Link to home pageLanguagesLink to all Bible versions on this site
2
GODNA WAAGAN YA VAT
1 Pentikos walɨnja nandinya yandɨ maa Jisasna mbaapma nɨmba yisolaa lɨndi. 2 Tɨga lɨga nɨma mwuk vla nyɨnangwupmba lɨga yaa kiyandɨ, wutndi. Wan mwuk ndalɨnja ngay wuleindɨ. 3 Nɨmbi ya vla vɨtɨndɨ, kɨta kɨta ndi kat yalɨndɨ, vɨlɨndi. 4 Godna waagan yaa ndinamba tavindɨ maa ndi kapma kwundi ngambundi. Godna waagan ndina maawut ngwandɨndɨ maa ndɨnai waa nyaangɨt kapma kapma kwundimba ngambundi.

5 Wan njɨmbla nɨma sakwat Juda ngepma ngepmamba lɨga Juda yaa lɨndi. Wan Juda God kat yelavɨka lɨndi. Ndina angwa ngepma kwagalalaa Jerusalemat yiga tɨndi. 6 Wundi nɨmba nɨma kak wutaa yaa yisondi. Yisolaa lɨga ngɨpaliga ndandi. Jisasna mbaapma nɨmba kapma kwundi ngambulɨndi maa wutndi. Ndi aywaa ndina angwa kwundimba ngambulɨndi maa wutndi. 7 Wutaa ngɨpaliga ndaga wandi. Wan nɨmba Galilina nɨmba ndi. 8 Manda vapmba nɨna kapma kapma angwa kwundimba wutɨganɨn waa wagalandi. 9-11 Patiamba la nɨmba, Midiamba la nɨmba, Ilamba la nɨmba wutɨndi. Mesopotemia, pontas, Esia, Frisia, pamfilia, Isip, Libiana nat ngepma Sairinimba la Juda ndi, ndina nat nɨmba Juda ana ndi. Juda yeta vapmba yetɨndi. Ndi wutɨndi. Kritmba la nɨmba, Arebiamba la nɨmba aywaa ndina angwa kwundimba God nɨma njɨvwa kwutnda njɨvwa kat wutɨndi. 12 Ndi ngɨpaliga walaa tungwengwan yiga nat nɨmba awat sowat wagalandi. Kan mandana waa wagalandi. 13 Nat nɨmba njɨka wandi. Wan nɨmba nɨma ngu kɨlaa tungwengwan yiga ngambulɨndi maa njɨka wandi nat nɨmba.

PITA WAA NYAANGƗT
14 Njɨka wandi maa Pita nat tambavɨli kiyeli kɨta nɨmbonala tɨga laatndɨ. Laataa wandɨ. Ngwuk Judana nɨmba ngwuk Jerusalemba lɨga nɨmba ngwuk. Ngwuk kat kɨta nyaangɨt mbupmat tɨgowun. 15 wan nɨmba nɨma ngu kɨlaa ana tungwengwan yindi. Kan ngambi. Nɨna ngepmana vak nɨma ngu ana kɨlɨganɨn ngambimba. Vɨlɨgangwuk. 16-17 Wan vɨlaa wukngwa vak tamba la profet Joel wan vak kat pɨlɨwutndɨ.
God wandɨ. Yaiga njɨmbla wuna waagan kwigiyawun
ndinyangu kat. kwiwun maa ngwula nondanyan
taagwanyan wunai waa nyaangɨt mbukiyandi. Ngwula
kwandɨ ndu mandɨt mandɨt nyaangɨt sɨmogwiweya
vak vɨgiyandi. Ngwula avɨt ndu sɨmogwiweya sɨmak
vɨgiyandi.
18 Wuna njɨvwa kwutɨga nɨmba ndu lagwa
ndi kat tavigiyaa waagan ndi kat kwigiyowun.
Tavindɨ maa wunai waa nyaangɨt mbukiyandi.
19 Nyɨnangwupmba kwukweya nda kat vɨlaa ngɨpaliɨga
ndaigandi. Kɨpmamba kwukweya nda kat vɨlaa
ngɨpaliga walaa wan nda God kwutndɨ waa waigandi.
wan kwukweya njɨmbla yelogwen, ya, yagɨmbi
vɨgiyandi.
20 Tat nya kat wowun maa kulun
waigandɨ. Mbak kat wowun maa yelogwen mbangɨ
lɨgiyalɨ. ngɨni njambwi nyan yaiga nandinya
vɨgiyandi. Yandeya nandinya nɨma nandinya. Yandeya
nandinya vaakiyandi.
21 Wan nandinya kɨta nyan
wun njambwi nyan kat wagalandeyan ndɨ kat
kwunakiyowun waa wandi God waa pɨlɨwutndɨ Joel.

22-24 Ngwuk Isrelna nɨmba ngwuk. Ngambuweya nyaangɨt awuk ngwula. Ngwuk kat Nasaretmba la Jisas kat wowun. God wandɨ maa Jisas nɨma njɨvwa kwuka sɨmogwilɨga njɨvwa kwutndɨ. Ngwuk vɨga lɨgangwuk. Vɨlaa ndɨ Godna nyana waa yelavɨkngwuk. Kavle nɨmba Jisas kat vatnyanjangat kwutaa kalindi. yinjeya vak Jisas kat vatnyanjangat kwutaa kalindi. yinjeya vak kat tamba God vɨga lɨndɨ. God ndi kat vɨga ke sɨga waa ana wandɨ. Ngwuk kavle nɨmbat ndɨ kat vatnya wangwuk maa ndɨ kat kaalandi diwai krosmba. Jisas kiyandɨ, God wandɨ maa laatndɨ. Kiyalɨnja vat ndɨ kat ana kematndɨ. Ndɨ kiyalɨnja vak kat kwulatndɨ. 25 Devit ndɨno Jisas waa nyaangɨt pɨlɨwutndɨ.

Njambwi nyan kat vɨlɨgowun. Njɨmbla njɨmbla wuna
ngwaymba lɨgandɨ. Wun kat kwunapmak wuna
yaagindan naangamba laataa lɨgandɨ. Tɨndangat
ana nɨmamba yelavɨkiyowun. 26 Wungi kat tɨga
solat sɨlɨgowun. Apma mbangu kwundi waga solat
sɨlɨgowun. Kiyaga wundumbu yiweyan ana
yelavɨkiywoun. Ngɨni kwo lɨgiyowun. Vɨlɨgowun.
27 God wuna wundumbu kat ana kwagala lɨgiyandɨ
wundumbuna ngepmamba lɨnda kat. God ana kwagala
lɨgiyandɨ wuna sɨm waangumba njangu veindagat.
Wun ndɨna apma nyan wun. 28 Apma vat yetɨweya vak
wun kat sɨmagamɨn. Mɨn kat vɨwangat solat
sɨgiyowun waa Jisas wandɨ.
waa pɨlɨwutndɨ Devit.

29 Yakwa nɨmba, ngwuk kat kɨta nda kat mbupmat tɨgowun. Ana pagwugiyowun. Ndɨ profetna Devit. Ndɨ avla ana pɨlɨwutndɨ. Ndɨ wundumbu yindɨ, waangumba taagandi, lɨgandɨ. Ndɨ kat taaganja kava vɨlɨganɨn. 30 Devit yaiga nat nyan kat pɨlɨwutndɨ. Tamba God Devit kat wandɨ. Mɨna yelangɨ nyan tɨma tɨkɨpmba ndaa mɨna njɨvwa kwupma njɨvwa kwukiyandɨ. Ana woseka wowun maa God wandɨ Devit kat. Devit wuka vɨndɨ. 31 Wungi kat tɨga Kraist kiyalaa laatndeya vak kat Devit pɨlɨwutndɨ. God Kraistna wundumbu ana kwagalandɨ wundumbuna ngepmamba tɨndangat. Ndɨna sɨm ana njangu veindɨ waangumba. 32 God wandɨ maa Jisas laatndɨ. Nɨna mbaapma nɨmba Jisas laatnda vat vɨnɨn. 33 God wandɨ, Jisas nyɨnangwut wokelaa Godna yaaagindan naangamba ndalɨgandɨ. God Jisana sɨ kwusondɨ, yaagindan naangamba lɨgandɨ. Tak God Jisas kat wandɨ. Ndi kat wuna waagan kwigiyowun waa wandɨ God. Mbambala tamba kwindɨ. Vɨngwa vak wuka lɨngwa vat kɨngiyan. 34-35 God Jisas kat waa nyaangɨt Devit tamba pɨlɨwutndɨ.

Wuna yaagindan naangamba ndalɨ. Ndalɨmɨn maa mɨn
kat sɨvat tɨga nɨmba ndi kat kwulakiyowun mɨn
kat tɨga. Kwulakwun maa ndi kat vɨga lɨgiyamɨn
waa wandɨ God
waa pɨlɨwutndɨ Devit. Ndɨ avla ana pɨlɨwutndɨ. Ndɨ nyɨnangwut ana wokendɨ. God ndɨnamba ana wandɨ.

36 Wugi kat tɨga ngwuk Isrelna nɨmba kɨta nyaangɨt wutaayelavɨkiyangwuk. Ngwuk Jisas kat vatnyavat diwai krosmba kaalangwuk. God ndɨna sɨ kwusondɨ. God ndɨ kat wandɨ. Mɨn nɨma nyan mɨn. Mɨn wunai waa nyan mɨn Kraist mɨn waa wandɨ God waa wandɨ Pita.

NƗMA SAKWAT NƗMBA NDINA MBAAPMA WULEINDI
37 Pita waa nyaangɨt kat wutaa ndina maawut viyalɨndɨ, pitaogwi nat aposel kat wagalandi. Yakwa nɨmba, nɨn angamak yigiyanɨn waa wagalandi.

38 Pita ndi kat wandɨ. Kupi maawut asɨk ngwula. Kupi maawut sɨtaa Jisas God waa nyana waa yelavɨtaa ngu yagu ngwula. God ngwutna kavle vat sɨlɨmbwigiyandɨ. God kwiya waagan klaigangwuk. 39 Tamba God ngwuk kat kwivat wandɨ. Ngwutna nyangu kat kwivat wandɨ. njambwi nyan God yagwa waiga nɨmba kat kwivat wandɨ waa wandɨ Pita.

40 Pita nat nɨma sakwat nyaangɨt mbutndɨ. Ndi kat wandɨ. Wan ngepmamba lɨga nɨmba apma maawut ana sɨka lɨgandi. Ndina sɨka lɨga maawupmba ke sɨka lɨga. Kupi maawut asɨk waa wandɨ Pita. 41 Pita waa nyaangɨt kwutaa la nɨmba aywaa ngu yagundi. Wan nandinya 3,000 nɨmba wan nyaangɨt kwutaa wungi mbaapmak wuleindi.

JISASNA MBAAPMA NƗMBA YETƗNJA APMA VAT
42 Kwutaa la nɨmba wumba lɨndi. Aposel ndi kat nɨma sakwat nyaangɨt mbutɨndi. Wan nɨmba yisolaa lɨga God kat apma nyan mɨn waa wandi. God kat kitamba yisolaa lɨga ngumbulɨndi, Jisas kiyanda vak kat yelavɨtaa yisolaa nao kalɨtaa kɨtamba kɨlɨndi. 43 God ndi kat kwondu kwindɨ, aposel kwunatɨnja njɨvwa kwuka sɨmogwinja njɨvwa nɨma vat kwutɨndi. Nat nɨmba kwunatnɨja vak vɨlaa ngɨpaliga ndandi. 44 Wan nyaangɨt wutaa kwutaa lɨga nɨmba kɨta vat yetɨndi. ndina nɨmbundawi kɨta vat aywaa kwutaa lɨndi. 45 Ndina kɨpma ndina nɨmbundawi nat nɨmba kat kwilaa sanya wenga klandi. Sanya awat sowat kwiga klandi. Kɨta nyan sanya lapman tɨndɨ mala ndɨ kat kwindi. 46 Nandinya nandinya Godna ngaymba yisolaa lɨndi. Ngay ngay yiga nao kɨtamba kɨlɨndi. Kɨga solat sɨga lɨndi. Waavi namwiya ndi. 47 God kat walɨndi. God mɨn nɨma nyanmɨn. Nat nɨmba ndi kat walɨndi. Wan nɨmba apma vat yetɨlɨgandi waa walɨndi. Nat nɨmba wan nyangɨt wutndi maa njambwi nyan ndi kat kwutaa ndɨna mbaapmamba taagandɨ maa mbaapmat wuleindi.

<- Aposel 1Aposel 3 ->