1 Wuane lalu, Juta yamena kanjole tupa pitaka ika loto, Jisasa bala Pailate peteanga andi lo awua peainipia. 2 Pulu, Pailate wenonga akali utupane-mane Jisasa kosimi loto, nanimato ale aima-kola, akali okomane pii mindi loto, namba yakamana kiŋi Mesaya lene oko ateyo-ko. Yakamato takisa muni tupa Lomo tane gapomane akali kawane Sisa oko maulaini lalane. Balato Juta yame nanimana mana epene tupa minu koyalane teke leainipia. 3 Wuane leai-kola, Pailateto Jisasa tipa puato, nimba Juta yamena kiŋi okope leaipia. Wuane lea-kola, Jisasato bala lamawuato, nimba tane lele okoni leaipia.
4 Wuane lea-kola, Pailateto wandakali kambua amunguli pua ateaini tupapi, pitisa akali kawane tupapi, utupane lamawuato, nambato akali oko kosimi lolane tene mindi ando mia napeyo leaipia. 5 Wuane lea-kola, wandakali utupane-mane pii taimane wete loto, wamba akali okomane Galili disitiki okona ato tewa mana lamaiyane leainipia. Balato mana lamawua atoto, wandakali tupanga nembo-tene koo minditupa mina ika layawa epoko pua atalu, matili bala Jutiya disitiki okona epeane. Andipa wali epo atoto, balato wuane pua teke ateya leainipia.
6 Wuane leai-kola, Pailateto utupane tipa puato, akali oko bala Galili disitiki tanepe leaipia. Wuane lea-kola, wandakali mindimane Pailatena pii okone yano peyoto, enene, bala Galili tane mindi ateya leaipia. 7 Wuane lea-kola, Pailateto Galili disitiki ando atalane akali kawane Etote okomane Jisasana kote oko ale ape-pene nembo teaipia. Pasopa angi, Etote balapi Jutusaleme tano okona epo atolopeya nembo toto, Pailateto yanda yene minditupa lamawuato, yakamato Jisasa andi lo awua poto, Etote ateyanga pulupa leaipia. *Lk 3:1-2
11 Kosimi leai-kola, Etotepi, balana ami yanda yene ateaini tupapi, utupane-mane Jisasa anda napi loto, lamba leainipia. Lamba loto, utupane-mane tona epene wetete kiŋi-mane piyaini okonetaka mindi balanga piya maiyu, ami yanda yene minditupa lamawuato, yakamato Jisasa andi lo awua poto, Pailate ateyanga peke lalapa leaipia. 12 Wamba Etote, Pailate-la, okonelapo yanda-pene atalapele tekeko, Okone angi, okonelapo liyamba amene gulo atoto, epelewa ateapele-pia.
13 Jisasa bala Pailate ateanga andi lo awua peai-kola, Pailateto pitisa akali kawanepi, Juta yamena akali kawane tupapi, wandakali ongane ateaini tupapi, utupane pitaka epo amunguli piyapa leaipia. 14 Epo amunguli peai-kola, Pailateto utupane lamawuato, wamba yakamato akali oko andi lo awua namba atalo okona ipupia leaipia. Yakama epoto, akali okomane Juta yame wandakali nanimana mana epene tupa minu koyalane lo namba langiyai. Tene okonena, yakamana wenonga nambato pii kambua balanga tipa piyo tekeko, akali oko kosimi lolane tene mindikipi mindi ando mia napiyo oko yakamato andalai okoni.
15 Etotetopi, Jisasa kosimi lolane tene mindi ayia pitete wato, bala nanima ateyamanga peke leakale lala ya oko nanimato andeyama okoni. Akali oko balato koo mindikipi mindi napipiya yako. Tene andokona, nanimato bala peyo ome lamakalepe. 16 Tene koo mindi balanga ya napeya-ko. Ami yanda yene mindimane bala kunju-mane peleakale lokale. Peyola-kola, nambato bala tita lo tepa wakale leaipia.
17-19 Wamba akali Batapasa lene mindimane Jutusaleme gapomane oko yanda pimawuato, akali mindi peyo ome lea-kola, gapomane okomane bala andi leaipia. Wuane tekeko, Pailateto Jisasa tita lo tepa wakale lea-kola, wandakali amunguli pua ateaini tupa pitaka-mane pii taimane loto, Batapasa tita lo tepa alu, Jisasa andi lo awua poto, ita malamanda okona peyo yuka aa leainipia. 20 Utupane-mane wuane leaini tekeko, Pailateto Jisasa tita lo tepa wakale nembo toto, pii wamba leane okone teke dee lapone lolo-peke leaipia. 21 Wuane lea-kola, wandakali ateaini tupamane pii taimane latawa yapo wato, Jisasa ita malamanda okona peyo yuka aa laka peainipia.
22 Wuane laka peai-kola, ole tepone gulo Pailateto wandakali utupane lamawuato, balato mana koo andoko minapia-kola, nambato bala ita malamanda okona peyo yuka wakalepe leaipia. Akali oko peyo ome lolane tene mindi nambato ayia pitete wato kondalo. Anu peakale nambato bala peyo ome lokalepe. Ami yanda yene mindimane bala peleakale lokale. Peyola-kola, nambato bala tita lo tepa wakale leaipia. 23 Pailateto wuane lea-kola, wandakali utupane-mane pii taimane wete loto, Jisasa ita malanda okona peyo yuka aa leaini okonemane Pailatena pii leane okone ango yaepia.
24-25 Ango yai-kola, Pailateto utupanena pii okone wato minukale nembo teaipia. Wamba Batapasato gapomane oko yanda pimawuato, akali mindi peyo ome leane tekeko, Pailateto Juta yamena pii wato minuto, akali okone tita lo tepa yaepia. Wuane piyu, Pailateto Juta yamena pii wato minuto, Jisasa ita malamanda okona peya yuka alapa loto, ami yanda yene tupanga mayaepia.
26 Ami yanda yene tupamane Jisasa bala ita malamanda okona peyo yuka oyale, bala atu Jutusaleme tepa alu, peainipia. Peai-kola, Saitini tano okona tane akali Saimone lene mindi Jutusaleme epoyale epea-kola, asininga malanda yainipia. Malanda wato, ita malamanda Jisasato awua epeane okone Saimoneto aiyakale lo, ami yanda yene tupamane Saimonena paiyanenga mo ayia yainipia. Mo ayia yai-kola, Saimoneto ita malamanda okone aiyu, Jisasa pea okona masianenga watama peaipia. 27 Wandakali kambua Jisasana masianenga watama peaini utupanena wanda kambua-mane ondo wato, ai andane lo yamataka lama peainipia.
28-31 Wanda utupane-mane ai andane lo yamataka lama watama epeai-kola, Jisasato anda-peke loto, wanda utupane lamawuato, namba dini epene lialane ita saka gulo ateyo-kola, kenda-pene andane okone nambanga epeya leaipia. Jutusaleme tane wandakali yakama dini liya napiyane ita kapu gulo ateyai-kola, kenda-pene anu-pene mindi yakamanga epolopeya yape. Matili yanda-pene akali tupamane Jutusaleme tano oko minu koyolo epola-angi, kenda-pene andane wete mindi yakamanga epolopeya. Okone angi, wandakali-mane pii mindi loto, andopane-mane andu nanola-kola, wanda pitulai tupapi, wanda andopane mandi napene pitulai tupapi, wanda kinambuli pitulai tupapi, utupane palaka pupe-pene pitete naolo-peyama nembo toto, epele ape-pene lolopeyai. Kenda-pene andane okone epola-angi, Jutusaleme tane wandakali tupamane ati peleya tupa lamawuato, yakamato lopayia epoto, nanima peyo pulu piyapa lolopeyai. Utupane-mane wangiane peleya tupa lamawuato, inyu epoto, nanima peyo ombo alapa lolo-peyaiko. Jutusaleme tane wanda yame yakamato namba ondo wato, ai na-lalapape. Yakama tanepi, yakamana andopanepi, utupane ondo wato, ai lalapa. Jisasato wuane leaipia. *Lk 21:23-24; Ose 10:8; Lap 6:16-17
32 Okone angi, koo piyapele akali lapo Jisasa mandaka ita malamanda laponga peyo yuka oyale, ami yanda yene tupamane akali okonelapo andi lo awua peainipia. 33 Utupane-mane yuu kawane kulini lene okona peakaiyu loto, Jisasa bala ita malamanda mindina peyo yuka yainipia. Wuane piyu, utupane-mane koo piyapele akali okone-lapona mindi Jisasana kii tikasa ita malamanda mindina peyo yuka alu, mindoko balana kii koyasa ita malamanda mindina peyo yuka alu peainipia.
34 Utupane-mane Jisasa ita malamanda okona peyo yuka yai-kola, balato pote loto, wandakali utupa-mane namba api ateyape nembo natene ato, namba peyo yuka eyai okonena, Ayiane Gote nimbato wandakali utupana mana koo oko apia-maipe leaipia. Okone angi, ami yanda yene tupamane Jisasana tona mindiki-mindiki lo mia-makale loto, laki leainipia. *Ais 53:12; Sam 22:18
35 Okone angi, wandakali ongane ateaini tupamane andatawa ateai-kola, Juta yamena akali kawane tupamane Jisasa lamba loto, balato wandakali waka tupa moyalae piako. Goteto bala Mesaya oko ateakale lea yando, bala tane katulo taputi pua meakale leainipia. *Sam 22:7-8
36-38 Wamba Jisasa bala peyo yuka yaini okone angi, akali mindimane akali oko bala Juta yamena kiŋi oko ateya lo pepa peyalu, Jisasana ita malamanda okona kawanenga yuka yaepia. Matili ami yanda yene tupamane mandaka epoto, pepa okone dii lo andoto, Jisasa lamba loto, nimba Juta yamena kiŋi ateendo, nimbato nimba tane molo-peke lape leainipia. Wuane lalu, utupane-mane bala tipa puato, nimbato ipa waene kaa-pene pinika lene oko nolape leainipia. *Sam 69:21 39 Koo piyapele akali lapo peyo yuka atane ateapele okone-lapona mindimane Jisasa lamba loto, nimba Mesaya oko ateendo, nimba tane taputi pua mialu, nalipapi taputi pua miape leaipia.
40-41 Wuane lea-kola, koo piyapele akali mindoko-mane bala laiya loto, nimbato Gote yuku naene, wuane lelepe leaipia. Nalipato mana koo minalapele tupana yole koo meyapa oko miape-pene teke meyapa-ko. Akali okomane koo mindikipi mindi napipia-kola, Goteto kenda-pene nalipa geya okopene teke balanga mee maiya leaipia. 42 Wuane lalu, balato Jisasa lamawuato, Jisasa, nimba kiŋi gulole-angi, nimbato namba nembo tolo-peke lape leaipia. 43 Wuane lea-kola, Jisasato bala lamawuato, nambato pii enene wete mindi nimba langeyo. Andipa teke nimba namba towa atu Patandaisa yuu epene okona atolo-peyapa leaipia.
44-46 Otonga oto kulini okona nai oko undupi loto, yuu tupa pitaka undupi lamangua atane angu atama peaipia. Matili ole-lene siti kiloko lea wete, Jisasato pii taimane loto, Aiyane Gote, nambana tandini oko nimbana kii tokonga yata eyo lalu, omeaipia. Omea-kola, lotu anda andane okona lapa-lapa andane yuka atane ateane oko kawanenga ato tewa, atutu kao lo lapo pea-kola, yuu oko tii pulu-peke leaipia. *Lk 8:1-3
47 Mangene andane peane utupane pitaka andoto, ami yanda yene ando atalane akali okomane Gotena gene oko laiyu loto, enene wete, akali oko bala akali tika-pene epene wetete mindi atalaeya leaipia. 48 Wamba ami yanda yene tupamane Jisasa peyo yuka olo peaini okone angi, wandakali kambua-mane andolo peainipia. 49 Okone angi, Jisasa towa epelewa atene wandakali tupapi, Galili disitiki okona atalu, Jisasa watama epeaini wanda tupapi, utupane pitaka amonga-yale atoto, mangene utupane andatawa ateainipia.
50-51 Wamba Jutiya disitiki tano Atimatiya okona tane Josepe lene mindi balana yuu tene okone tepa alu epoto, Jutusaleme tano okona ateaipia. Balato mana epene tika-pene tupa minu atoto, Goteto wandakali tupa ando atolo epeakale lo maliyo ateaipia. Bala Juta yamena kanjole okona ateane tekeko, kanjole okonena akali waka tupamane Jisasa omeakale leai-kola, balato utupanena pii leaini tupapi, mana mineaini tupapi, utupane atu yalua naleaipia.
52-54 Juta yame wandakali tupamane anate-lene Sambasa oto oko andamakale nembo toto, pitaka taka wamba ini mandeke piyaini oto oko epea-kola, Jisasa omeaipia. Sambasa oko wamba mandaka epea-kola, Josepe bala Pailate ateanga poto, Jisasana umbaini oko namba gulape lo tee lea-kola, Pailateto atu yalua leaipia. Wuane lea-kola, Josepeto Jisasana umbaini oko ondo yuunga tepa wato, lapa-lapa epene wete mindimane yake pua ombo wato, awua peaipia. Wamba akali minditupa-mane wandakali mali pulane panda wenene mindi ana ati mindina kua peaini tekeko, okonena wamba wandakali mindi mali napeainipia. Josepeto Jisasana umbaini oko awua poto, mali okonena yata yaepia.
55 Wamba wanda minditupa Galili disitiki okona atoto, Jisasa watama epoto, Jutusaleme epeainipia. Matili Josepeto Jisasa mali pulu pea-angi, wanda utupane-mane watama poto, Jisasana umbaini oko wua pua yata ya lo andeaini-pia. 56 Andalu, wanda utupane yakama Jutusaleme peke loto, matili wele tunduma-pene tupa Jisasana umbaininga ayia olo makale nembo toto, wele utupane mo mandeke peainipia. Mandeke piyu, loo oko wato minuto, Sambasa angi utupane yakama mee oto mo peteaini-pia. *Ek 20:10; Lo 5:14
<- Luku 22Luku 24 ->