Basi Filipi

Kotili a mukaanda

Pawuli abali libuundu la ku Filipi, mu taanga dia midieenge mia nde mia isala kia Nziaambi, mia mbala ya dioolo. Libuundu li, lili libuundu la tsiomi li Pawuli abali mu matsi ma Putu. Ngaanda a Filipi yili ku taanda a tsi ya kuumbu Eleene ku peembi ya Esete, mu itinini kia Masedwane.

Mukaanda a Pawuli kwaa libuundu la Filipi, li mu umweese itwaari kia mifuri kili nha kati tumu Pawuli na libuundu. Pawuli li na matsimi ma ubwahamisa lo. Nde li mutso perese ku ngaanda a Looma. Nde li mu umono pasi bu ali utu pe usala na ubasila basi Filipi. Nde tooni uyaabisa bo mandaa ma litoono la nde mu bo. Nde li mu uleele kwaa bo ka ti, nde li na ngebe. Mundaa ti, baata bakimi bali mu uyaabisa bo Ndaa Yimbwe, mu matsimi mamabi paa badiimbisi bo (1.15-17; 2.21; 3.2,18). Pawuli li na ilimbisi kia utsinduu bambaayi ba nde ba isala kia Nziaambi ku Filipi, paa bahamisa libuundu na baholo mamvuungu ma bo (2.19-30). Basi Filipi, ali batsinduu bimbwangi kwaa Pawuli (4.10-20). Ni mu buu, mu mukaanda wu, Pawuli li mu uvutulu bo matoondo, li mu uha bo mandongi na li mu uhamisa bo mu imiini kia bo.

Pawuli li mu usuusu nha kulu a misi mia basi Filipi moonyi na likwa la Pfumu Yiisu (2.6-11). Yiisu asiisi bioosi bi nde ali na bio. Mu ndaa yii, Nziaambi abiaalisi nde nha yulu a bisii bioosi na nha yulu a baata boosi. Ni buu ka, Pawuli anyaali ndaanda yi Bayuudayo bakiha nde tsiomi (3.3-10). Mu taanga di, nde li mu usiingi umono pasi mundaa Yiisu Kristo. Nde li mu perese, ku nde amaayilimi mu uha idiingi kia nde. Ka nde li uhama mu usa ilimbisi ti, mbari nde sa asiimbuu mu babakwa. Tumu Pawuli li mu uloombo kwaa basi Filipi mu uduku ifwaani kia nde (3.17; 4.9).

Kutso ndukisini a mukaanda, Pawuli li mu utsuu mu kinya yi imiini ili mu uha. Nde li mu uhamisa basi Filipi mu uba moonyi kutso imiini. Imiini ki ili mu umonuu mu ndeeyili na mapasi, mu taanga di balibuundu bali bavuutunu itwaari na Pfumu Yiisu.

1 Me Pawuli na Timoteo, bali basiali ba Yiisu Kristo. Bisi disionii mukaanda wu kwaa baata ba Nziaambi boosi mu itwaari kia bo mu Yiisu Kristo, babali ku ngaanda a Filipi, kwaa bakuutu na bakebi ba libuundu. 2 Nyaala Nziaambi Taayi a bisi na Pfumu Yiisu Kristo baha beni bweese na iyeenge!

3 Me ndi mu uvutulu matoondo kwaa Nziaambi, mu pasi taanga di me ndi mu utsimi mu beni! 4 Mu pasi taanga di me ndi mu ukuundu Nziaambi mu beni boosi, me ndi mu ukuundu mu kinya. 5 Mundaa ti, beni diabaasili me mu uyaabisa Ndaa Yimbwe, umata iluumbu kia tsiomi, natee lolo. 6 Me ndi na ilimbisi mu ndaa yi: Nziaambi wabaanduu isala ki ibwe kiinaki nha kati a beni, sa adukusu kio natee ku manini a kio, mu iluumbu ki Yiisu Kristo akaayiri avutuu. 7 Bwafwaana kwaa me ti me ba na matsimi ma buu mu beni boosi. Mungwanya, me natoono beni mu mutimi a me, mundaa ti beni boosi dili na ikuku mu mbweese ba Nziaambi a yiri kwa me. Mu yii beni dia basili me a mu ndili a taanga di me na li na bunyanga mu udwanina Ndaa Yimbwe na mu uyaabisa yo kwaa baata so mu taanga di me ndi mu perese. 8 Ngwanya, Nziaambi li mbaangi a me: me ndi na nzala yalaa mu umono beni boosi. Mundaa ti, me natoono beni mu buleembi ba Yiisu Kristo.

9 Me ndi mu uloombo kwaa Nziaambi mu likuundu la me ti litoono la beni libaapfunanga, mu nziaabili na mbahala yakuu, 10 paa beni diyaaba usoolo miavulu tala. Ni buu, beni sa diba babatsieeme na babahele na toono mu iluumbu kia nziriri a Kristo. 11 Na mu libaasila la Yiisu Kristo, idiingi kia beni sa yilulu mu butu dia libweeye la beni mu ndaa likiinzi na mbilili a Nziaambi.

12 Baana banguu, me natoono ti beni diyaaba ndaa yi: mandaa mayirili me, mabaasila Ndaa Yimbwe mu uyene makukulu. 13 Ni mu buu ti, masodaare moosi mali mu ukebe nzo a mutumi, na mu mapeembi makimi, bayaaba ti me ndi mu perese mu ndaa isala kia Kristo. 14 Baana ba nguu babalayi, bu bayuyi ti me ndi mu perese, babayi ilimbisi kialaa mu Pfumu, na basi mifuri mu uyiisi Mandaa ma Nziaambi, kwahele a boomo.

15 Ngwanya, baata babamosi nha kati a bo bali mu uyaabisa Kristo mu muheebili wa musoyi na muheebili wa makaama. Ka bakimi bali mu uyaabisa nde mu matsimi mamabwe. 16 Babamosi bali mu uyiisi mu mutimi wu mubwe, bo bali mu uyiluu buu mu litoono. Mu ndaa ti, bo bayaaba ti ni mu ukala Ndaa Yimbwe me ndi nha. 17 Baba mosi bali mu uyiisi Kristo mu muheebili wa musoyi, ka mu matsimi a ma li matsieeme pe. Bo bali mu utsimi ti, bo bali mu ubweese mapasi mu idiingi kia, mu taanga di me ndi mu perese. 18 Ka yii a yili ndaa pe! So matsimi ma bo mali ma ngwanya, so a buu pe mapia, ndaa yavulu tala yili ti bo bali mu uyiisi Kristo. Na mu yii, me ndi na kinya! Me sa baabaanganga na kinya. 19 Mundaa ti, me nayaaba ti mandaa maa moosi, sa masa ti Nziaambi ayobolo me, mu toono a makuundu ma beni na mu libaasila la Muheebili a Yiisu Kristo. 20 Ngwanya, me nasa ilimbisi kia mufuri ti, iloo so imosi pe ikaakoonoso me mu uleele mioosi mi me ndi na mio. Me li mu ukebe mu taanga di weti mu taanga dioosi, Kristo wukaamweese bunene ba nde mu nyutu a me, so me ndi moonyi, so me kwiiri.

21 Mundaa ti, mu me, moonyi ni Kristo, na likwa ni ndaanda. 22 Ka so me nituu ubwa ba moonyi mu musunyi mu ubwa sa isala kia ndutu, me a nayaaba pe, ima me nafwaana usoolo. 23 Me ndi nha kati a matsimi moolo. Tsimi ya tsiomi ni yili ti, me ndi na nzala usiisi idiingi ki, mu uba na Kristo, yii ni tsimi yavulu bubwe. 24 Ka ya bwa vulu ndutu, ti me hama mu uba moonyi mu musunyi nha tsini a toto nha mu ndaa a beni. 25 Weti bu me ndi na imiini mu ndaa yi, me nayaaba ti me sa hama mu uba moonyi na beni boosi, mu ubaasila beni mu uyene makukulu na uba na kinya mu imiini. 26 Ni mubuu, bu me kaabwayiri kwaa beni, beni sa dibwayiluu uba na liwaa mu itwaari kia beni na Yiisu Kristo.

27 Ka diba na ndiaatili yafwaana na Ndaa Yimbwe ya Kristo. Diyiluu buu paa ti, so me yimono beni, na so me hele uyamono beni, nyaala me yuu ti beni dili mu uyiluu uba itwaari mu muheebili mosi. Na ti beni dili mu udwaana itwaari mu mutimi mosi mundaa imiini mu Ndaa Yimbwe. 28 A dinyaala pe ti mitaata mia beni miha beni boomo. Yii sa yiba kwaa bo, iliimbi kia pfuuyili a bo. Kwaa beni, kio ili iliimbi kia liyobolo, na kio ili mu umata kwaa Nziaambi. 29 Mundaa ti, beni dimaabaa bweese ba usalila Kristo. A mu ndila usuusu imiini kia beni mu nde pe, ka na mu ubwamono pasi mu nde. 30 Mu taanga di, beni dili mu udwaana mudiingi mosi na wu beni diamoni me mu udwaana tsiomi. Na me keni mu udwaana nde, weti bu beni diayaaba.

Mukaanda a Pawuli kwaa basi Filipi 2 ->