SAN LUCAS 22

Ayambüw cuane wüx masapüw Teat Jesús

(Mt. 26:1-5, 14-16; Mr. 14:1-2, 10-11; Jn. 11:45-53)

1 Laliüc matüch nangos nüt ocueajiw nipilan judío, aaga nasoic pascua, aaga nüt wüx üeteran pan ngo majmel levadura. 2 Ajcüwa natangtang miteaats at mondüy wüx aaga poch tüünd Moisés tayambüw nguineay alndom mambiyaw Teat Jesús, pero timboloj mandüyiw nipilan.

3 Quiaj a natang nimeech Satanás tajmel tiül omeaats a Judas Iscariote, nej nop tiül ajcüwa gajpiüp (12) minipilan Teat Jesús. 4 Aaga Judas quiaj tamb masaj natangtang miteaats, at montang monajiüt tiül nadam nangaj iüm, tasaj nejiw nguineay alndom mayac teowixaw nejiw Teat Jesús. 5 Nejiw quiaj tapac omeajtsüw, tasajüw apmüjchiw nej tomiün. 6 Condom nej tapiüng apmayac teowixaw nejiw; quiaj tapots mayamb nguineay marang aag ayaj wǘxan ngo majlüy quiaj nipilan.

Teat Jesús ndójwüx üet aweaag minipilan nej

(Mt. 26:17-29; Mr. 14:12-25; Jn. 13:21-30; 1 Co. 11:23-26)

7 Condom tatüch a nangos nüt wüx üeteran pan ngo majmel levadura. Aaga nüt quiaj netam mandeow sap majmel marang nichech wüx pascua. 8 Quiaj Teat Jesús tüüch mamb a Pedro maquiiüb a Juan, tasaj:

―Quiüran ijawan cuane apmetam icoots wüx apmetiiüts wüx nangos nüt pascua ―aj nejiw.

9 Nejiw quiaj tasajüw Teat Jesús:

―¿Nguiane ijac indiüm, Teat, namban narangan aag ayaja? ―ajüw.

10 Teat Jesús tasaj nejiw:

―Wüx apmejmeliün tiül cambaj, quiaj apmexoman nop naxey ajoy nop ngan yow. Indüjpiün mamb aaga najüy quiaj, apmayac icon tinden niüng andüy quiaj. 11 Condom quiaj apmesajan neneay iüm: “Apiüng Teat Naxey: ¿Nguiane ajlüy niüng saxejnenguenon netiün wüx pascua naquiiüb xenipilana? aw”, apmerajan. 12 Quiaj apmatiib icueajiün nop nadam teomeaats iüm cawüx amb ijpüw iüm, landoj lamatajcüw majneaj. Andüy quiaj apmeyacan üetiiüts ―aj nejiw Teat Jesús.

13 Condom quiaj tambüw. Taxomüw meáwan atnej lamasaj nejiw Teat Jesús. Quiaj tambüw mayacüw leaw apmüeteran wüx nangos nüt pascua.

14 Wüx tatüch metiw, quiaj tapeay quiaj Teat Jesús maquiiüb altigüy miapóstoles nej. Quiaj chetetoj. 15 Wüx alchetemoj wüx mes, quiaj tasaj nejiw:

―¡Xeyay teanandiüm net naquiiüb icon wüx aaga pascua cam, wǘxan nganaw namongoch xeyay ngo majneaj! 16 Cos ningüy ndoj, lango net naquiiüb icon alinomb wüx pascua, leaw apmajlüyiiüts nóiquian niüng apmajlüyiiüts maquiüjpaats Teat Dios ―aj nejiw Teat Jesús.

17 Condom quiaj taxaing noic vas, tüüch gracias Teat Dios, ndoj tapiüng:

―Jogüy isapan inganeowan noicnoic pite. 18 Nganüy sasaj icon, xique landoj langome sananganeow miyow uva naquiiüb icon; apndom wüx apmatüch alinoic nüt niüng apmajlüyiiüts maquiüjpaats Teat Dios ―aw.

19 Condom quiaj taxaing a pan, tüüch gracias Teat Dios. Quiaj tambaag müüch nejiw, tapiüng:

―Aag agüy xecuerpo, apmayacüch mandeow mawün isoetiün. Atcüy netam merangan para leaam imeajtsan xic wüx ―aw.

20 Atanquiaj tarang wüx landoj üetiw. Taxaing a vas, tapiüng:

―Aag agüy xequiej, ajüiquich wüx jayats poch lamarang Teat Dios müüch icon, cos xequiej apmajünch tiüt mawün isoetiün.

21 ’Aaga naxey leaw apmayac xic teowixaw moncüy majaw xic, nganüy teasüet anaag nóiquian wüx mes. 22 Naleaing apmarangüch wüx ombas Teat Naxey atnej tanderac tanomb wüx nej. ¡Nganüy aaga naxey leaw apmayac nej teowixaw monajiüt xeyay ngo majneaj apmamongoch! ―aw Teat Jesús.

23 Condom minipilan nej atünayej menguiayayej wüx jane tiül nejiw apmayac nej teowixaw monajiüt.

Andeacndeacüw wüx jane alwüx atam ajlüy

24 Condom minipilan Teat Jesús tandeacndeacüw tíülan nejiw, tapiüngüw wüx jane tiül nejiw alwüx atam ajlüy, jane apmarang natang. 25 Quiaj Teat Jesús tasaj nejiw:

―Meáwan natangtang monajiüt tiül meáwan iüt arangüw apatüw atnej lamaneayiw meáwan nipilan leaw ajlüyiw wüx. Átan ayambyambüw nguineay manderacüw wüx nejiw majüic najneaj arangüw. 26 Icona nde merangan atquiaj. Tiül icona jane natang netam mayaag atnej chingüy. Leaw najmel marang natang tiül icona netam mambeol jangantanej. 27 Ngwüy, cuane ipiüngan, ¿ngün más netam ajlüye? Sapiüng aaga apchetem mayambüch üet nej; ngome aaga neyac nüeteran wüx mes. Nganüy xique sajlüy naquiiüb icon atnej nop neyac nüeteran wüx mes, atnej nop nerang minajiütan.

28 ’Icona ijlüyiün mequiüjpan xic meáwan nüt wüx samongoch cuajantanej naél. 29 Cos atnej Xeteat Dios lamüüch xic narang natang nenajiüt, ata xique sanüüch icon merangan natang nóiquian mequiüjpan xic, 30 para metiiüts manganeowaats nóiquian wüx xemes ninguiün niüng sanarang natang. Átan apchetemeron niüng chetejow montangtang monajiüt, mejawan wüx asoetiw ajcüwa gajpic ajlüy nipilan monaw tiül micual micualüw Israel ―aj nejiw Teat Jesús.

Pedro apmapiüng ngo majaw jane Teat Jesús

(Mt. 26:31-35; Mr. 14:27-31; Jn. 13:36-38)

31 Condom Teat Jesús tasaj a Pedro:

―Simón, Simón inguiay, cos Satanás minatang nimeech teamatün icon, teamandiüm mayac icon tiül naél, atnej ajwüch trigo maw osaab. 32 Xique lanatün ocueaj Teat Dios mambeol ic ngo mecueat iyac imeaats wüx nej, atquiaj wüx apmendilil apmembeolüw micojow michijquiaw ―aj.

33 Quiaj tasaj nej a Simón:

―Xique teat, sajlüy namb naquiiüb ic nguiajantanej, masey majmeliür tiül manchiüc, masey mambiyaw icor ―aj nej.

34 Quiaj tasaj nej Teat Jesús:

―Naleaing sasaj ic, Pedro, gallo apmepaj nganüy leaw ndoj mepiüng arojmbüw ipiüng ngo mejaw jane xic ―aj nej.

Laliüc majlüy xeyay ngo majneaj

35 Condom Teat Jesús tatün manguiay nejiw:

―Jow wüx tüjchiüs icon meamban ngo mejoyiün morral, ngo mejoyiün iquial tomiün, ngo mesoijquiün napüic, ¿tetam icon aleaic leaw nómban ngome tejiürana? ―aj nejiw.

Quiaj tapiüngüw:

―Nicuajind, Teat ―awüw.

36 Condom quiaj tasaj nejiw:

―Nganüy, leaw ajiür morral ich majoy, at iquial tomiün. Sitiül nop ngo majiür espada, ich manüüb micamix nej mangal nots. 37 Cos sasaj icon xique netam marangüch wüx ximbas atnej lasanderac wüx tiül Mipoch Teat Dios, cos apiüng: “Tayacüch atnej nop nerang ngo majneaj”, aw. Meáwan leawa lasanderac wüx quiaj, netam majlüy atnej ―aj nejiw.

38 Quiaj tasajüw nej:

―Teat, alningüy ijtsüw espada ―ajüw.

Quiaj tasaj nejiw:

―¡Lajlüy, atówan ayaj! ―aj nejiw.

Teat Jesús ataag orar tiül Getsemaní

(Mt. 26:36-46; Mr. 14:32-42)

39 Condom Teat Jesús taw quiaj maquiiüb minipilan nej, tamb andüy wüx mitiüc Olivos atnej mbójan marang. 40 Wüx tapeayiw quiaj, tasaj minipilan nej:

―Itüniün ocueaj Teat Dios, ngana aleaic marang wüx imbasan nimeech ―aj nejiw.

41 Condom quiaj tacueat nejiw Teat Jesús, tamb tajüy atow nej atüch niüng alndom majlos noic piedra. Quiaj taquieel tiüt micos nej masaj Teat Dios, 42 tapiüng:

―Teat, ngwüy alndom mamóngan wüx ximbas meáwan naél leaw aliüc miün; ique ijaw Teat, ngome leawa xique sandiüm, cos leaw ique ijaw netam ―aw.

43 Condom quiaj tapeay nop ángel imiün tiül cielo mambeol nej, müüch nej apac. 44 Cos Teat Jesús xeyay tamix omeaats, ngo macueat matün ocueaj Teat Dios; taw xeyay minalil nej, ancatectec tiüt atnej quiej.

45 Wüx ndot mataag orar, quiaj witiüt tamb majaw minipilan nej. Almajngot majaw almameayiw, cos laǘmb apacüw, xeyay amix omeajtsüw. 46 Quiaj tasaj nejiw:

―¿Neol tapots imeayiüna? ¡Ipacan, itüniün ocueaj Teat Dios, quiaj ngondom marang nicuajind wüx imbasan nimeech! ―aj nejiw.

Aquiüjpüw mamb Teat Jesús

(Mt. 26:47-56; Mr. 14:43-50; Jn. 18:2-11)

47 Tenguialeámban andeac Teat Jesús, quiaj ajngot noic ajlüy nipilan, aaga Judas ombas nej; nej nop nej tiül ajcüwa gajpiüp (12) apóstoles. Wüx tajngot, nómban atüch Teat Jesús macheech mimboy nej. 48 Condom Teat Jesús tasaj a Judas:

―¿Atquiaj lameteots metiib ndeaam Teat Naxeye, wüx apmecheech mimboy neje? ―aj.

49 Minipilan nej wüx tajawüw aag ayaj, quiaj tapiüngüw:

―Teat, ¿natsojon naquiüjpan naag espada? ―awüw.

50 Condom nop minipilan Teat Jesús tamb mangoch nop nerang minajiüt natang miteaats, tandooig miác olaag. 51 Quiaj Teat Jesús tasaj nej:

―¡Ijlǘyan, icueat, ich majlüy! ―aj.

Condom quiaj tarreeg olaag aaga naxey quiaj, tataag majneaj nómban. 52 Quiaj tasaj ajcüwa montangtang miteaats, at monlüy wüx nadam nangaj iüm, at montangtang teat xeech monajiüt tiül nejiw, leawa tiünüw masapüw nej:

―¿Cuane imbichan espada maquiiüb a tocots xiül quiaj, tewiünana mesapan xique? ¿Neol, jowa xique need xique? 53 Meáwan nüt samb tiül nadam nangaj iüm. ¿Neol ngo mesapan xique? Nganüy cos lamatüch a nüt merangan aag ayaj, at nimeech lamüünd marang atquiaj ―aj nejiw.

Pedro apiüng ngo majaw jane Teat Jesús

(Mt. 26:57-58, 69-75; Mr. 14:53-54, 66-72; Jn. 18:12-18, 25-27)

54 Condom quiaj ndeaad Teat Jesús, taquiüraab mamb andüy aniüng minatang miteaats. Teat Pedro tandüüb nej mamb, miünquiájan ajngot. 55 Ajcüwa nipilan ajalüw biümb quiaj tiül püjchiün mbeay ombiüm minatang miteaats metsantsayej; alchetemoj ayeyiw tiüt biümb. At a Pedro aton tamb tsotom quiaj maquiüjpüw. 56 Alquiaj nop nüx nerang najiüt quiaj, wüx tajaw altsotom mbeay biümb a Pedro, tajaw majneaj, quiaj tapiüng:

―At aaga naxey quiaj aton taquiiüb aaga Jesús ―aw.

57 Aaga Pedro ngo mandiüm mapiüng naleaing, quiaj tapiüng:

―Ngwüy müm, ngo najaw jane aag ipiüng quiaj ―aw.

58 Ajóyan quiripite ores, quiaj tajaw nej alinop, tasaj nej:

―Ique aton nop tiül aquiüjpüw nejiw ―aj nej.

Quiaj tapiüng a Pedro:

―Naxey, ngwüy ngome xique ―aw.

59 Ǘüchan ores tatow ndoj masaj nej aaga nop, quiaj tapiüng alinop:

―Naleaing, aaga naxey quiaj aton aquiiüb nej, cos naw Galilea ―aw.

60 Aaga Pedro tandüy wüx mapiüng:

―Naxey, ngo najaw cuane ipiüng quiaj ―aw.

Tenguialeámban mandeac aag ayaj a Pedro, quiaj tepaj a gallo. 61 Teat Jesús ndiliteay majaw a Pedro. Quiaj leaad omeaats aaga tapiüng Teat Jesús: “Sasaj ic Pedro, aaga gallo apmepaj nganüy leaw ndoj mepiüng arojmbüw ipiüng ngo mejaw jane xic”, maj nej. 62 Wüx leaad omeaats aag ayaj a Pedro, taw quiaj, tapots müüch ajiünts.

Tawüjchiw Teat Jesús

(Mt. 26:67-68; Mr. 14:65)

63 Ajcüwa monxey monjiür Teat Jesús itsojayéjan nej, tatoliw nej. 64 Quiaj taoeliw oniiüg nej, cas tapots maleambüw mitey. Tasajüw:

―¡Isüet jane neleamb ic! ―ajüw.

65 At tasajüw nej cuajantanej ngo majneaj.

Teat Jesús alniüng ajlüy monajiüt

(Mt. 26:59-66; Mr. 14:55-64; Jn. 18:19-24)

66 Wüx larraw tiüt, quiaj canchiütoj montangtang monajiüt tiül judíos, montangtang miteaats, átan mondüy wüx aaga poch tüünd Moisés. Taquiüjpüw mamb Teat Jesús andüy niüng alcanchiümoj altegüy montang monajiüt. Quiaj tatüniw nej manguiayiw:

67 ―Isaj xicon, ¿cuane ipiüng, ngwüy ique aaga Cristo tapiürang aliüca? ―ajüw nej.

Quiaj tasaj nejiw:

―Masey nasaj icon, icona ngome apmeyariün sandeac. 68 Aton sitiül aleaic natün nanguiay icon, ngome apmesajan xic, ngome apmetsambijchan xic. 69 Naleaing, naw wüx nganüy Teat Naxey apchetem amb wüx miác Teat Dios, aag nerang cuajantanej leaw almajlüy ―aj nejiw Teat Jesús.

70 Condom yajnguiat tiüt masajüw nej:

―¿Cuane ipiüng, ique micual ic Teat Diosa? ―ajüw nej.

Quiaj tasaj nejiw:

―Xique, atnej ipiüngan quiaj ―aj nejiw.

71 Condom quiaj tapiüngüw:

―¡Cuane tenguialeámban macüliiüts manguiayiiüts, cos anguiayayoots nguineay andeac! ―awüw.

<- SAN LUCAS 21 SAN LUCAS 23 ->