1 Agyamankayo kenni Yahweh, umawagkayo iti naganna; ipakaammoyo dagiti aramidna kadagiti nasion. 2 Kantaanyo isuna, agkantakayo iti panagdaydayaw kenkuana; iyebkasyo dagiti nakaskasdaaw nga aramidna. 3 Agpannakkelkayo iti nasantoan a naganna; agrag-o koma dagiti puso dagiti mangsapsapul kenni Yahweh. 4 Sapulenyo ni Yahweh ken ti pigsana; agtultuloy a sapulenyo ti presensiana. 5 Lagipenyo dagiti nakaskasdaaw a banbanag nga inaramidna, dagiti milagrona ken dagiti pangngeddeng manipud iti ngiwatna, 6 dakayo a kaputotan ni Abraham nga adipenna, dakayo a tattao ni Jacob a pinilina. 7 Isuna ni Yahweh a Diostayo. Adda iti entero a daga dagiti pangeddengna. 8 Laglagipenna iti agnanayon ti tulagna, ti sao nga imbilinna para iti rinibribu a kaputotan. 9 Laglagipenna ti tulagna kenni Abraham ken ti sapatana kenni Isaac. 10 Daytoy ti pinasingkedanna kenni Jacob a kas alagaden ken iti Israel a kas agnanayon a tulagna. 11 Kinunana, “Itedkonto kenka ti daga ti Canaan a pannakatawidmo.” 12 Imbagana daytoy idi bassit pay ti bilangda, bassitda unay, ken gangannaetda iti daga. 13 Nagakar-akarda kadagiti nadumaduma a nasion ken kadagiti nadumaduma a pagarian. 14 Saanna nga impalubos a parigaten ida ti siasinoman; binabalawna dagiti ari gapu kadakuada. 15 Kinunana, “Saanyo a sagiden dagiti pinulotak ken saanyo a dangran dagiti propetak.” 16 Nangiyeg isuna iti panagbisin iti daga; pinasardengna ti entero a pagtaudan ti tinapay. 17 Nangibaon isuna iti tao nga ummuna kadakuada; nailako ni Jose a kas maysa nga adipen. 18 Naposasan dagiti sakana; nakawaran isuna 19 agingga iti tiempo a pimmudno ti impadtona. Pinaneknekan ti sao ni Yahweh a nalinteg isuna. 20 Nangibaon ti ari kadagiti adipen a mangwaya-waya kenkuana; winayawayaan isuna ti mangiturturay kadagiti tattao. 21 Pinagbalinna isuna a mangimaton iti balayna kas mangituray kadagiti sanikuana 22 tapno mangisuro kadagiti prinsipena segun iti pagayatanna ken tapno mangisuro iti kinasirib kadagiti panglakayenna. 23 Ket dimteng ni Israel iti Egipto, ket nagnaed ni Jacob iti apagbiit a tiempo iti daga ni Ham. 24 Pinaadu ti Dios dagiti tattaona iti kasta unay ken pinaaduna ti bilangda ngem kadagiti kabusorda. 25 Pinataudna ti gura dagiti kabusorda kadagiti tattaona, tapno pagaramidanda ti saan a nasayaat dagiti adipenna. 26 Imbaonna ti adipenna a ni Moises ken ni Aaron a pinilina. 27 Impakitada dagiti pagilasinanna kadagiti Egipcio, dagiti nakakaskasdaaw nga aramidna idiay daga ni Ham. 28 Nangiyeg isuna iti kinasipnget ket pinasipngetna dayta a daga, ngem saan a nagtulnog dagiti tattao iti dayta a daga kadagiti bilinna. 29 Pinagbalinna a dara dagiti danumda ket natay dagiti lamesda. 30 Napno iti nakaad-adu a tukak ti dagada, uray kadagiti siled dagiti mangiturturayda. 31 Nagsao isuna, ket nagsaknap ti pangen ti ngilaw ken timel iti entero a pagilianda. 32 Nangiyeg isuna iti uraro ken tudo, a napakuyogan iti gurruod ken kimat iti dagada. 33 Dinadaelna dagiti ubas ken igosda; tinuangna dagiti kaykayo ti pagilianda. 34 Nagsao isuna ket immay dagiti nakaad-adu a dudon. 35 Kinnanda dagiti amin a mula iti dagada; Kinnanda amin a maapit iti daga. 36 Pinapatayna amin nga inauna nga anak a lalaki iti dagada, dagiti ummuna a bunga ti pigsada. 37 Inruarna dagiti Israelita nga addaan iti pirak ken balitok; awan kadagiti tribuna iti napasag iti dalan. 38 Naragsakan ti Egipto idi pimmanawda ta nagbuteng dagiti Egipcio kadakuada. 39 Nangiwaras isuna iti ulep a linong ken nanggangat iti apuy a manglawag iti rabii. 40 Nagdawat dagiti Israelita iti taraon, ket nangiyeg isuna iti pugo ket pinennekna ida iti tinapay manipud langit. 41 Pinagrengngatna ti bato ket pimsuak ti danum manipud iti daytoy, nagayus dagitoy idiay let-ang a kasla karayan. 42 Ta linagipna dagiti nasantoan a karina nga inkarina iti adipenna a ni Abraham. 43 Inruarna dagiti tattaona nga addaan iti rag-o, ti pinilina nga addaan iti panagpukkaw gapu iti balligi. 44 Intedna kadakuda dagiti daga dagiti nasion; tinagikuada ti kinabaknang dagiti tattao 45 tapno salimetmetanda dagiti alagadenna ken tungpalenda dagiti lintegna. Idaydayawyo ni Yahweh.

<- Dagiti Salmo 104Dagiti Salmo 106 ->