Okpume 19

1 Nga nhne ele ka whemernu, m nụrnu m nhne nụ lele okne nkọli igbudu badnụ n'oligwe, naakaa,

“Aleluya,

ọznohia, nụ igwugwu nụ rikne bụ ke Chiokike aị,

2 kwnornu nụ ikpe a bụru ọma nụ ezi ọka,

ọ marnụ nwerinya okne ewhere wam ikpe

nye jiri ome ọyi a meru ọwa,

o megwnahịalam ọvnarna ele nsọ a n'aka a.”

3 Berere kwno be siwama, kaa,

“Aleluya,

rụnwurnu bẹkwnu a naala olu dụ ọkwnukokwnu.”

4 Ele okno badnụ nri lawụru nụ ẹno nụ nhne ẹno wam zị bụdnu wam dna n'ẹli kpọ risi ẹli nụ ruwhnu Chiokike nye dazị nụ ngadna eze. Be kaa,

“Amịm, Aleluya.”

Ọlulu nnwerne
ke Nnwọ Atnụrnu

5 Otu nkọli hiri nụ ngadna eze wam whụya kaa,

“Znarnị Chiokike aị,

anụ ele izi a,

anụ ele nọotu ogwnu a,

ma nye matị ma nye kwu.”

6 M nụrnu m nhne nụ lele nkọli igbudu badnụ lele ọdidna agịda mini, lele okne egbe oligwe, naakaa,

“Aleluya,

Nyenwe aị Chiokike ke Meli Nhne Dum nẹechi.

7 Ngwa ma a nwụdna, ovu sọ aị n'ọnu,

a nyee a igwugwu,

kwnornu nụ ọlulu nnwerne ke Nnwọ Atnụrnu wam valẹm,

nnwerne a jiknernunem ẹhni a.

8 Be nyernu nnwerne a iwo abọchna, zị rịchna, noonwu onwu va-a-a, o woru.”

(Iwo abọchna wam bụ ome mma ke ele nsọ.)

9 Enine izi wam kanụ m, “Gba n'ọkwukwo, ‘Ngọzi zịnu nye ọbula be sukwuru va n'iriri ọlulu nnwerne Nnwọ Atnụrnu wam.’ ” Ọ kaa kwno, “Ikwu-ọnu ka bụ ezi ọka Chiokike.”

10 M dna n'ẹli n'ọchi enine izi wam ma m kpọnu m a risi ẹli, kọvu ọ kanụ m, “I mée kpam, m bụ m nye izi ibne i nụ ke rụmu nda ị ele berere bụ ele ji akebne Jizọsi. Kpọnu Chiokike risi ẹli. Kwnornu nụ akebne Jizọsi gbarụ bụ enine ọwhnurninya.”[a]

Nye naagba
ịyinya abọchna

11 M whnụrnu m oligwe kpumernu nụ otu ịyinya abọchna, rẹwhna nye zị n'olu a bụ Nye Ọkwnata Ovu nụ Nye Ezi Ọka. O ji ikpe bụru ọma neekpe ikpe, nọolu ọgwnu. 12 Anya a lawụru nụ lele riro bẹkwnu, o kpu agịda okpu-eze nụ risi a. O nwernu rẹwhna be gbakwasịri a ke ọ zá nye magwụ, okwolem ya magwụ nhne ọ bụ. 13 Iwo o wogwu bụ ke be tụruru n'ọvnarna, be noosukwu a Ikwu-Ọnu Chiokike. 14 Ele ọgwnu ke oligwe sno a n'aznụ n'olu ịyinya abọchna woru iwo abọchna marnụ mma. 15 Ama-ọgwnu zị bụko hi n'ọnu a nọowhuya, ke o ji neemegbu kpakara mba. “O jeeji mkpara rugwe nẹechi be.”[b] Ọ nọozosna manya ke okne ovu owe ẹhni Chiokike ke Meli Nhne Dum. 16 Be gbakwasịri n'olu iwo a ma nụ ọchi a rẹwhna,

“EZE KAKWO ELE EZE NỤ

NYENWE KAKWO ELE NWE.”

17 M whnụ otu enine izi gwuzo n'ẹhnam, o ji okne nkọli si okokoba, kanụ kpakara ọnunu oligwe, “Anụ va gbakọ n'okne iriri Chiokike. 18 Anụ va ri anọ-ẹhni ele eze, nụ ke ele risi ọgwnu, nụ ke ele dikne, nụ ke ịyinya nụ ke ele gba be, nụ anọ-ẹhni kpakara ele badnụ, ma ọhi nụ ke ele bụ́o ọhi, nye kwu nụ nye matị.”

19 M whnụ anọhia wam nụ ele eze ke ọwa nụ ele ọgwnu be gbakọru n'otu ma be lụsi nye wam dazị n'olu ịyinya ọgwnu ya nụ ele ọgwnu a. 20 Kọvu be nwudnernu anọhia wam ya nụ nye ọwhnurninya aghalaghala wam nye rnụrnu ẹrnu ndu-ẹhni wam nụ ruwhnu a, nye ji ẹrnu ndu-ẹhni wam rnawhu ele nwernu akara anọhia wam nụ ele kpọnnu igbudu anọhia wam risi ẹli. Anọhia wam nụ nye ọwhnurninya aghalaghala wam, be tụbna be nụ bụdnu nụ rime olulu bẹkwnu ji rugwu bẹkwnu neerne. 21 Be ji ama-ọgwnu neehi n'ọnu nye wam dazị n'olu ịyinya wam gbu kpakara ele ọgwnu be, ọnunu oligwe rijiri rụwho hite n'anọ-ẹhni be.

<- Okpume 18 Okpume 20 ->