2 As kat iyansa tibꞌ unqꞌa ijlenaaleꞌ skajayil tukꞌ u ixojeꞌ. As ech veꞌt vitxumbꞌal unqꞌa tenameꞌ skajayil echeꞌ qꞌabꞌareel kat ibꞌana taꞌn vitxumbꞌal u ixojeꞌ, tan ech vitxumbꞌal ixojeꞌ echeꞌ qꞌabꞌareel,— tiꞌk u ángel tal sve.

3 As yak kuxh kꞌuchpu sve taꞌn u Tiixhla Espíritu unpajte. As kat teqꞌo bꞌen in u ángel tu umaꞌl u tzuukin txꞌavaꞌ. As kat vil umaꞌl u ixoj uvaꞌ xonlik jeꞌ tiꞌ u txooeꞌ uvaꞌ vujvaꞌl iviꞌ atike. As lavat tukꞌ txoo. As vaꞌlik chit ikajal u tiꞌ txooeꞌ. As mamaꞌla bꞌii atik ok tiꞌ txoo uvaꞌ nik eesan iqꞌii u Tiixheꞌ.

4 As atik ok umaꞌl u oksaꞌm taꞌn ixoj uvaꞌ muraꞌt as kaj unpajte. As vejel chit ixoj taꞌn bꞌaꞌnla qꞌan chꞌichꞌ, tukꞌ unqꞌa kꞌubꞌeꞌ uvaꞌ chꞌiꞌumal chit tiloneꞌ, tukꞌ bꞌaꞌnla chaj kueentaxh. As atik ok umaꞌl u nimla picheel tiqꞌabꞌ ixoj uvaꞌ bꞌaꞌnla qꞌan chꞌichꞌ. As noonajlu u picheeleꞌ taꞌn unqꞌa vaꞌlexhla txumbꞌaleꞌ uvaꞌ nik ibꞌan u ixojeꞌ uvaꞌ eesan tibꞌ tu bꞌey.

5 As tzꞌibꞌamalik ok umaꞌl u bꞌii xoꞌl ipala ixoj uvaꞌ yeꞌxhebꞌil nik ipal stuul. As ech nik tal u bꞌii ileꞌ: «Ineꞌ u nimla Babilonia. As ineꞌ vitxutx unqꞌa ixojeꞌ skajayil uvaꞌ yanaꞌs kuxhtuꞌ. As ineꞌ cheesan tetz unqꞌa vaꞌlexhla txumbꞌaleꞌ skajayil vatz u txꞌavaꞌeꞌ,» tiꞌk u tzꞌibꞌeꞌ uveꞌ atik xoꞌl ipala u ixojeꞌ.

6 As kat vil veꞌteꞌ uvaꞌ qꞌabꞌareel u ixojeꞌ, tan maꞌtik tukꞌat ixoj vikajal unqꞌa itenam u Kubꞌaal Tiixheꞌ as tukꞌ unqꞌa tenameꞌ uvaꞌ maꞌtik iyatzꞌpeꞌ uvaꞌ nik niman u Jesús. As tul kat vila, as yak kuxh kat teqꞌo veꞌt vaama staꞌn.

7 As ech tal veꞌt u ángel ileꞌ sve: —¿Kam qꞌi nu kuxh teqꞌo aama? Pet tuk val isuuchil see tiꞌ u ixojeꞌ tukꞌ u txooeꞌ uvaꞌ at jeꞌ u ixojeꞌ stiꞌ. As aꞌeꞌ u txooeꞌ uvaꞌ vujvaꞌl iviꞌ ati. As at lavat tukꞌ txoo.

8 Tan u txooeꞌ uvaꞌ kat eela, as atik txoo bꞌaxa. Pet yeꞌl veꞌt txoo at cheel. As tuk jeꞌoj chꞌuꞌl txoo tu u nimla tokkin juleꞌ. Pet yakleꞌl veꞌt txoo tiꞌ isotzeꞌ tu u kꞌaxkꞌoeꞌ. As jankꞌal unqꞌa tenameꞌ vatz u txꞌavaꞌeꞌ uveꞌ yeꞌl vibꞌiieꞌ tzꞌibꞌamal kan tu u uꞌujeꞌ uvaꞌ maꞌtik itzꞌibꞌalkat vibꞌii unqꞌa tenameꞌ xeꞌ qꞌiisaj uvaꞌ at itiichajil kꞌatz u Tiixheꞌ, as la teqꞌo veꞌt taama unqꞌa tenameꞌ tul la til u txooeꞌ, tan atik u txooeꞌ bꞌaxa. As yeꞌl veꞌt txoo at cheel. Pet techal la ul txoo unpajte.

9 As tzitziꞌ la ootzilkat uvaꞌ abꞌil uvaꞌ at itxumbꞌal as at tootzibꞌal. As aꞌ isuuchil vujvaꞌl iviꞌ u txooeꞌ, tan aꞌeꞌ ni kꞌuchun vujvaꞌl unqꞌa vitzeꞌ uvaꞌ nixonebꞌkat u ixojeꞌ.

10 As aꞌeꞌ ni kꞌuchun tiꞌ vujvaꞌl u ijlenaaleꞌ unpajte. As oꞌvaꞌl unqꞌa ijlenaaleꞌ kat kuꞌi. Pet ech koj umaꞌte, tan atoꞌk ijlenaalil cheel. As at umaꞌte uvaꞌ yeꞌ uloj. As tul la uli, as yeꞌ kuxh jatvaꞌt qꞌii la ul ibꞌaneꞌ.

11 As u txooeꞌ uvaꞌ atik bꞌaxa, as yeꞌl veꞌt txoo at cheel. As aꞌeꞌ ivaaxaj u ijlenaaleꞌ la ibꞌaneꞌ, kꞌuxh an kuxh umaꞌl uveꞌ xoꞌl vujvaꞌl unqꞌa ijlenaaleꞌ. As yakleꞌl veꞌt txoo tiꞌ isotzeꞌ tu u kꞌaxkꞌoeꞌ.

12 As u laval unqꞌa tukꞌ txooeꞌ uvaꞌ kat eela, as aꞌeꞌ laval unqꞌa ijlenaaleꞌ uvaꞌ yeꞌ okoj xoꞌl u tenameꞌ uvaꞌ at jaqꞌ u tijleꞌm u Tiixheꞌ. Pet la ok veꞌt tiꞌ u tijleꞌmeꞌ tukꞌ u txooeꞌ. As umaꞌl kuxh oora la ibꞌaneꞌ tukꞌ u tijleꞌmeꞌ.

13 As eela kuxh itxumbꞌal laval unqꞌa ijlenaaleꞌ la ibꞌaneꞌ, tan la taqꞌ veꞌt ok u tijleꞌmeꞌ te u txooeꞌ.

14 As la ixeꞌtisa veꞌt chajnaj chꞌaꞌo tiꞌ u Kaneeroꞌeꞌ. As aꞌ u Kaneeroꞌeꞌ tuk bꞌanon kanal chajnaj, tan aꞌ u Kubꞌaal Jesúseꞌ Bꞌooqꞌol tiꞌ unqꞌa bꞌooqꞌoleꞌ skajayil; as Aakeꞌ Ijlenaal tiꞌ unqꞌa ijlenaaleꞌ skajayil. As xekel veꞌt unqꞌa tenameꞌ tiꞌ Aak uvaꞌ molomal taꞌn Aak as tukꞌ unqꞌa veeꞌ txaael veꞌt taꞌn Aak,— tiꞌk u ángel sve.

15 As ech tal veꞌt u ángel ileꞌ sve: —Unqꞌa aꞌeꞌ uvaꞌ kat eela uvaꞌ xonleꞌlkat u ixoj uvaꞌ yanaꞌs, as aꞌeꞌ unqꞌa tenameꞌ skajayil vatz u txꞌavaꞌeꞌ, kꞌuxh kam kuxh tenamil, as kꞌuxh kam kuxh yolbꞌalil niyolbꞌe.

16 As u txoo uvaꞌ kat eela as tukꞌ lavat unqꞌa tukꞌ txooeꞌ uvaꞌ eela itxumbꞌal stukꞌ, as la chiꞌan veꞌt taama tiꞌ u ixoj uvaꞌ yanaꞌs kuxhtuꞌ. As la kꞌaxbꞌisal veꞌt u ixojeꞌ. As la tꞌosbꞌaꞌl veꞌt kan ixoj. As la echbꞌul veꞌt vichibꞌil ixojeꞌ. As la tzꞌeꞌsal veꞌt ixoj taꞌn xamal,

17 tan maꞌtik toksat u Tiixheꞌ tu u taanxelal unqꞌa ijlenaaleꞌ tiꞌ ibꞌanat veꞌteꞌ kam uvaꞌ alel kan taꞌn Aak tiꞌ u ixojeꞌ. As la ikꞌul tibꞌ viyol laval unqꞌa ijlenaaleꞌ tiꞌ taqꞌat ok u tijleꞌmeꞌ te u txooeꞌ. As at veꞌt tijleꞌm txoo la ibꞌaneꞌ. As la bꞌen ibꞌaneꞌ kam uvaꞌ alel kan taꞌn u Tiixheꞌ.

18 As u ixojeꞌ uvaꞌ kat eela, as aꞌeꞌ u nimla tenameꞌ uvaꞌ nim chit u tijleꞌmeꞌ tiꞌ unjoltu unqꞌa ijlenaaleꞌ skajayil vatz u txꞌavaꞌeꞌ,— tiꞌk u ángel tal sve.

<- APOCALIPSIS 16APOCALIPSIS 18 ->