Matta
Laɓara na Mbǝnggǝn aten Yeeso
Katǝra laɓaara
Matta tal ahur fa fatsahaya Yeeso ndǝn chirethgha ɗeleewar ɗiya. Laɓara na Mbǝnggǝn aten Yeeso yi Matta pǝrangɗǝ ndaarha ƙǝm Yeeso Ƙǝrǝsti ni. Ndǝghǝnni tǝ hǝrǝkrha lǝɗangna Faara ɗǝf miighǝn a nafiyighǝn ahu Ɗeleewar Faara tǝ Peɗǝnda yi ƙǝtǝm. Laɓarɗi na Mbǝnggǝn ya mbǝ a Yahudaya katendan wa, amma a ƙǝshiirha kahad. Chireethleng Matta ǝnggina hai katǝragha hai tǝtal-tǝtal. Katǝranggǝn hai tǝ laɓar nggǝtta Yeeso, tǝ mbaptisǝmadghǝn tǝ ƙǝƙǝrrǝghǝn. Tǝ ƙǝm kwamanɗi katǝrang nǝn pǝr laɓar Faara, tǝ tsahadghǝn ha, tǝ ƙǝnang nda fiya a Nggalili. Pǝrɗǝ laɓar wiid Yeeso thliinǝn a Nggalili ɗǝnǝn Urshalima ɗǝ; tǝ ǝngya katǝragha hai atenggǝn har tawang nanda ɗǝ tǝ thliidghǝn sǝ ahu mǝra. Laɓara na Mbǝnggǝn aten Yeeso yi Matta kyadɗa ndǝn a pǝpal tǝ ndaarha Yeeso Ƙǝrǝsti mamnda tǝmalǝmnda ni. Nǝghǝn tǝ sǝsǝmnda yi fǝlang nda Ngyakhrha Faara hai ma Musa.
Tsahang Matta hai pǝmnggǝn tuf: 1. Tsahad Yeeso ha a mbǝrha na ɗangkam, aten ǝngya kamngga a tsauka wangya Kutǝryid Faara (5-7). 2. Tsahang ɗǝ fatsahayighǝn ha kumkap sǝri, kwamana kamngga a ǝna taara nda mǝmǝl (10). 3. Na karapu sǝ ɗǝɗamǝn-ɗǝɗamǝn tsahana Yeeso ha aten kutǝryid Faara (13). 4. Kwamana na a tsauka tǝ mbu samad Yeeso (18). 5. Tsaha ɗaha aten mii ngwala ƙǝshiirha tǝ ǝngya na a katǝrarha hai a farɗi (24-25). Əngya na ahurghǝn.
Chichiiya Yeeso tǝ nggǝttǝghǝn hai 1:1-25; 2:23
Tarya ǝnana Yahaya tǝ Mbaptisǝma 3:1-12
Mbaptisǝmad Yeeso tǝ ƙǝƙǝrrǝghǝn 3:13-17; 4:11
Tarya ǝnana Yeeso a chehweed Nggalili 4:12, 18:35
Mal Yeeso Nggalili ɗǝgha Urshelima ɗǝ 19:1-30; 20:34
Mii ngwala tar Yeeso a Urshelima 21:1-46; 27:30
Taurha Yeeso ɗǝ tǝ mǝrrǝghǝn 27:32-66
Thlid Yeeso sǝ hu mǝra tǝ kyatta fadghǝn 28:1-20

Chichiiya Yeeso

(Luka3:23-38)

1 Kulo thlǝmngya chichiiya Yeeso Ƙǝrǝsti ya, chichid Ndauda tǝ Ibrahim.

2 Ibrahim nggǝtgha Ishaku,

Ishaku nggǝtgha Yakubu.

Yakubu nggǝtgha Yahuda tǝ wan manggighǝn.

3 Yahuda nggǝtgha Peres tǝ Dzara. Ma ndan ndǝna Tamar.

Peres nggǝtgha Hesron,

Hesron nggǝtgha Aram, 4 Aram nggǝtgha Aminadab,

Aminadab nggǝtgha Nashon,

Nashon nggǝtgha Salmon.

5 Salmon Nggǝtgha Mboz. Man ndǝna Rahap.

Mboz nggǝtgha Obed. Man ndǝna Ruth.

Obed nggǝtgha Djeshi,

6 Njessi nggǝtgha kutǝra Ndauda.

Ndauda nggǝtgha Sulemanu. Man ndǝna Mbasheba, nu mǝra Uriya.

7 Sulemanu nggǝtgha Rehobom,

Rehobom nggǝtgha Abidja,

Abidja nggǝtgha Asa,

8 Asa nggǝtgha Djehoshafat,

Djehoshafat nggǝtgha Djoram,

Djoram nggǝtgha Adzariya,

9 Adzariya nggǝtgha Djothlam,

Djothlam nggǝtgha Ahas,

Ahas nggǝtgha Hedzekiya,

10 Hedzekiya nggǝtgha Manasa,

Manasa nggǝtgha Aman,

Aman nggǝtgha Djosiya,

11 Djosiya nggǝtgha Djekoniya [a] tǝ wanmanggighǝn, a sayidɗi ƙǝsang ngganda nafiya Yahuda ngyaɓang tsaurha nda kanda fa hu chehweed Mbabila ɗǝ.[b]

12 A kwasamadɗi ɗǝna nda tǝ kanda a Mbabila ɗǝ, Djokoniya nggǝtgha Sheyaltiyel,

Sheyaltiyel nggǝtgha Dzerubabel,

13 Dzerubabel nggǝtgha Abihudu,

Abihudu nggǝtgha Eliyakim,

Eliyakim nggǝtgha Adzor,

14 Adzor nggǝtgha Dzadok,

Dzadok nggǝtgha Akim,

Akim nggǝtgha Eliyud,

15 Eliyud nggǝtgha Eleyadza,

Eleyadza nggǝtgha Mattan,

Mattan nggǝtgha Yakubu,

16 Yakubu nggǝtgha Yisufu, chimad Mairamu.

Mairamu nggǝtgha Yeeso na nda aarha Ƙǝrǝsti.

17 Chichiiya kumkap faɗa a thlakh mbǝd Ibrahim ɗǝgha thlakh mbǝd Ndauda ɗǝ. Thliirha a thlakh mbǝd Ndauda ɗǝgha hu sayidɗa ɗǝ ngyaɓang nanda tsaurha kanda fa a Mbabila, chichiiya kumkap faɗa ni. Thiirha ƙǝm a sayidɗi mal nanda Mbabila ɗǝgha hu sayidɗa ɗǝ nggǝt nanda Ƙǝrǝsti chichiiya kumkap faɗa ni.

Nggǝtta Yeeso

(Luka2:1-7)

18 Kulo kwaman nggǝtta Yeeso Ƙǝrǝsti ya. A sayidɗi ngwanna Yisufu Mairamu man Yeeso, amma kanda kula kakhrha, ƙǝlagha Mairamu hai, nǝghǝn ahur yi Sǝsǝna tǝ Peɗǝnda. 19 Yisufu ka niifa ni mbǝ midghǝn sǝ a fǝrang shilee nǝn Mairamu a yid fiya wa, ahu numadghǝn na midghǝn sǝ a kalghǝnǝn hai ɓǝɓee. 20 Amma ndǝghǝn hu numadɗi kee, ɓagha tǝthlǝnda Faara thlǝmadghǝn ɓa hu sǝsǝniirha ndanggǝn, “Yisufu, wan Ndauda, a tǝrǝmna kakh Mairamu wa, ƙǝsǝr huryidɗi keeghǝn yi Sǝsǝna tǝ Peɗǝnda ni. 21 Nǝn a nggǝt wee hǝshin, ɗǝfang thlǝma na Yeeso[c] Ƙǝsǝr ndǝghǝn ni a hǝrghang nafiyighǝn ahu ɗimiyid ndan.”

22 Ənggini heu ya katǝra nǝn hai ka a lǝɗang ngganda ˈya ndana annabi.

23 “Na wutararha a ɗǝfrha hur nggǝt wee hǝshin nǝn

ɗǝfang thlǝma nda Imaniyel.”

Thlǝmɗi ndaarha ni, “Faara nǝghǝn tǝ ƙǝm ha.”[d]

24 Mehenna Yisufu sǝ a ɓeena, takkwa ǝn ɗanǝn pǝrangna tǝthlǝnda Faara, kahanggǝn Mairamu. 25 Amma sǝngwa ndǝn wee nuwun wa, ƙǝl a kwasamadɗi nggǝt nǝn wee hǝshin, ɗǝfang thlǝma nǝn Yeeso. [e]

MATTA 2 ->