1 Wandakali mindimane bala tanena gene oko laiyu lalane mana okonemane wandakali mindi moya napiyane tekeko, namba tanena gene oko laiyu lape-pene guleya. Wuaneko, wamba namba limu tale-tale gulo andewa-kola, Akali Andane okomane balana pii too pitane yene minditupa nambanga andawa leane loto, namba tanena gene oko laiyu lokale. 2-4 Wamba namba limu tale-tale gulo andewa-kola, Goteto Kitisene akali mindi lamo atu ati kenga wetete yuu epene Patandaisa lene okona pulu, peke lea. Andipa mali ingasa peya-kola, ateyama. Akali okone ati kenga umbaini ata-pata pulu-peke leape, pee, umbaini yakale, tandini angu pulu-peke leape lo nambato nembo nateyo. Goteto andeya. Akali okone ati kenga pea-angi, balato pii mindi ale yane tekeko, Goteto bala lamawuato, nimbato pii okone wandakali mindikipi mindi lamai napipe lea. Wuane lea-kola, akali okonemane pii okone wandakali waka mindikipi mindi katulo lamai napea. Jia.

5 Nambato akali okonena gene oko laiyu lokale tekeko, namba tane akali okone ateyo loto, namba tanena gene oko na-lokale. Jia. Namba akali tai nalene mindi ateyo loto, namba tanena gene oko laiyu lokale. 6 Namba ati kenga pulu, peke lewane lo namba tanena gene oko laiyu lauwa-yale, wandakali-mane bala kee wato, mee leya nembo natape-pene. Jia. Nambato wuane pewane lo pii enene leyo tekeko, yakamato nambana mana tupa andoto, nambana pii ale alaini. Yakamato utupane angu yapa lo tale puato, namba akali anu-pene mindi ateyape andalapale nembo teyo. Tene okonena, nambato pii waka minditupa tako puato, namba tanena gene oko laiyu na-lokale.

7 Wamba Goteto namba angu ati kenga lamo atu poto, minditaka epene wete kambua nambanga andawa lea-kola, nambato wandakali waka tupa sia minalawane nembo tauwa-yale tekeko, nambato wuane nembo tolane nayuto, Goteto longai gulene mindi nambana umbaininga pale lea. Minditaka tandaka-pene okone Satanena piape akali gulo yoto, ole dindi lo kenda-pene minditupa namba geakale lo Goteto ando konda ya. *Jop 2:6

8 Wuane pea-kola, Akali Andane okomane kenda-pene nambanga epeane okone mo apeakale loto, ole tepoainga nambato pote lewa. 9 Pote lewa-kola, Akali Andane okomane namba languato, wandakali mindi tai nalene ateya-angi, nambato bala moyoyale piape taimane peyo-kola, wandakali-mane nambana tai-lene oko kuai lo andalaini. Nambato nimba ondowa moyolowa-kola, nimbato kenda-pene okone katulo awua atolopele lea. Wuane lea-kola, Kataisato namba minu tai layawa ateakale nembo toto, namba epele wato, namba tai nalene atalawane lo namba tanena gene oko laiyu lokale. *Pl 4:11-13

10 Nambato Kataisana piape oko pua ateyo-angi, wandakali-mane namba andayo pii koo loto, kenda-pene andane tupa namba giki peyai-kola, namba kenda-pene kambua awuato, tai nalene gulo atalawane. Kenda-pene waka tupa nambanga epalane tekeko, namba tai nalene ateyo-angi, Goteto namba minu tai laya eya-kola namba tai-lene gulo atalawane. Tene okonena, kenda-pene utupane nambanga epeyai-angi, nambato okone katu ya lo nembo talawane.

11-12 Wamba namba yakama towa atu atema-angi, nambato kenda-pene awua atoto teke, kepa naene, Gotena piape oko pua atewa lo yakama andawa loyale, nambato metekolo piape waka-waka kambua pewa okoni. Wuane pewane okomane, namba aposolo akali enene mindi ateyo lo nambato yakama andawa lewa okoni. Enene, namba akali gene yene mindi ata napeyo tekeko, nambato owato aposolo akali ateyai tupana napinga ata napeyo. Jia. Nambato utupane sia minuto, Gotena piape oko kuai lo piyawane. Yakamato wuane nembo toto, nambana gene oko laiyu lapiai-yale, okone katu lapia-yale tekeko, yakamato nambana gene oko laiyu naleai. Tene okonena, namba akali nembo napalene gulo atoto, namba tanena gene oko laiyu leyo. *2Ko 11:5; Lom 15:17-19

13 Wamba namba sosa waka tupa towa atu atoto, nambanga minditaka jia ya-kola, nambato utupane lamawuato, yakamato minditaka namba geakale lewa. Wuane tekeko, nambato Kotini tane wandakali yakama towa atu atoto, minditaka jia ya-kola, atewa-angi, yakamato minditaka namba giyapa nalewa. Yakamato minditaka giyapa nalewa okone mana koo mindi miniwae yando, yakamato nambana mana koo okone apia-giyapape. Amunguli pitane waka tupa towa mana waka wato minewane tupa pitaka nambato Kotini tane wandakali yakama towa wato minewa-kola, yakama utupanena napinga ata napeyai. *2Ko 11:7-9

14 Wamba ini bulupane namba epoto, Gotena pii layene epene oko yakama langewa mambele, andipa namba Kotini tane Kitisene yakamana ayiane gulo ateyo. Andopane aŋako tupamane yakamana angini, ayiane-la, okonelapo moyoyale, minditaka pitaka mai napepe-pene. Jia. Angini, ayiane-la, okonelapo-mane liyambana andopane aŋako tupa moyoyale, minditaka maipe-pene. Wuaneko, andipa nambato yakama ole tepone gulo andolo epoyale mandeke pua ateyo tekeko, yakamato minditaka mindi namba giyapale loto, nambato kenda-pene mindi yakama gii napukale. Jia. Nambato yakamana minditaka mindi mokale nembo nateyo. Jia. Nambato yakama Gotena wandakali tupa atalapale nembo teyo.

15 Tene okonena, nambato yakama moyoyale piape pua atolowa-kola, nambana minditaka eya tupa pitaka koyo peandopi, namba omewandopi, namba epele olo-peyawa. Nambato yakama towa wayumane epelewa yamapane yalawane mana okomane yakamato namba towa mee teke epelewa yamapane yo atalapale laya alaepe. 16 Anu peakale yakamato namba towa wayumane epelewa yamapane yo ata napeyaipe. Yakamana minditupa-mane pii mindi loto, enene, Poloto nanimana minditaka mindi panakame mia napeane tekeko, balato nanima minakasa wato, nanimana minditaka mindi mea yalua lalaini.

17 Enene, nambato akali minditupa yakama ateainga epeakale lewa tekeko, akali utupanena mindikipi mindimane yakama minakasa wato, yakamana minditaka mindi meakale lo nambato lamai napewa. Jia. 18 Nambato Taitasa-la, Kitisene amene mindoko-la, okonelapo yakama ateainga epeakale lewa tekeko, Taitasato yakama minakasa wato, yakamana minditaka mindi mia napea. Jia. Taitasa, nalipa nembo mindiki palu atoto, mana epene mindiki okone teke wato minalapale. *2Ko 8:6,16-21

19 Koo tene minditupa nanimanga eya-kola teke, nanimato mana koo mindi mina napema loto, pii utupa pitaka pepanga peyo epe leyai nembo teyaipe. Yakamato wuane nembo natape-pene. Jia. Yamapane yene yame, nanima Kataisana piape akali tupa ateyama okoni. Wuaneko, Gotena wenonga, nanima yakamana bilipi oko minu tai laya oyale, pii utupa pitaka yakamana pepa okona peyo epe leyama.

20-21 Wamba Kotini tane wandakali yakamana kambua-mane mana koo minditupa minaima lakae lo nembo toto, pamuku puato, mana koo kalato atene waka-waka tupa minu ateai okoni. Matili namba pai pua teke yakama ateyainga epolowa-angi, yakamato yamapane peke nalene, mana koo utupane minu ateaini yando, namba ai lolo-peyawa. Yakamato mana koo utupane minu ateaindo, Goteto namba languato, nimbato wandakali utupanena mana koo tupa mo tika napeene ya okonde lola-kola, namba yakamana wenonga atoto, yala olowane lo yuku piyua. Dee, namba pai pua teke epolowa-angi, yakamato mana kuai-lene tupa wato mina napene, wandakali waka tupa towa apiangu pua ateaindopi, yakama tane angu nembo toto, yataka wato, pii yanda pua ateaindopi, yakama tane gene yene ateyama nembo teaindopi, wandakali waka tupa laya-geaindopi, tipu-tipu leaindopi, nambato yakamana mana koo utupane embo olo-peyawa. Embo wato, nambato mangene mindi puluwa-kola, yakamato nambana mangene okone embo olaini lo namba yuku piyua. Yakamato wuane pulaini lo yuku wato, nanimato pii utupa pitaka yakamana pepa okona peyo epe leyama. *2Ko 13:1-4

<- 2 Kotini 112 Kotini 13 ->