SAN LUCAS 22

Issay ebnaj yahawil yin̈ lahtiꞌ yin̈ tzet chu yakꞌlax camo Comam Jesús

(Mt 26:1-5, 14-16; Mr 14:1-2, 10-11; Jn 11:45-53)

1 Yet lan̈anxa yayilo kꞌin̈ Pascua, yet chiwahlax ixim pan machi yan̈al chialaxicoj. 2 Yoc ebnaj yahawil sacerdote yeb ebnaj chicuyni anma yin̈ isley naj Moisés issayaꞌ yin̈ tzet chu ispotxꞌni ebnaj Comam Jesús; yaj yin̈ ewantajil, yuto chixiw ebnaj tet anma.

3 Yayto naj matzwalil yul yanma naj Judas, chihallaxpaxo Iscariote, naj ayco istzꞌajo ebnaj cablahon̈wan̈ iscuywom Comam. 4 Yuxin, to naj iscꞌatan̈ ebnaj yahawil yin̈ ebnaj sacerdote yeb iscꞌatan̈ ebnaj chitan̈en yatut Comam Dios, yu istzotel yin̈ tzet chu yanico naj Comam yul iskꞌab ebnaj.

5 Caw tzalacan̈ ebnaj yaben huneꞌ tuꞌ, yuxinto yalte ebnaj melyu tet naj Judas. 6 Hac tuꞌ xin yu iswatxꞌencanayo ebnaj istzotiꞌ; yuxinto oc naj Judas issayaꞌ tzet chu yanico naj Comam yul iskꞌab ebnaj yin̈ ewantajil.

Watxꞌelax tzet chilolax yin̈ kꞌin̈ Pascua

(Mt 26:17-25; Mr 14:12-21; Jn 13:21-30)

7 Hayet yayilo istzꞌayical bay chiwahlax ixim pan machi yan̈al chialaxicoj, yeb yet chipotxꞌlax noꞌ meꞌ xahanbalil yin̈ kꞌin̈ Pascua, 8 yalni Comam Jesús tet naj Pedro yeb naj Juan:

—Asiwe hewatxꞌeꞌ tzet chicolo yin̈ kꞌin̈ Pascua tiꞌ, ẍi Comam.

9 Iskꞌamben ebnaj tet Comam:

—¿Baytuꞌwal chawoche chon̈tohan̈ cowatxꞌeꞌan̈ hawalni? ẍi ebnaj.

10 Yalni Comam tet ebnaj xin:

—Hayet chexapno bey yul con̈ob tuꞌ, cheyilaꞌ huneꞌ naj ikꞌbil huneꞌ tzꞌajab haꞌ yu. Chexocowe tzujno yinta naj masanto yul n̈a bay chiocto naj, 11 cat heyalno tet naj yahaw n̈a tuꞌ: “Haꞌ yaꞌ cuywawom macon̈chejnitijan̈, ẍi yaꞌ hacaꞌ tiꞌ: ‘¿Baytuꞌwal ay huneꞌ cuarto bay chinwaꞌojan yin̈ kꞌin̈ Pascua yeb ebnaj incuywoman?’ ” ẍi yaꞌ, quexchi. 12 Haꞌ naj chiyeno huneꞌ niman cuarto yin̈ iscab piso cꞌulxa yehi. Haꞌ bey tuꞌ xin chewatxꞌeꞌ tzet chicolo, ẍi Comam.

13 Hac tuꞌ xin yu isto ebnaj. Yilcha yu ebnaj hacaꞌticꞌa yu yalni Comam. Yoc ebnaj iswatxꞌeno tzet chilolax yin̈ kꞌin̈ Pascua.

Waꞌcano Comam yeb ebnaj ischejab

(Mt 26:26-30; Mr 14:22-26; 1Co 11:23-26)

14 Hayet yapni yorahil, yoc Comam yeb ebnaj ischejab sat meẍa. 15 Yalni Comam tet ebnaj:

—Hayeltaxam chiwochehan chiwecꞌtzehan huneꞌ wah yin̈ kꞌin̈ Pascua tiꞌ yeb hex yet yalan̈to maẍto chincaman. 16 Chiwalan teyet, matxa chiwecꞌtzehan huneꞌ kꞌin̈ tiꞌ masanto chij isba tzet yelapno ye huneꞌ tiꞌ yet chꞌoc sunil yalan̈ yip Comam Dios, ẍi Comam.

17 Lahwi tuꞌ xin, yinican̈ Comam chꞌen copa, bay ayayto yal teꞌ uva, yakꞌni yuchꞌandiosal tet Comam Dios, yalni Comam hacaꞌ tiꞌ:

—Chahwej lah, ucꞌwej, awecꞌo teyin̈ hununex. 18 Caw chiwalcanojan teyet, matxa chiwucꞌan yal sat teꞌ uva masanto yet chꞌoc sunil yalan̈ yip Comam Dios.

19 Lahwi tuꞌ xin, yinican̈ Comam ixim pan, yakꞌni Comam yuchꞌandiosal tet Comam Dios, iskꞌaxpon Comam ixim, yakꞌni Comam ixim tet ebnaj, yalni Comam:

—Haꞌ huneꞌ tiꞌ yechel innimanilan chiwakꞌan yin̈ camical yu hecolchahi. Wawej, yu quinhenanitijan, ẍi Comam.

20 Lahwi iswaꞌilo Comam yeb ebnaj yinipaxocan̈ Comam chꞌen copa, yalni Comam:

—Haꞌ huneꞌ ayayto yul copa tiꞌ haꞌ chakꞌni henab yin̈ huneꞌ acꞌ trato akꞌbil yu Comam Dios, chij isba yet chimalto inchiqꞌuilan yu hecolchahi, ẍi Comam.

21 Yajaꞌ naj chinanicojan yul iskꞌab ebnaj chichiwa iscꞌul win̈an, ayco naj sat meẍa coxol tiꞌ. 22 Hanin Akꞌbilintijan texol yu Comam Dios, yilal wecꞌan yin̈ camical hacaꞌ halbil yu Comam Dios, yajaꞌ cꞌanchꞌan naj chinanicojan yul iskꞌab camical, ẍi Comam.

23 Hayet yaben ebnaj huneꞌ tuꞌ, yichico ebnaj iskꞌamben tet hunun yin̈ mac chꞌanico Comam yul iskꞌab camical.

Iscajle isba ebnaj iscuywom Comam Jesús yin̈ mac ecꞌbal yelapno ye xol ebnaj

24 Lahwi tuꞌ xin, yichico ebnaj iscuywom iscajlen isba yin̈ mac ecꞌbal yelapno ye xol ebnaj.

25 Yalni Comam Jesús tet ebnaj:

—Haꞌ ebnaj ayco yahawo txꞌotxꞌ nime con̈ob ay yip ebnaj yiban̈ anma. Ebnaj ayco yahawilal tuꞌ xin chihallax cꞌulal yin̈ ebnaj yu anma. 26 Wal xin mach haco tuꞌ cheyute heba. Ta ay hunujex caw ay heyelapno cheyabe, iweyo heba hacaꞌ huno mac mach yelapno yehi. Yebpaxo haꞌ mac caw iswiꞌehal yeco texol chabe yakꞌabico isba hacaꞌ hunu chejab. 27 Kꞌinalo ta ay huneꞌ niman wah chioqui, ¿mactaxca caw niman yelapno ye heyalni? ¿Tom haꞌ naj ayco sat meẍa, mato haꞌ naj chibatxnicꞌo itah? Wal xin, haꞌ ton naj ayco sat meẍa caw niman yelapnoj. Yajaꞌ walinan, ayinicojan texol hacaꞌ naj chibatxnicꞌo itah.

28 Hex tiꞌ, caw ayexn̈eticꞌaco yet yul isyaꞌtajil wiban̈an. 29 Chexwacojan yahawiloj, hacaꞌ wocan yahawilo yu Inmaman. 30 Hex tiꞌ, chexwaꞌ sat inmeẍahan bay chinocan Yahawiloj, cat heyay tzꞌon̈no yul hecapil hununex, cat heyoc yahawil yiban̈ cablahon̈eb majan ebnaj Israel, ẍi Comam.

Yal Comam Jesús ta chal naj Pedro ta mach yohtajo naj Comam Jesús

(Mt 26:31-35; Mr 14:27-31; Jn 13:36-38)

31 Yalni Comam Jesús tet naj Pedro:

—Simón, Simón xaiskꞌan naj matzwalil tet Comam Dios ta chexyilwe naj hacaꞌ chu istxayelax ixim trigo. 32 Yaj xaꞌinkꞌanan tet Comam Dios haxinwal mach chabej iscawxi hawanma yin̈ Comam. Yajaꞌ yet chawanico hawanma win̈an hunelxa, chawiptze sunil ebnaj hawuẍta xayaco yanma win̈an, ẍi Comam.

33 Yalni naj Pedro tuꞌ tet Comam:

—Mamin, caw hinaninan intohan tawintaj, waxan̈ca yul preso maca yin̈ camical, ẍi naj.

34 Yalni Comam Jesús tet naj xin:

—Pedro, chiwalan tawet, yalan̈to maẍto chiꞌokꞌ noꞌ icham chiyo, oxelxa chawala ta mach quinhawohtajojan, ẍi Comam tet naj.

Hul isyaꞌtajil yiban̈ Comam Jesús

35 Iskꞌamben Comam Jesús tet ebnaj iscuywom:

—Yet quexinchejnitojan yet walnihan teyet ta mach cheyito hetzꞌispa yeb hemelyu, yeb hexan̈ab, ¿aymi tzet mach yabe yul hekꞌab? ẍi Comam. Istakꞌwi ebnaj:

—Matzet, ẍi ebnaj.

36 Yalnipaxo Comam tet ebnaj:

—Wal tinan̈ xin, maquex ay hetzꞌispa yeb hemelyu, iwetoj. Haꞌ mac mach yespada, istxon̈abto ischumpa cat islokꞌni yet. 37 Yuxinto chiwalan teyet, yilal yijnicano isba sunil tzet tzꞌibn̈ebilcano win̈an yu ebnaj ischejab Comam bay chala: “Hacaꞌ chꞌutelax ebnaj caw xiwquilta ismul, hac tuꞌ chꞌutelaxo naj,”* ẍiayoj. Yuxinto yilal yijni isba sunil, ẍi Comam. 38 Yalni ebnaj tet Comam:

—Mamin, ay cabeb chꞌen espada ikꞌbil juan̈ lah, ẍi ebnaj. Yalni Comam:

—Cꞌuxanxa xin, ẍi Comam.

Txahli Comam Jesús bey Getsemaní

(Mt 26:36-46; Mr 14:32-42)

39 Lahwi tuꞌ, yelti Comam Jesús yul n̈a, isto bey huneꞌ won̈an Olivo isbi, bayticꞌa chibeycꞌo Comam. Istopaxo ebnaj iscuywom Comam yintaj. 40 Hayet yapni Comam bey tuꞌ, yalni Comam tet ebnaj:

—Txahlan̈wej, haxinwal mach chexaycꞌay yul iskꞌab istxꞌojal, ẍi Comam.

41 Lahwi tuꞌ xin, yel Comam iscꞌatan̈ ebnaj hacaꞌmi xol bay chꞌapni hunu chꞌen chꞌen chikꞌojlaxtoj. Haꞌ tuꞌ xin, ay jahno Comam txahloj. 42 Yalni Comam yin̈ istxah:

Mamin, ta choche hacꞌul, colinnilojan yin̈ huneꞌ isyaꞌtajil chul wiban̈tiꞌan, yaj machojab hacaꞌ chiwochehan, to hacaꞌojab tzet chal hacꞌul, ẍi Comam.

43 Lahwi tuꞌ xin, yayilo huneꞌ naj yángel Comam Dios yul satcan̈, yakꞌno yip yanma Comam. 44 Caw occano niman isyaꞌil yin̈ yanma Comam, yuxin caw islahico Comam istxahli yin̈ sunil yanma. Caw xin chꞌel haꞌ yin̈ Comam hacaꞌ nimeta tuꞌan chicꞌ yaycꞌay sat txꞌotxꞌ.

45 Yet islahwi istxahli Comam, isto bay cancano ebnaj iscuywom. Hayet yapni Comam iscꞌatan̈ ebnaj, caw wayan̈ chu ebnaj yu biscꞌulal. 46 Yalni Comam tet ebnaj:

—¿Tzet yin̈ xin chexwayi? Ahan̈wewanoj, txahlan̈wej haxinwal mach chexaycꞌay yul iskꞌab istxꞌojal, ẍi Comam tet ebnaj.

Yet istzablaxayo Comam Jesús

(Mt 26:47-56; Mr 14:43-50; Jn 18:2-11)

47 Lan̈anto yalni Comam Jesús huneꞌ tuꞌ yapni hun bulan ebnaj; babelico naj Judas sata ebnaj, naj ayco istzꞌajo ebnaj cablahon̈wan̈ ischejab Comam. Ishitzico naj Judas tuꞌ iscꞌatan̈ Comam yun̈e istzꞌohni naj iskꞌotx Comam. 48 Yalni Comam tet naj:

—Judas, yet chatzꞌohnilo inkꞌotxtiꞌan, ¿tom hac tuꞌ chu quinhawanicojan yul iskꞌab camical? Hanin Akꞌbilintijan texol yu Comam Dios, ẍi Comam.

49 Hayet yilni ebnaj iscuywom Comam Jesús tzet lan̈an yul yiban̈ Comam, iskꞌamben ebnaj:

—Mamin, ¿chimisje jakꞌnihan̈ chꞌen espada yin̈ ebnaj tiꞌ? ẍi ebnaj.

50 Ay xin huneꞌ naj xol ebnaj iscuywom Comam tuꞌ, pitnilto istxiquin huneꞌ naj ischejab naj yahawil yin̈ ebnaj sacerdote, huneꞌ istxiquin naj yin̈ iswatxꞌkꞌab.

51 Yalni Comam Jesús:

—¡Bejwej! Mach cheyute hacaꞌ tuꞌ. Istzabnico Comam istxiquin naj, iswatxꞌiloj. 52 Haꞌ ebnaj beycꞌo tzabnoti Comam, haꞌ ton ebnaj yahawil yin̈ ebnaj sacerdote, yeb ebnaj yahawil yilomal yatut Comam Dios, yeb ebnaj ichamta winaj iswiꞌehal con̈ob; yalni Comam tet ebnaj:

—¿Tom elkꞌominan teyet yuxin ikꞌbil heyespada yeb heteꞌ, cat heyul quinhetzabnotojan? 53 Hunun tzꞌayic ayinicꞌtojan yul yatut Comam Dios, yajaꞌ mach quinhetzabayojan. Yaj wal tinan̈ maꞌapni yorahil quinisbejtzonicojan Comam Dios yul hekꞌab yeb tet naj yahawil kꞌejholo, ẍi Comam.

Yal naj Pedro ta mach yohtajo naj Comam Jesús

(Mt 26:57-58, 69-75; Mr 14:53-54, 66-72; Jn 18:12-18, 25-27)

54 Lahwi tuꞌ xin, istzabnayo ebnaj Comam, yilaxto Comam bey yatut naj yahaw yin̈ ebnaj sacerdote. Wal naj Pedro xin, nahat tzujan naj yinta Comam. 55 Yanico xin ebnaj tuꞌ iskꞌaꞌ yictabal yamakꞌil teꞌ n̈a, yoc tzꞌon̈no ebnaj kꞌaẍnoj. Ocpaxo tzꞌon̈no naj Pedro kꞌaẍno xol ebnaj. 56 Ay xin huneꞌ ix munlawom bey tuꞌ, ilni naj Pedro yet tzꞌon̈anico naj yin̈ kꞌaꞌ. Yoc tꞌan̈no ix yin̈ naj, yalni ix:

—Huneꞌ naj tiꞌ, yetbi isba naj yeb naj Jesús, ẍi ix.

57 Hayet yaben naj Pedro huneꞌ tuꞌ, yalni naj:

—Mach wohtajojan naj chawal tuꞌ, ẍi naj tet ix.

58 Hunepixto xin, yillax naj Pedro yu huneꞌ naj, yalni naj tet naj:

—Hach tiꞌ hawetbi haba yeb ebnaj tuꞌ, ẍi naj. Istakꞌwi naj Pedro:

—Machoj, mach wetbiho inbahan yeb ebnaj, ẍi naj. 59 Ayxam hunu orahil xin, ischilban yalni huneꞌxa naj yin̈ naj Pedro tuꞌ:

—Yin̈ caw yeli, haꞌ naj tiꞌ yetbi isba naj yeb naj Jesús tiꞌ, yebpaxo ah Galilea naj, ẍi naj. 60 Yalni naj Pedro:

—Mach wohtajan huneꞌ tzet chawal tiꞌ, ẍi naj.

Yet lan̈an yalni naj Pedro huneꞌ tuꞌ xin, yokꞌcan̈ huneꞌ noꞌ icham chiyo. 61 Istꞌan̈xito Comam yin̈ naj Pedro tuꞌ. Hac tuꞌ xin yu isnaniti naj Pedro tzet yal Comam tet naj: “Oxelxa chawala ta mach quinhawohtajojan yet chiꞌokꞌcan̈ noꞌ icham chiyo,” ẍi Comam Jesús tet naj. 62 Hac tuꞌ xin yu yelto naj, yoc naj okꞌoj.

Yet isbuchlax Comam Jesús

(Mt 26:67-68; Mr 14:65)

63 Wal ebnaj ayco tan̈eno Comam Jesús tuꞌ, oc ebnaj tzebo yin̈ Comam, ismakꞌnipaxo ebnaj Comam. 64 Yoc ebnaj ismajcheno sat Comam, chi-la-iskꞌamben ebnaj tet Comam:

—Halilo mac macachmakꞌni, ẍi ebnaj tet Comam. 65 Hantato buchwal tzotiꞌ yal ebnaj yin̈ Comam.

Ilaxto Comam Jesús sata ebnaj iswiꞌehal con̈ob Israel

(Mt 26:59-66; Mr 14:55-64; Jn 18:19-24)

66 Hayet issajbilo xin, iscutxbanico isba ebnaj ichamta winaj yin̈ con̈ob Israel, yeb ebnaj yahawil yin̈ ebnaj sacerdote, yeb ebnaj chicuywa yin̈ isley naj Moisés; ischejni ebnaj ilaxoti Comam Jesús sataj. Iskꞌamben ebnaj tet Comam:

67 —Hal jetan̈, ¿tom yeli hach tiꞌ Cristo hach? ẍi ebnaj.

Istakꞌwican̈ Comam:

—Ta chiwalan teyet ta Haninan Cristo hinan, mach cheyakꞌayto yul heyanma. 68 Taca ay tzet chinkꞌambepaxojan teyet, mach chepajtzepaxo wetan. 69 Yaj wal tinan̈ Hanin Akꞌbilintijan texol yu Comam Dios chinoctzꞌon̈nojan yin̈ iswatxꞌkꞌab Comam Dios; Comam caw aycano yip, ẍi Comam.

70 Yuxinto sunil ebnaj oc kꞌambeno tet Comam:

—¿Tom Iscꞌahol Comam Dios hawe chal tuꞌ? ẍi ebnaj. Istakꞌwi Comam Jesús:

—Hoꞌ, Iscꞌahol Comam Dios wehan hacaꞌ cheyute heyalni tiꞌ, ẍi Comam.

71 Yalni ebnaj:

—Tinan̈ matxa yilalo chicokꞌan anma chihalni ismul naj tiꞌ, to han̈-caw-on̈ majabe tzet chal naj, ẍi ebnaj yin̈ Comam.

<- SAN LUCAS 21 SAN LUCAS 23 ->