1 Condom Teat Jesús tamb andüy wüx mitiüc Olivos. 2 Raw miün tiüt, quiaj tandilil andüy tiül nadam nangaj iüm. Xeyay nipilan tambüw majawüw nej; quiaj chetet tapots maquiaach nejiw. 3 Camüm tapeayiw quiaj mondüy wüx aaga poch tüünd Moisés, at ajcüwa fariseos. Aquiüjpüw mamb nop najtaj asapüw wüx naxey, mayacüw pinawan nipilan niüng ajlüy Teat Jesús. 4 Quiaj tasajüw Teat Jesús:

―Teat, aaga najtaj cam ndeaan wüx naxey. 5 Tiül aaga poch tüünd Moisés apiüng netam majlos mandeow ajcüwa montaj monrang atquiaj. Jowa ique, ¿cuane ipiünga? ―ajüw nej.

6 Aag ayaj asajǘwan majawüw cuane apmapiüng, nguineay maxomüw cuane wüx mayacüw nej asoet. Quiaj Teat Jesús mejquiet tiüt, tapots majenchjench tiüt owix nej. 7 Cos tanaámb matüniw manguiayiw nej, quiaj lembet, tasaj nejiw:

―Jangantanej tiül icona ayaag ngo majiür nisoet, nej ich malox ombas aaga najtaj cam ―aj nejiw.

8 Ndoj mejquiet tiüt alinomb, tandüy wüx majenchjench tiüt owix nej. 9 Quiaj ajcüwa monajiüt wüx tanguiayiw aag ayaj tayajcüw ngo majneaj, taxinguiaw; tawüw quiaj nopnópan, ajan wüx leaw natang, ndójwüx meáwan nejiw tawüw quiaj. Néjan quiaj Teat Jesús tacül quiaj niüng ajlüy aaga najtaj. 10 Quiaj Teat Jesús witiüt alinomb. Wüx tajaw néjan a najtaj aliün quiaj, quiaj tasaj:

―Müm najtaj, ¿wüliwe? ¿Neol, nejinguind lango mayacüw isoete? ―aj.

11 Quiaj tasaj nej a najtaj:

―Ngwüy teat, nejinguind ―aj nej.

Quiaj tasaj nej Teat Jesús:

―Ata xique aton ngo nayac isoet. Quiür, nde mendüy wüx merang nisoet ―aj nej.

12 Teat Jesús tandüy wüx maquiaach nipilan, tapiüng:

―Xique sajlüy ningüy wüx aaga iüt cam atnej ran. Jane andüüb xic ngome apmajüy tiül pojniün; cos xique sanarraj mitiüjtüw nejiw, aton apmapacüw meáwan nüt ―aw.

13 Quiaj tasajüw nej ajcüwa fariseos:

―Ique indeácan aag ayaj; nguineay sanajawan sitiül naleaing, cos wüx nop andeac wǘxan ombas nej, aag ayaj ngo membeat ―ajüw nej.

14 Quiaj tasaj nejiw Teat Jesús:

―Masey sandeac wǘxan xique, naleaing leaw sandeac aag ayaj nembeat; cos sajaw nguiane ximiün tiünas, at sajaw nguiane sandüy sanamb. Pero icona ngo mejawan nguiane ximiün tiünas, átan ngo mejawan nguiane sandüy sanamb. 15 Icona iyacan asoet atnej ajlüyay merangan ningüy wüx iüt. Xique ngo niün nayac asoet nejinguind. 16 Ndot xique nayac asoet aljane, sanarang naleaing atnej netam; cos ngome xíquian quiaj wüx sarang, saquiiüb wüx Xeteat, aaga neech xic niün. 17 Tiül minawijquian apiüng sitiül ajlüy ijpüw monjaw mandeacüw nóiquian leawa tajawüw, netam mayarich andeacüw nejiw. 18 Nganüy sasaj icon xique nop nendeac leawa sajaw wüx xique, alinop nejay Xeteat aaga neech xic niün, nej aton apiüng wüx jane xique ―aj nejiw Teat Jesús.

19 Condom quiaj tatüniw manguiayiw nej:

―¿Nguiane almajlüy miteate? ―ajüw nej.

Quiaj tasaj nejiw Teat Jesús:

―Icona ngo mejawan jane xic, átan Xeteat ngo mejawan jane nej. Sitiül icona mejawan jane xic, at Xeteat aton apmejawan jane nej ―aj nejiw.

20 Atquiaj tapiüng Teat Jesús wüx tenguial aquiaach nipilan tiül nadam nangaj iüm niüng ajlüy iquial nichech. Nejinguind ngo masap nej cos nganaw matüch minüt nej ndeaam.

21 Condom tasaj nejiw alinomb Teat Jesús:

―Xique sanamb, icona apmeyamban xic. Naleaing icona apmendeowan tiül isoetiün. Niüng sanamb icona ngondom meamban quiaj ―aj nejiw.

22 Quiaj ajcüwa monajiüt tiül judíos tandeacndeacüw wüx, tapiüngüw:

―¿Ngwüy, apmembiyay nejáyan quiaja, áag tapiüng ngondom mambaats niüng apmamba? ―awüw.

23 Quiaj tasaj nejiw Teat Jesús:

―Icona neriowan wüx iüt; xique nawas cawüx tiül cielo. Icona ijiüran iniüngan ningüy; xique tiül cielo saniüng. 24 Áag tasajas icon apmendeowan wüx isoetiün, cos ngo meyariün mepiüngan naleaing xiquiay aaga teanasaj icon wüx quiaj ―aj nejiw.

25 Condom quiaj tatüniw nej manguiayiw:

―¿Neol, jane ique? ―ajüw nej.

Quiaj tasaj nejiw Teat Jesús:

―Landoj lanasaj icon jane xic. 26 Alndom nasaj icon xeyay cuajantanej, at alndom najüiquich nguineay irangan; pero ngo metam narang, cos sandeac leaw asaj xic aaga neech xic niün. Aag ayaj sasaj meáwan nipilan cos sajaw aag ayaj naleaing ―aj nejiw.

27 Naleaing nejiw nómban ngo maxomüw omeajtsüw nguineay Teat Jesús teamasaj nejiw wüx Teat Dios. 28 Áag tasaj nejiw Teat Jesús:

―Wüx landoj mexainguiün meyacan cawüx aaga Teat Naxey, quiaj apmejawan xique. Ngo narang nicuajind xiquiáyan quiaj, xique sandeac leaw Teat Dios asaj xic nandeac. 29 Aaga neech xic niün tanaámb aquiiüb xic; nej nómban ngo macueat xic cos xique meáwan nüt sarang leaw nej andiüm ―aj nejiw.

30 Wüx tandeac atquiaj xeyay nipilan tayariw nej andeac.

31 Condom quiaj Teat Jesús tasaj ajcüwa nipilan judío leawa lamayariw andeac nej:

―Sitiül icona tanaámb meyacan wüx imeajtsan leaw sasaj icon, apmejlüyiün tiül xenipilan. 32 Quiaj apmejawan cuane naleaing; ndoj aaga naleaing quiaj apmawün icon wüx isotiün ―aj nejiw.

33 Quiaj tasajüw nej:

―Xicona áagan Abraham xexejchiün, ngome áag sarangan mimos aljane. Jow nganüy ¿neol tepiüng apmewün xicon wüxe? ―ajüw nej.

34 Quiaj tasaj nejiw Teat Jesús:

―Naleaing naleaing sasaj icon, meáwan nipilan leaw arang nisoet ajlüy atnej mos ocueaj nisoet. 35 Nop mos ngondom mateoraw tiül nacualaran cos aag ayaj acas nüt acül quiaj. Nganüy nop nacualaran meáwan nüt acül quiaj. 36 Sitiül Micual Teat Dios apmawün icon wüx, naleaing apmeriowan wüx nómban. 37 Xique lanajaw icona mixejchiün Abraham; pero altiül indiüman membiyan xic cos ngo mind meyariün leawa sasaj icon. 38 Xique sandeac leawa sajaw niüng ajlüy Xeteat; nganüy icona irangan leawa inguiayiün asaj icon miteatiün ―aj nejiw Teat Jesús.

39 Quiaj tasajüw nej:

―Néjan quiaj Abraham xeteatiün ―awüw.

Quiaj tasaj nejiw Teat Jesús:

―Sitiülme naleaing micual icon Abraham, neol ngo merangan atnej tarang. 40 Nganüy icona indiüman membiyan xic masey teanasaj icon naleaing leaw Teat Dios asaj xic. Mixejchiün Abraham ngome atquiaj tarang. 41 Icona indüjpiün wüx atnej tarangüw miteatiün ―aj nejiw.

Quiaj tasajüw nej:

―Xicona ngo macual xicon pálwüx; sajiüran nop xeteatiün, aag ayaj Teat Dios ―ajüw nej.

42 Quiaj tasaj nejiw Teat Jesús:

―Sitiül naleaing Teat Dios miteatiün, apmendiüman xic, cos xique ximiün niüng ajlüy Teat Dios tiünas. Xique ngo níünan, nej tüüch xic niün. 43 ¿Neol ngondom mexoman imeajtsan wüx leawa sandeaca? Cos ngo mendiüman menguiayiün meyariün leawa teanasaj icon. 44 Icona lamiteatiün nimeech cos ajlüyay indiüman merangan leaw andiüm nej. Aaga nimeech quiaj nop nej nembiy nipilan ajlüyay. Nómban ngo marang leaw naleaing, átan ngo mapiüng leaw naleaing. Meáwan andeac awaiich, cos nej minatang newaiich, aton nej miteat monwaiich. 45 Nganüy a xique sandeac leaw naleaing, áag ngo meyariün. 46 ¿Jane tiül icona alndom majüiquich sitiül xique sajiür nisoete? Sitiül xique teanasaj icon leaw naleaing, ¿neol ngo meyariün sandeaca? 47 Jane altiül minipilan Teat Dios, Mipoch Teat Dios andiüm manguiay. Nganüy icona cos ngome ocueaj icon Teat Dios, áag ngo mendiüman menguiayiün andeac nej ―aj nejiw.

48 Condom quiaj ajcüwa monajiüt tiül nipilan judío tasajüw nej:

―¿Neol ngwa, naleaing tapiüngasan, ique irang atnej nop naw Samaria? ¡Aton lamaxom ic nimeech! ―ajüw nej.

49 Quiaj tasaj nejiw Teat Jesús:

―Xique ngo majlüy wüx ximbas nimeech. Sarang leaw andiüm Xeteat, nganüy icona indeacan ngo majneaj wüx ximbas. 50 Xique ngo nayamb nerangrangüy wüx majaw xic nipilan. Ajlüy nop andiüm majaw narangüch casa. Nej apmajüiquich asoeteran. 51 Naleaing sasaj icon, jane apmayar sandeac mayac wüx omeaats ngome apmandeow nómban ―aj nejiw.

52 Condom quiaj tasajüw nej ajcüwa nipilan:

―Nganüy mbich lanajawan alwüx imbas nimeech. Cos teat Abraham at meáwan mondeac andeac Teat Dios tandeowüw; nganüy ique ipiüng: “Jane ayar sandeac leaw xic sapiüng, nej nómban ngome apmandeow”, iraw. 53 ¿Neol, jowa ique, alwüx itam ijlüy, ngo matnej xexejchiün teat Abrahama? Cos nej tandeow, aton meáwan mondeac andeac Teat Dios tandeowüw. ¿Jowa ique, jane ic? ―ajüw nej.

54 Quiaj tasaj nejiw Teat Jesús:

―Sitiül ndot xiquiáyan quiaj teasalombojchay, aag ayaj ngo membeat nicuajind. Pero cos Xeteat Dios, áaga ipiüngan Midiosan, nej teamandeac najneaj wüx xique. 55 Icona ngo mejawan jane nej; xique sajaw jane. Sitiül napiüng ngo najaw, aag ayaj tenguial sawaiich atnej icona teamerangan. Nganüy xique naleaing sajaw jane nej, aton sarang leaw apiüng. 56 Mixejchiün Abraham tapac omeaats wüx tajaw saliüc ―aj nejiw.

57 Condom quiaj tasajüw nej ajcüwa monajiüt tiül judíos:

―Ique nganaw mejiür ic miow gajpowüw (50) mineat, ¿nguineay ipiüng tejaw teat Abrahama? ―ajüw nej.

58 Quiaj tasaj nejiw Teat Jesús:

―Naleaing naleaing sasaj icon, wüx nganaw majlüy Abraham, xique salnajlüy ―aj nejiw.

59 Quiaj taxainguiw piedra maloxiw nej; pero nej texotüy, taw tiül nadam nangaj iüm, tamong amb pinawan nejiw, quiaj tamb.

<- SAN JUAN 7SAN JUAN 9 ->