 Yalni naj xin:

—Ta ayex ay cabebo hecamiẍ, akꞌwe hunu tet hunu mac machi yet, yebpaxo xin hacaꞌ hex ay tzet chelo, akꞌwe nichꞌano tet mac machi yet, ẍi naj tet anma.

12 Aypaxo xin haywan̈ ebnaj ikꞌomilo tohlabal chꞌen chito bey Roma, apni ebnaj iscꞌatan̈ naj Juan tuꞌ yu yah haꞌ iswiꞌ. Yoc ebnaj iskꞌambeno hacaꞌ tiꞌ:

—Mam cuywawom, ¿tzet wal juten cobahan̈ yun̈e cowatxꞌicojan̈ yul sat Comam Dios? ẍi ebnaj.

13 Istakꞌwi naj Juan tuꞌ:

—Hayet chexecꞌ heyikꞌalo chꞌen tohlabal yin̈ anma, hacaꞌticꞌa yalni ley, hac tuꞌ cheyiloj, ẍi naj Juan tet ebnaj.

14 Yapnipaxo huntekꞌan ebnaj soldado iskꞌamben ebnaj:

—Haxapaxo han̈on̈tiꞌan̈, ¿tzet wal juten cobahan̈? ẍi ebnaj. Istakꞌwi naj Juan tuꞌ xin:

—Mach chebalcan̈ tzotiꞌ yiban̈ anma, mach cheyelkꞌalo tzettaj ay yul iskꞌab anma. Tzalahojab hecꞌul yin̈ hetohol chꞌakꞌlaxi, ẍi naj Juan tuꞌ.

15 Haꞌ anma apni abeno tuꞌ xin, ichico isnanonico iscꞌul yin̈ naj Juan cꞌuxan ta haꞌ naj chiyij Cristo echmabil yu ebnaj. 16 Yalni naj tet sunil anma:

—Wal intiꞌan, yin̈ caw yeli cachann̈e chiwacan̈an haꞌ hewiꞌ, yajaꞌ wintajan chihul huneꞌ naj chiyacan̈ naj haꞌ hewiꞌ yaj yu iskꞌakꞌal yip Comam Espíritu Santo. Caw xin ecꞌbalcano yip naj insatajan, yuxin caw mach chu wocan inpuhnolojan istxꞌan̈al isxan̈ab naj chiwabehan, ẍi naj Juan. 17 Yalnipaxo naj:

—Naj chihul tuꞌ, lahan naj hacaꞌ huno naj chixunilo iskꞌal ixim trigo, nan chakꞌcano naj yoj ixim, haxa ixim sat xin chiscꞌubato naj ixim yul iscꞌun̈a. Haxa ixim yoj trigo tuꞌ xin, chiskꞌojto naj ixim xol kꞌa kꞌaꞌ mach istan̈bal, ẍi naj tet sunil anma tuꞌ.

18 Caw txꞌiꞌal cuybanil yakꞌcano naj Juan tet anma, hac tuꞌ yu yalnicꞌo naj Tzotiꞌ cꞌul yet colbanile. 19 Caw cachwa naj Juan yin̈ naj Herodes, ayco gobernadoral bey tuꞌ yuto yikꞌcan̈ naj ix Herodías, yixal yuẍtaj, haꞌ ton naj Felipe, yebpaxo xin yu sunil istxꞌojal iswatxꞌe naj. 20 Yajaꞌ maẍn̈etaj huntekꞌan istxꞌojal iswatxꞌe naj Herodes tiꞌ, to yapaxicto naj naj Juan yul preso.

Yet yah haꞌ iswiꞌ Comam Jesús

(Mt 3:13-17; Mr 1:9-11)

21 Hayet maẍto chꞌocto naj Juan yul preso, yet yah haꞌ iswiꞌ anma yu naj ahpaxo haꞌ iswiꞌ Comam Jesús yu naj. Hayet lan̈an istxahli Comam tuꞌ, ishajni isba satcan̈, 22 yayilo Comam Espíritu Santo yiban̈ Comam hacaꞌ hunu noꞌ palamuch. Lan̈antoticꞌa xin yabelax huneꞌ yul nukꞌe satcan̈, yalni hacaꞌ tiꞌ:

—Hach tiꞌ hach Incꞌaholan, caw xahan ayach wuhan. Caw chintzalahan tawin̈, ẍiaytij.

Isbi ebnaj yichmam Comam Jesucristo

(Mt 1:1-17)

23 Lahon̈ebxa iscawinah habil Comam Jesús yet yichico ismunla yin̈ Istzotiꞌ Comam Dios. Iscꞌahol naj José ye Comam chute yalni anma. Hac tiꞌ caw ye istxolal yichmam Comam hacaꞌ tiꞌ: naj José, naj Elí, 24 naj Matat, naj Leví, naj Melqui, naj Jana, naj José, 25 naj Matatías, naj Amós, naj Nahum, naj Esli, naj Nagai, 26 naj Maat, naj Matatías, naj Semei, naj José, naj Judá, 27 naj Joana, naj Resa, naj Zorobabel, naj Salatiel, naj Neri, 28 naj Melqui, naj Adí, naj Cosam, naj Elmodam, naj Er, 29 naj Josué, naj Eliezer, naj Jorim, naj Matat, 30 naj Leví, naj Simeón, naj Judá, naj José, naj Jonán, naj Eliaquim, 31 naj Melea, naj Mainán, naj Matata, naj Natán, 32 naj David, naj Isaí, naj Obed, naj Booz, naj Salomón, naj Naasón, 33 naj Aminadab, naj Admin, naj Aram, naj Esrom, naj Fares, naj Judá, 34 naj Jacob, naj Isaac, icham Abraham, naj Taré, naj Nacor, 35 naj Serug, naj Ragau, naj Peleg, naj Heber, naj Sala, 36 naj Cainán, naj Arfaxad, naj Sem, naj Noé, naj Lamec, 37 naj Matusalén, naj Enoc, naj Jared, naj Mahalaleel, naj Cainán, 38 naj Enós, naj Set, naj Adán. Haꞌ naj Adán tuꞌ xin, Comam Dios watxꞌen̈e naj.

<- SAN LUCAS 2 SAN LUCAS 4 ->