Link to home pageLanguagesLink to all Bible versions on this site

Hebreos U uꞌuj
uvaꞌ tzꞌibꞌamal kan
te unqꞌa tiaal Israel
uvaꞌ ni niman u Jesús

1
Aꞌ u Jesús ni kꞌuchun vitxumbꞌal u Tiixh
1 Jatpajul kuxh kat yolon u Tiixheꞌ te unqꞌa qꞌesla kubꞌaaleꞌ naꞌytzan taꞌn unqꞌa qꞌajsan tetz viyol Aakeꞌ. As nimal txumbꞌal kat itxakonsa Aak tiꞌ uvaꞌ la pal unqꞌa tenameꞌ tu u yoleꞌ uveꞌ ni tal Aak.
2 Pet ech koj tu unqꞌa qꞌiieꞌ uvaꞌ at oꞌ stuul cheel, tan kat tal veꞌt Aak isuuchil u yoleꞌ sqe taꞌn viKꞌaoleꞌ. As tukꞌ viKꞌaol Aakeꞌ kat icheesa kan Aak u txꞌavaꞌeꞌ tukꞌ u almikaꞌeꞌ skajayil. As kat ikꞌujbꞌaꞌ veꞌt Aak viKꞌaoleꞌ tiꞌ uvaꞌ aꞌeꞌ la etzin unqꞌa veeꞌ skajayil.
3 As aꞌ viKꞌaol u Tiixheꞌ ni kꞌuchun uvaꞌ nim talchu veꞌt Aak echeꞌ itxijun u qꞌiieꞌ sqiꞌ. As aꞌ vivatzibꞌal Aakeꞌ viKꞌaoleꞌ sukuvatz. As tukꞌ viyol viKꞌaol Aakeꞌ uvaꞌ at tijleꞌm, ni til isuuchil unqꞌa icheesaꞌm Aakeꞌ skajayil tiꞌ itzojpisataꞌ kam uvaꞌ ni titzꞌa Aak stiꞌ. As tul maꞌt isotzsat viKꞌaol Aakeꞌ kupaav, as kat xonebꞌ veꞌteꞌ tisebꞌal u Tiixheꞌ uvaꞌ nim talcheꞌ uvaꞌ echen tu almikaꞌ.
4 Estiꞌeꞌ at veꞌt pal u tijleꞌm viKꞌaol u Tiixheꞌ tiꞌ u tijleꞌm unqꞌa ángel. As nim veꞌt talchu vibꞌiieꞌ tiꞌ vibꞌii unqꞌa ángel.
At pal u tijleꞌm viKꞌaol u Tiixh tiꞌ unqꞌa ángel
5 Tan yeꞌl umaj ángel uvaꞌ ech koj kat tal u Tiixh ileꞌ ste:
Axheꞌ axh unKꞌaol;
As ineꞌ uvaꞌ kat aqꞌon u eejleꞌmeꞌ cheel, tiꞌk koj Aak.
As mitaꞌn te umaj ángel kat talkat Aak umaꞌt u yoleꞌ uvaꞌ ech ni tal ileꞌ:
As ineꞌ in Bꞌaala tiꞌ u uxhchileꞌ.
As aꞌ u uxhchileꞌ unkꞌaol la ibꞌaneꞌ, tiꞌk koj Aak.
6 As tul kat ul veꞌt unchꞌiꞌtil viKꞌaol u Tiixheꞌ vatz u txꞌavaꞌeꞌ, as ech kat tal veꞌt Aak ileꞌ stiꞌ:
Techal chit la qaaebꞌ unqꞌa ángel uvaꞌ tetz u Tiixheꞌ svatz skajayil, tiꞌk Aak.
7 As ech ni tal Aak ileꞌ tiꞌ unqꞌa ángel:
Ineꞌ ni bꞌanon uvaꞌ ech veꞌt unqꞌa ángel echeꞌ kajiqꞌ.
As ech unqꞌa unkꞌameꞌ echeꞌ taqꞌ xamal, tiꞌk Aak tal tiꞌ unqꞌa ángel.
8 Pet ech koj u yoleꞌ uvaꞌ ni tal Aak tiꞌ viKꞌaoleꞌ, tan ech ni tal Aak ileꞌ stiꞌ:
Axh Tiixh. As yeꞌl veꞌt iyaꞌtebꞌal u eejleꞌmeꞌ la ibꞌaneꞌ tiꞌ chit ibꞌeneꞌ.
As jik chit axh la abꞌaneꞌ tukꞌ u eejleꞌmeꞌ.
9 Nasaꞌ unqꞌa jikla txumbꞌaleꞌ. Pet yeꞌ nasaꞌ unqꞌa vaꞌlexhla txumbꞌaleꞌ.
As nim u chiibꞌichileꞌ kat ibꞌan tu u qꞌiieꞌ tul uvaꞌ kat unvaa vaviꞌeꞌ tu aceite,
texhlal tetz uvaꞌ kat untxaa axh tiꞌ voksat aqꞌii tiꞌ unqꞌa uxhchileꞌ, tiꞌk u Tiixheꞌ tal tiꞌ viKꞌaoleꞌ.
10 As ech umaꞌt u yol ileꞌ uvaꞌ ni tal u Tiixheꞌ tiꞌ viKꞌaoleꞌ:
UnKꞌaol, kat acheesa u vatz txꞌavaꞌeꞌ tixeꞌtebꞌal u qꞌiisajeꞌ.
As tukꞌ vayakꞌileꞌ kat acheesa u almikaꞌeꞌ unpajte.
11 Jankꞌal unqꞌa acheesaꞌmeꞌ la sotzeꞌ. Pet ech koj axh, tan at chit axheꞌ tiꞌ chit ibꞌeneꞌ.
As kajayil chit unqꞌa acheesaꞌmeꞌ as la pal iyakꞌil echeꞌ nibꞌan unqꞌa oksaꞌmeꞌ.
12 As ech la oolbꞌe unqꞌa acheesaꞌmeꞌ echeꞌ ni tulbꞌel umaj oksaꞌm uvaꞌ nibꞌochlik el, tul uvaꞌ yeꞌ nitxakon veꞌteꞌ.
As la jalpul unqꞌa acheesaꞌmeꞌ echeꞌ nibꞌanchu te umaj oksaꞌm uvaꞌ nijalpuleꞌ.
Pet ech koj axh, tan at chit axheꞌ tiꞌ chit ibꞌeneꞌ.
As yeꞌl imoxtebꞌal vayaabꞌeꞌ ati, tiꞌk u Tiixheꞌ tiꞌ viKꞌaoleꞌ.
13 As yeꞌl umaj ángel uvaꞌ ech koj kat tal u Tiixh ileꞌ ste:
Xonebꞌen tu vunsebꞌaleꞌ
techanal la vaqꞌ kan unqꞌa uxhchileꞌ jaqꞌ avoj uveꞌ ni chꞌoꞌn taama seeꞌ, tiꞌk koj Aak te umaj ángel.
14 As ootzimal sqaꞌn uvaꞌ ech unqꞌa ángel echeꞌ u kajiqꞌeꞌ. As aꞌeꞌ ikꞌam u Tiixheꞌ. As chajel tzaneꞌ tiꞌ kulochpeꞌ, jankꞌal oꞌ uvaꞌ la etzin u nimla bꞌaꞌnileꞌ uvaꞌ aqꞌel sqe taꞌn Aak tiꞌ isotzsat Aak u kupaaveꞌ.

HEBREOS 2 ->