1 Idaydayawyo ni Yahweh. Idaydayawyo ni Yahweh, dakayo nga adda kadagiti langit; idaydayawyo isuna, dakayo nga adda iti nangato a disso. 2 Idaydayawyo isuna, dakayo amin nga anghelna; idaydayawyo isuna, dakayo amin nga armada ti anghelna. 3 Idaydayawyo isuna, init ken bulan; idaydayawyo isuna, dakayo amin nga agranraniag a bituen. 4 Idaydayawyo isuna, dakayo a kangangatoan a langit ken dakayo a dandanum nga adda iti ngatoen ti tangatang. 5 Idaydayawda koma ti nagan ni Yahweh, ta nagbilin isuna, ket naparsuada. 6 Impasdekna pay ida iti agnanayon ken awan patinggana; nangted isuna iti pangngeddeng a saanto a pulos nga agbaliw. 7 Kadagiti adda iti rabaw ti daga, idaydayawyo ni Yahweh, dakayo a parsua iti baybay ken amin a mangliwengliweng a taaw, 8 apuy ken uraro, niebe ken ulep, napigsa nga angin nga agtungtungpal iti saona. 9 banbantay ken amin a turod, kaykayo nga agbunga ken amin a cedar, 10 naaatap ken naaamo nga ayup, agkarkarayam a parsua ken tumatayab. 11 ar-ari iti daga, ken amin a nasion, dagiti prinsipe ken amin nga agturturay iti daga, 12 agtutubo a lallaki ken agtutubo a babbai, dagiti nataengan ken ubbing. 13 Idaydayawda amin ti nagan ni Yahweh, ta ti laeng naganna ti natan-ok ken ringbawan ti dayagna ti daga ken dagiti langit. 14 Intag-ayna ti sara dagiti tattaona tapno idaydayaw isuna amin dagiti napudno kenkuana, dagiti Israelita, dagiti tattao a naasideg kenkuana. Idaydayawyo ni Yahweh.

<- Dagiti Salmo 147Dagiti Salmo 149 ->