4
Ni tal u Xhun uvaꞌ jit kajayil unqꞌa yol la nimali
1 Vitzꞌin vatzik uvaꞌ xoꞌn ex sve, as jit kajayil unqꞌa yoleꞌ la enima. Pet lanal pal ex stuul ma aꞌ tzaanajkat u yoleꞌ xeꞌ u Tiixheꞌ moj yeꞌle, tan nimal unqꞌa uxhchileꞌ paxin tibꞌ vatz u txꞌavaꞌeꞌ uvaꞌ nu kuxh toksa tibꞌ qꞌajsan tetz viyol u Tiixheꞌ. As chulin yol kuxhtuꞌ.
2 As jankꞌal unqꞌa uxhchileꞌ uvaꞌ ni alon uvaꞌ ech u Jesucristo echeꞌ naj tul kat ul Aak vatz txꞌavaꞌ, as aꞌ uxhchileꞌ uvaꞌ tetz u Tiixheꞌ. As aꞌ u Tiixhla Espíritu ni aqꞌon u tootzibꞌaleꞌ.
3 Pet ech koj unqꞌa uxhchileꞌ uvaꞌ la alon uvaꞌ jit ech u Jesucristoeꞌ echeꞌ naj tul kat ul vatz txꞌavaꞌ. As jit u Tiixheꞌ ni aqꞌon itxumbꞌal. Pet aꞌ tzaanajkat vitxumbꞌaleꞌ xeꞌ u najeꞌ uvaꞌ ni toksa tibꞌ Cristoil tan abꞌimal setaꞌn uvaꞌ la uli. As at veꞌt unqꞌa vaꞌlexhla txumbꞌaleꞌ vatz u txꞌavaꞌeꞌ cheel.
4 Vitzꞌin vatzik uvaꞌ xoꞌn ex sve, as ex veꞌt tetz u Tiixheꞌ. As estiꞌeꞌ yeꞌ kat etaqꞌ etibꞌ maxtibꞌeloj te unqꞌa chulin yoleꞌ, tan yeꞌ la lejon u aqꞌol tetz vitxumbꞌal unqꞌa chulin yoleꞌ tiꞌ u Tiixhla Espíritu uvaꞌ ni aqꞌon etxumbꞌal.
5 As echeꞌ unqꞌa chulin yoleꞌ, tan vatz txꞌavaꞌilla txumbꞌal kuxheꞌ vitxumbꞌaleꞌ. Estiꞌeꞌ uvaꞌ ninima veꞌt unqꞌa tenameꞌ viyol unqꞌa chulin yoleꞌ, tan vatz txꞌavaꞌilla yol kuxheꞌ viyoleꞌ.
6 Pet oꞌ uvaꞌ oꞌ apóstol, as oꞌ veꞌt tetz u Tiixheꞌ. As abꞌil uvaꞌ ootzin tetz u Tiixheꞌ, as aꞌeꞌ uvaꞌ ni niman u yoleꞌ uvaꞌ nu kuchuseꞌ. Pet abꞌil uveꞌ yeꞌ ootzin tetz u Tiixheꞌ, as yeꞌ ninima. As ech qootzit veꞌteꞌ uvaꞌ abꞌil atoꞌk u Tiixhla Espíritu tu u taanxelaleꞌ, as abꞌil uvaꞌ yeꞌl u Tiixhla Espíritu atoꞌk tu u taanxelaleꞌ, tan tiꞌ uvaꞌ aꞌ u chuli yoleꞌ ninima.
Exoꞌni taꞌ etibꞌ sevatzaj
7 Vitzꞌin vatzik uvaꞌ xoꞌn ex sve, as kuxoꞌnitaj qibꞌ sukuvatzaj, tan aꞌ u Tiixheꞌ ni aqꞌon kutxumbꞌal tiꞌ kuxoꞌnit qibꞌ sukuvatzaj. As jankꞌal oꞌ uvaꞌ nu kuxoꞌni qibꞌ sukuvatzaj, as oꞌ meꞌal ikꞌaol Aak, tan ootzimal veꞌt Aak sqaꞌn.
8 Pet abꞌil uvaꞌ yeꞌ nixoꞌni tibꞌ svatzaj as yeꞌ ootzimal u Tiixheꞌ staꞌn, tan nimeꞌ vibꞌaꞌnil u Tiixheꞌ nibꞌan sqiꞌ.
9 As aꞌ kat ikꞌuchkat Aak vinimla bꞌaꞌnileꞌ sqiꞌ, tan kat taqꞌ tzan Aak unchꞌiꞌtil viKꞌaoleꞌ vatz u txꞌavaꞌeꞌ tiꞌ uvaꞌ at veꞌt kutiichajil kꞌatz Aak taꞌn vibꞌaꞌnil viKꞌaoleꞌ.
10 As aꞌ tzaanajkat u xoꞌniibꞌeꞌ xeꞌ u Tiixheꞌ, tan jit oꞌeꞌ kat xoꞌnin Aak bꞌaxa. Pet Aakeꞌ kat xoꞌnin oꞌ bꞌaxa. Estiꞌeꞌ kat ichaj veꞌt tzan Aak viKꞌaoleꞌ tiꞌ ichooat u kupaaveꞌ.
11 Vitzꞌin vatzik uvaꞌ xoꞌn ex sve, tan tiꞌ uvaꞌ kat ixoꞌni oꞌ u Tiixheꞌ, as echat chit la kubꞌaneꞌ unpajte tan la kuxoꞌni veꞌt qibꞌ sukuvatzaj.
12 As yeꞌxhebꞌil kat ilon u Tiixheꞌ. Pet tul nu kuxoꞌni qibꞌ sukuvatzaj, as aꞌ texhlal tetzeꞌ uvaꞌ at veꞌt ok u Tiixheꞌ tu u qaanxelaleꞌ. As tiꞌ u bꞌaꞌneꞌ uvaꞌ nu kubꞌaneꞌ tukꞌ vibꞌaꞌnil Aakeꞌ, as nikꞌucheꞌ uvaꞌ xoꞌn chit unqꞌa tenameꞌ te Aak.
13 As kat toksa veꞌt ok u Tiixheꞌ u Tiixhla Espíritu tu u qaanxelaleꞌ. Estiꞌeꞌ uvaꞌ ootzimal veꞌt sqaꞌn uvaꞌ at veꞌt ok oꞌ kꞌatz Aak; as at veꞌt ok Aak tu u qaanxelaleꞌ unpajte.
14 As jankꞌal oꞌ uvaꞌ oꞌ apóstol, as kat qil veꞌt viKꞌaol u Tiixheꞌ. Estiꞌeꞌ nu kupaxsa yol xoꞌl unqꞌa tenameꞌ uvaꞌ kat ichaj tzan u Tiixheꞌ viKꞌaoleꞌ vatz u txꞌavaꞌeꞌ tiꞌ iqꞌalpul unqꞌa tenameꞌ skajayil.
15 As abꞌil uvaꞌ la niman uvaꞌ iKꞌaol u Tiixheꞌ u Jesús, as aꞌeꞌ uvaꞌ at veꞌt ok u Tiixheꞌ tu u taanxelaleꞌ; as at veꞌt ok kꞌatz Aak unpajte.
16 As ootzimal veꞌteꞌ sqaꞌn uvaꞌ xoꞌn veꞌt oꞌ te u Tiixheꞌ. As kꞌujleꞌl kukꞌuꞌl tiꞌ Aak uvaꞌ atoꞌk chit taama Aak tiꞌ kuxoꞌnileꞌ, tan xoꞌn chit unqꞌa tenameꞌ skajayil te Aak. As abꞌil uvaꞌ atoꞌk taama tiꞌ ixoꞌnit Aak, as tiꞌ ixoꞌnit unqꞌa tenameꞌ, as aꞌeꞌ uvaꞌ at veꞌt ok kꞌatz Aak. As at veꞌt ok Aak tu u taanxelal unpajte.
17 As estiꞌeꞌ yeꞌ la xoꞌv oꞌ vatz u Jesucristo tul la ilej veꞌt u qꞌiieꞌ uvaꞌ la ul ibꞌan Aak isuuchil unqꞌa tenameꞌ skajayil, tan ootzimaleꞌ sqaꞌn uvaꞌ kat iyakꞌinsa u Tiixheꞌ u qaanxelaleꞌ tiꞌ uvaꞌ la kuxoꞌni qibꞌ sukuvatzaj. As la kuxoꞌni unqꞌa tenameꞌ unpajte, tan ech qatineꞌ xoꞌl unqꞌa tenameꞌ echeꞌ u Jesús.
18 As jankꞌal oꞌ uvaꞌ ootzimal sqaꞌn uvaꞌ xoꞌn chit oꞌ te Aak, as yeꞌ la xoꞌv veꞌt oꞌ vatz Aak, tan jik chit nu kuxoꞌni Aak. As jik chit nixoꞌni oꞌ Aak unpajte. Estiꞌeꞌ yeꞌ la xoꞌv oꞌ vatz Aak, tan ootzimal sqaꞌn uvaꞌ kat iyakꞌinsa veꞌt u Tiixheꞌ tu u qaanxelaleꞌ tiꞌ uvaꞌ la kuxoꞌni qibꞌ sukuvatzaj as tukꞌ unqꞌa tenameꞌ unpajte. Pet ech koj u uxhchileꞌ uvaꞌ nixoꞌveꞌ tiꞌ uvaꞌ tuk uloj u kꞌaxkꞌoeꞌ stiꞌ taꞌn u Tiixheꞌ, as aꞌeꞌ uvaꞌ yeꞌ nixoꞌnin Aak tijikil.
19 As aꞌ u Tiixheꞌ kat xoꞌnin oꞌ bꞌaxa. As estiꞌeꞌ uvaꞌ xoꞌn veꞌt Aak sqe unpajte.
20 Asoj abꞌil la alon uvaꞌ: «Xoꞌn veꞌt u Tiixheꞌ sve,» chaj la taleꞌ, as tul nichiꞌan taama tiꞌ u titzꞌin tatzikeꞌ uvaꞌ ni niman u Jesús, as aꞌeꞌ chulin yol, tan asoj yeꞌ xoꞌn u titzꞌin tatzikeꞌ ste uvaꞌ naꞌl svatz, as ¿aꞌ kol chit u Tiixheꞌ qꞌa la ixoꞌni uvaꞌ yeꞌ naꞌl svatz?
21 As kunimataj u tzaqꞌiteꞌ uvaꞌ tzꞌibꞌamal kan uvaꞌ ech ni tal ileꞌ: Abꞌil uvaꞌ xoꞌn u Tiixheꞌ ste, as xoꞌneꞌ unqꞌa titzꞌin tatzikeꞌ ste unpajte.
<- 1 XHUN 31 XHUN 5 ->