1 Kɨta mbaapma nɨmba, ngwutnogwinala lɨwa njɨmbal Godna waagan maawupmba tɨndɨ, ta nɨmba kat kbutɨwa nyaangɨt ngwuk kat ana mbutɨwun. Tamba la maawupmba yetɨla nɨmba kaat mbutɨwa nyaangɨt ngwuk kat mbutɨwun. Ngwuk God waa nyaangɨk kat kwutambɨlaa lɨgangwuk. 2 Ngwuk kat mbutɨwa nyaangɨt mat nyangu kɨlɨga mwunya mbi vla lɨndɨ. Nɨma nɨmba kɨlɨga tagula kɨkgɨnda lɨga vla ana lɨndɨ. Wan tɨngwan njɨmbla apma nambuo lɨga nyaangɨt ana wuka lɨngwuk. Kan mbambala nɨmbun ana wuka lɨgangwuk. Ngwuk tamba la maawupmba yetɨla nɨmba vla lɨgangwuk. 3 Kan kɨpmamba lɨga nɨmba yetɨlɨga vapmba yetɨlɨngangwuk. Awat sowat tɨpmwigwula yiga yetɨlɨgangwuk. Awat sowat waleaga yetɨlɨgangwuk. Yetɨlɨngwa vak kat vɨlaa kɨpmamba yetɨla nɨmba yetɨlɨga vak vla yetɨlɨgangwuk waa ngwuk kat yelavɨtɨgowun. 4 Ngwula nat nɨmba kwupma walɨgandi. Nɨn Polna mbaapmamba lɨga nɨmba nɨn waa walɨgandi. Nat nɨmba kupma walɨgandi. Apolosna mbaapma lɨga nɨmba nɨn waa walɨngwa vak kat wutaa kɨpmamba yetɨlɨnja vak vla yetɨlɨgangwuk waa ngwuk kat yelavɨtɨgowun.

5 Ngwuk aywaa kan mbukwa nyaangɨt kat yelavɨk ngwula. Apolos njambwi nyan ana ndɨ. Wun Pol njambwi nyan ana wun. An Godna njɨvwa kwutɨga nyan li. Ana nyaangɨt wutaa ngwutna maawupmba yelavɨka kwutaa lɨngwuk. Wan kwutɨliya njɨvwa God angat kwindɨ maa kwutɨga. 6 Anai kwutɨga njɨvwa ambugat kwutnɨjan njɨvwa vla kwutɨga. Wun mi sɨk ambugapmba tulɨga nyan vla lɨgowun. Apolos ngu tula kandi nda kat salatɨga nyan vla lɨgandɨ. 7 Mi sɨk tulɨga nyan ngu salatɨga nyan kwo njɨvwa mɨna kwutɨgambɨt. God wandɨ maa tunja mina sɨk waatɨgandɨ. 8 Mi sɨk tulɨga nyan ngu salatɨga nyan kat ana kwulatɨgandɨ. Kɨta njɨvwa kwutɨmba. God mbɨk kat wenga kwigiyandɨ. 9 Nɨn aywaa kɨta vat Godna njɨvwa kwutɨganɨn. Ngwuk Godna ambugat kwutɨna kɨpma lɨga vla lɨgangwuk. Ngwuk Godna ngay kwutɨna ngay vla lɨgangwuk.

10 God wandɨ maa ndɨna njɨvwa kwutɨgowun. Ngwutnogwinala ngaykwutɨga nɨmba vla ngwutnogwi kwutɨwun. Wunayɨ tata kwuka kwalɨk tawlɨnja vak vla kwutɨwun. Wuna kwupmba ya nɨmba ngayn mbao yaaw ngiga kwutɨga nyan vla kwutɨgandi. Wan njɨvwa nɨn kwutnɨnan apma vapmba kwutɨgiyanɨn. 11 Godna njɨvwa kwutɨna vak ngay tawgqa kwutɨnja vak vla lɨgandɨ. God tamba kwaalɨk tawndɨ. Wan tawnda kwaalɨpmba ngay kwutɨganɨn. Jisas Kraist God ngay kat tawnda kwaalɨk vla lɨgandɨ. Nat nyan ana wan ngayna kwaalɨknat tɨgiyandɨ. Jisasna njɨvwa kwutɨga nɨmba ngay kwutɨga nɨmba vla lɨgandi. 12 Wan ngayna njɨvwa kwutɨgiyaa nat nɨmba apma nda mɨna kalalaa kwutɨgiyandi. Gol walɨnja kapa, silva walɨnja kapa, nɨma sanyo lɨga kambak klalaa wungi ndamba ngay kwukiyandi. Wan ngayna njɨvwa kwutɨgiyaa nat nɨmba kavle nda mɨna kalalaa kwutɨgiyandi. Wi njɨk, nat yuwi, kavle mi klalaa wungi ndamba ngay kwutɨgiyandi. 13 Njambwi nyan yaiga njɨmbla kwutɨna njɨvwa yetɨna vak kat njambwi nyan sɨga naguga vɨgiyandɨ. Kɨta kɨta nyan yetɨlɨna vak kat God sɨga naguga vɨgiyandɨ. Wan njɨmbla ya vɨkiyandɨ kwutɨna njɨvwa kat. Kavle njɨvwa aywaa yamba vɨka ngɨlɨgiyandɨ. Apma njɨvwa mɨna kwo lɨgiyandɨ. 14 Kɨta nyana njɨvwa apma vat kwo lɨndeyan njambwi nyanndɨ kat apma wenga kwigiyandɨ. 15 Kɨta nyan njɨvwa kat ya vɨtndeyan apma wenga ana klaigandɨ. Ndɨ ndɨna mbangɨ ya ana vɨkiyandɨ. Ndɨ kwo lɨgiyandɨ. Wan nyan yamba vɨtɨndɨ, kavuk saguga klanja nda vla lɨgiyandɨ.

16 Kan vak kat ngwula maawut ke sɨlawoka kwagalaga. Ngwut Godna ngay vla lɨgangwuk. Ndɨna waagan ngwutnogwinala lɨlɨgandɨ. 17 Ngwutna mbaapma nɨmba kat kavle vat yingweyan God ngwuk kat nɨma vak kavle vat yigiyandɨ. Godna ngay apma vat tɨgiyandɨ. Ngi kat tɨga ngwuk Godna nɨmba apma vat tɨga yetɨgiyangwuk.

18 Kɨta nyan ndɨ avla woseka walandɨ. Ngwula kɨta nyan kɨpmana nambuo lɨga vat aywaa vɨga lɨgowun waa wandeya nɨma vat ana ndɨ. Wan kɨpmana nambuo lɨga vak kat kwagalalaa Godna nambuo lɨga vat klandeyan wan apma vatna. 19 Wan kɨpmana nambuo lɨga vak kat vɨlaa god ndi kat tungwengwan yiga lɨgandi waa walɨgandɨ. Tamba la nyan Job God waa nyaangɨt pɨlɨwutndɨ. Kɨpmana nɨmbana nambuo lɨga vatna aywaa woseka walɨnja vatna. Wan angwa vat God vɨga lɨgandɨ. Wupma ndi kat kwulatɨgandɨ waa tamba pɨlɨwutndɨ. 20 Nat nyan Sam walɨnja nyaangɨpmba God waa nyaangɨt tamba pɨlɨwutndɨ. Njambwi nyabn nambuo waa nyaangɨt tamba pɨlɨwutndɨ. Njambwi nyan nambuo lɨga nɨmba yelavɨka vak kat vɨlaa kwo vatna waa walɨgandɨ waa tamba pɨlɨwutndɨ. 21 Ndinyangu kwutɨga nda kat vɨlaa wana apma nda walɨngweya. Godna kwukna nda apma nda. Wan nda aywaa ngwutnana. Wan nda kat yelavɨkiyangwuk. 22 Nɨn Pol, Apolos, Pita ngwuk kat kwunapmak tɨganɨn. Wan kɨpmamba lɨga nda aywaa God ngwuk kat kwiya nda. Kɨpmamba kwo tɨngweya vak God ngwuk kat apma vat tɨngwangat kwindɨ. Wundumbu yingweya vat God ngwuk kat apma ngepmamba yiga tɨngwangat kwindɨ. Mbambala lɨga vat ngwuk kat kwunapmak God ngwuk kat taagagiyandɨ. Nɨma sakwat nda ngwuk kat God taagandɨ. 23 Ngwuk Kraistna mbaapmamba lɨga nɨmba ngwuk. Ndɨ Godna nyana. Nɨma sakwat apma vat ngwutna lak tamba yalaa lɨgandɨ.

<- 1 Korin 21 Korin 4 ->