1 Wüx landoj aag ayaj, tejüiquichay alinomb Teat Jesús majawüw nej minipilan nej. Atcüy tajlüy wüx tajlüyiw mbeay nadam yow Tiberias. 2 Cos acas minipilan nej ajlüyiw quiaj nóiquian, nop teat Simón Pedro, nop teat Tomás aaga nasoic Cuüch, alinop teat Natanael naw tiül cambaj Caná tiül iüt Galilea, at ijpüw micual teat Zebedeo, maquiüjpüw alijpüw minipilan nej. 3 Condom tasaj nejiw teat Simón Pedro:

―Sanamb sandoc ―aj nejiw.

Quiaj tasajüw nej:

―Ata xicona sanamban, tabaats ―ajüw nej.

Quiaj tambüw, ambüw tiül nop müx. Aaga ongwiiüts quiaj ngo mandocoj nicuajind. 4 Wüx ümb chiüjmbaw raw, quiaj majawüw Teat Jesús alembem mbeay yow. Naleaing nejiw ngo mateotsüw wüx sitiül aag ayaj Teat Jesús. 5 Condom quiaj tasaj nejiw Teat Jesús:

―Xecualüw ¿tesapan indocona? ―aj nejiw.

Quiaj tasajüw:

―Ngo nasapan ―ajüw.

6 Quiaj tasaj nejiw Teat Jesús:

―Iyacan mindocon amb wüx miác otüeng müx, mbich apmesapan ―aj nejiw.

Tarangüw atnej tasoiquiw. Ndoj ngondom maxainguiw mindocoj nejiw cos chipiow a cüet. 7 Quiaj nop tiül nejiw, aaga xowüy andiüm nej Teat Jesús, tasaj teat Pedro:

―¡Aaga iün Teat Naxey! ―aj.

Teat Pedro camüm manguiay aag ayaj, quiaj masooig micamix nej cos tasoond, tanaámb ajchic tiül yow. 8 Condom ajcüwa aquiüjpüw nej taquiüjpüw mamb aaga müx andüy wüx iüt. Átan ndoc tanototoj mamb chipiow a cüet, cos ngome miünquiaj wüx iüt, ajiür maseyme coic miow (100) metros. 9 Wüx tajtepiw wüx iüt, tajawüw olüic biümb quiaj. Alpiiüm wüx nop cüet, aton alquiaj pan. 10 Quiaj tasaj nejiw Teat Jesús:

―Ijamiünan acas cüet leawa les ndot mesapan quiaj ―aj nejiw.

11 Quiaj teat Simón Pedro tajtep tiül müx macheed a ndoc manot andüy wüx iüt. Aaga ndoc ngo chiütam masey chipiüt tiül nadamdam cüet. Atüch coic miow ic miow gajparoob (153) cüet. 12 Condom tasaj nejiw Teat Jesús:

―Macaron metiiüts ―aj nejiw.

Nejinguind tiül nejiw ngo majntsop matüniw nej manguiayiw jane nej, cos lamajawüw nejay Teat Jesús. 13 Quiaj tatüch nejiw Teat Jesús, tayar a pan müüch nejiw, at a cüet.

14 Aag ayaj arojmbüw wüx ajüiquichay majaw nej minipilan nej, wüx landoj apac tiül mondeow.

15 Wüx landoj üetiw, quiaj Teat Jesús tasaj teat Simón Pedro:

―Simón, micual teat Jonás ¿cuane ipiüng, indiüm xic, ngwüy ajntsop wüx indiüm meáwan aag ayaja? ―aj.

Quiaj tapiüng teat Pedro:

―Teat, ique ijaw xique sandiüm ic ―aw.

Quiaj Teat Jesús tasaj nej:

―Ijiürüw quicheech xesapüw ―aj nej.

16 Condom tandüy wüx masaj nej amb ijmbüw:

―Simón, micual teat Jonás ¿naleaing indiüm xic? ―aj nej.

Quiaj teat Pedro tasaj nej:

―Teat, ique ijaw xique sandiüm ic ―aj nej.

Quiaj tasaj nej Teat Jesús:

―Ijiürüw xesap ―aj nej.

17 Condom quiaj tasaj nej amb arojmbüw:

―Simón, micual teat Jonás ¿naleaingue indiüm xique? ―aj nej.

Teat Pedro quiaj tamix omeaats ajcan lamasaj nej amb arojmbüw sitiül andiüm nej, quiaj tapiüng:

―Teat, ique ijaw meáwan cuajantanej; ique ijaw naleaing sandiüm ic ―aj.

Tasaj nej Teat Jesús alinomb:

―Ijiürüw xesap. 18 Naleaing naleaing sasaj ic, wüx aliün mermonguich, iquiáyan quiaj isooig ipix, iriümb leaw niüng indiüm; pero wüx apmertaxey pálwüx apmasooig ic tiül ipix, apmendic iwix, apmequiüraab niüng ngo mendiüm meamb ―aj nej.

19 Tasaj nej aag ayaj majüiquich nguineay netam mandeow teat Pedro, cos apmandeow wüx arang minajiüt Teat Dios. Ndoj mandeac aag ayaj, tapiüng:

―Indüüb xic tanaámb ―aj.

20 Wüx wantsat teat Pedro, quiaj tajaw almandüüb nejiw aaga xeyay andiüm nej Teat Jesús, aaga leaw chetet aweaag nóiquian maquiiüb Teat Jesús wüx tetiw, wüx tatün manguiay: “Teat ¿jane apmayac ic teowixaw monajiüt?” maw. 21 Teat Pedro wüx tajaw almandüüb nejiw aaga alinop quiaj, quiaj tasaj Teat Jesús:

―Teat ¿jowa neje aaga alinop quiaja? ―aj.

22 Quiaj tasaj nej Teat Jesús:

―Sitiül xique nandiüm ngo mandeow, aliün mapac wüx sanandilil alinomb, ¿neol, cuane imbiche? Ique tanaámb indüüb xic ―aj nej.

23 Condom aaga poch quiaj tejüiquichay manguiayiw meáwan monyar andeac Teat Jesús, tapiürang aaga nop minipilan nej ngome apmandeow. Pero naleaing Teat Jesús ngo mapiüng lango mandeow. Nej tapiüng: “Sitiül xique nandiüm ngo mandeow, aliün mapac wüx sanandilil alinomb, ¿neol, cuane imbich?”, aw.

24 Nej aaga nop tiül minipilan Teat Jesús teamarang aaga nawiig cam. Meáwan aag agüy tajaw, tanguiay. Atquiaj alndom majawaats meáwan leaw tarang, aag ayaj naleaing.

25 Aliün majlüy xeyay leaw tarang Teat Jesús. Naleaing sapiüng sitiül apmarangüch wüx nawiig meáwan leawa tarang, ngome apmajoy aaga iüt cam. Atanquiaj tajlüy. Amén.

<- SAN JUAN 20