1 Nga nhne ka mekworu, m whnụrnu m enine izi berere hi n'oligwe neehidna, o nwernu okne iknernema, ogbu marna marna ruwhnu a neenye iwhne n'ọwa. 2 O gweru okne nkọli siwama, kaa,
“Ọ dnanam, okne Babịloni dnanam,
ọ ghọlam hne rụmu rẹnwu ọjo wu,
ọro ikelu kpakara rẹnwu zị́la rịchna,
kpakara ọnunu ọjo ke be rí eri zị nụ rime a.
3 Kwnornu nụ kpakara mba
nwọrnu manya okne ome ọyi a,
ele eze ke ọwa snornu a mee ọyi,
ele nọozu ahịa ke ọwa barụ eze hite nụ okne ewhere a.”
4 M nụ kwno okne nkọli hi n'oligwe kaa,
“Ele ke m, anụ hi n'esilawụru a whụya,
ọ zị anụ snornu a kehịa igwe nụ mmehie a,
ọ zị anụ snornu a ta awhnụwhnu.
5 Kwnornu nụ mmehie a gwuzo dụ oligwe,
Chiokike chenwanyalam kpakara mmehie a.
6 Anụ mesno a lele kpa o mernu anụ,
anụ mesno a mgba lawụru kpa o mernu,
okiko ọ gbajiri, anụ gbajite a mgba lawụru ma ọ nwọrnu.
7 Anụ ta a awhnụwhnu nụ anya-mini
lele kpa o nyernu ẹhni a igwugwu nụ ẹgwnurnu ọjo a,
kwnornu nụ ọ karụ nụ mkpọma a,
‘M bụ m eze nyerinya, m bụ́la m nnwerne nwée nzi,
m jáagba mkpe.’
8 Kam kpayarụ, n'otu ọbochi, ọ jọowhnuji anya,
ẹnwu, mkpe, nụ ọknunyo,
bẹkwnu jeernegbu a,
kwnornu nụ Nyenwe aị Chiokike ke neekpe a ikpe bụ dikne.
9 “Nga ele eze ke ọwa ele snornu a mee ọyi, n'ẹgwnurnu ọjo a, jọowhnu rụnwurnu bẹkwnu a, be jaakwna ẹkwna, gbanụ a mkpe. 10 Be joogwuzo nụ hne zị ikere kwnornu ogwnu awhnụwhnu a, kaa,
‘Chei, chei, okne ẹli-ọhna,
Babịloni, bụ dikne,
Chiokike tarụ ị awhnụwhnu n'otu ọtnu-ige.’
11 “Ele nọozu ahịa ke ọwa jaakwanụ a ẹkwna, gbanụ a mkpe, kwnornu nụ ọ zá nye nọozu kwno mgwna ahịa be berere. 12 Be bụ ele nọozu ahịa golu, siliva, rugwu okne ọnu ahịa, palị, iwo marnụ mma, iwo naachna odno odno, siliki nụ iwo naachna ihie ihie, isisi ọbula, nhne ọbula be jiri ize eni kpu, nhne ọbula be jiri isisi zị okne ọnu ahịa pnịo, ọla, rugwe, rugwu mabulu, 13 nụ sinamọni, nụ nhne nwernu ẹknarna, isensi, maa, franki-isensi, nụ manya, nụ mọno olivu, nụ ịkpa nụ wheti, nụ anọhia, nụ atnụrnu, nụ ịyinya, nụ ọgbo-ẹli ịyinya nọodopnu, nụ ọhi, ma mkpụru ovu badnụ masị.
14 “Be kaa, ‘Nhne i pioru whnunahọru ị, kpakara ẹkwnu ị nụ ebube i whuru etekne, i jéenwe kwno be berere.’ 15 Ele nọozu ahịa, ele barụ eze kwnornu nụ be neere nhne ka, joogwuzo nụ hne zị ikere, ogwnu nọotu be kwnornu awhnụwhnu a, be naakwna ẹkwna, gba masị mkpe. 16 Be jeesiwama okokoba, kaa,
‘Chei, chei, ẹli-ọhna kwu,
ke jiri iwo marnụ mma odno odno nụ ihie ihie,
nụ golu noogbu marna marna, nụ akaworugwu okne ọnu ahịa nụ palị mee ẹhni a mma.
“Kpakara ele nọokwo ọgbo mini nụ ele ji ọgbo mini neezne, nụ ele ẹrnu mini, nụ kpakara ele nhne be jiri wuru bụdnu hi nụ mini whụya, joogwuzo nụ hne zị ikere. 18 Nga be jọowhnu rụnwurnu bẹkwnu a, be jaakaa, ‘Ọ zị ẹli ke nụ lele okne ẹli-ọhna ka?’ 19 Be jọowukwasi rẹtnu nụ risi be, kwna ẹkwna, gba mkpe, kaa,
‘Chei, chei, okne ẹli-ọhna,
hne kpakara ele nwernu ọgbo mini
barụ eze hite n'ẹkwnu a,
n'otu ọtnu-ige hne ọ kọ tụbiri etekne.
20 Ovu sọ ị n'ọnu, sụ oligwe,
ele nsọ nụ ele izi nụ ele ọwhnurninya snornu anụ nwụdna,
Chiokike kperu a ikpe kwnornu nhne o mernu anụ.’ ”
21 Otu enine izi gbasịri rikne gweru otu akaworugwu hna lele okne rugwu ogwe wiri tụbna nụ rime osimini, kaa,
“Ọ bụ kpa be jeeji nhne rikne
kwnadna okne ẹli-ọhna Babịloni,
ọ zá nye jọowhnu a berere.
22 Be jọ́onu kwno eri, mọbu ọbo, opi,
mọbu ọkwodu nụ rime i berere,
nye ọbula ke nwernu nka ẹrnu
jáazị nụ rime i berere,
ọ zá nye jọonu ọdidna ogwe wiri
nụ rime i berere.
23 Tọnji jóonwuma
nụ rime i berere,
akpịri nye nọolu nnwerne ikne nụ nye nọogbo nzi ikne,
jáazịma nụ rime i berere,
kwnornu nụ ele nọozu ahịa ị bụ ele dikne ke ọwa,
i jiri amusu i duwhu kpakara mba.
24 Be piohịaru nụ rime a ọvnarna ele ọwhnurninya nụ ọvnarna ele nsọ,
