APOCALIPSIS 5

Juan Jusiñamui illanomo ferɨnoga rabe illana cɨode

1 Jusiñamui illanomo cue nia eruaɨa, naimɨe nabellɨmo ferɨnoga rabe illana cɨodɨcue. Nagafebeimo cuega rafue jai ite. Siete nitaca ra illamona, naie rabe raise ɨbaibide. 2 Jusiñamui ie nanoca jaɨenicɨ ado lluana cacadɨcue. Naimɨe jɨcanote:

—¿Bumo ite uaidɨ nitaca rabe econollena, naie rabena facallena?

3 Monamo itɨnomona, enɨrue itɨnomona, jai fiodaitɨnomona, bumo ie uai iñede, naie rabe oni econollena. Naie rabe facanidɨmacɨ. 4 Jaca bumo naie uai iñena jira, eo eedɨcue. 5 Naie facaise naie veinticuatro einamacɨmona damɨe cuemo llote:

—Mai eeñeno. Judá naɨraɨ ie Leónna mamecɨredɨmɨedɨ iena econorede. Naimɨedɨ David mɨcorɨ comɨnɨ imɨe. Ie dɨbeimo iñedɨnona jai emodofilla jira, naimɨemo uai ite, naie siete nitaca rana oni suiñollena, naie rabena econollena.

6 Naie facaiseconi Toɨca Llaudana cɨodɨcue. Jusiñamui illano uicomo naimɨe ite. Naie cuatro cajedɨno naimɨe ecɨmo ite. Naie veinticuatro einamacɨ naimɨe ecɨmo jɨaɨ itɨmacɨ. Faga llaudana eruaɨde; iadedɨ jai jilluamona naidaide. Naie Toɨca Llaudadɨ Cristo. Naie Llaudamo siete sigaɨ ite. Siete uisɨ naimɨemo jɨaɨ ite. Naie uisɨdɨ Jusiñamui Joreño mamecɨdo ite. Nana comɨnɨna canollena, naimacɨmo Cristodɨ Jusiñamui Joreñona jai orede. 7 Naie facaise Jusiñamui ie nabellɨmona naie rabena ote. 8 Iena naimɨe ua mei, naie cuatro cajedɨno, naie veinticuatro einamacɨ dɨga, naimɨena sedallena, naimɨe uicomo ana bɨtadatɨmacɨ. Nagamɨemo guitarrana eruaɨde arpa ite. Nagamɨemo oromona fɨnoca copa ite. Naga copamo caɨmare soride ra boode. Naie radɨ Jusiñamuimo comɨnɨ jɨɨacɨno mamecɨdo ite. 9 Llaudana sedallena, naimacɨ arpas taillanona, comue ruana rotɨmacɨ:

O marena jira, o uai ite, naie rabe econollena.

Ie nitaca rana oni suiñoitɨo.

Jɨaɨno jaie ona meinetɨmacɨ.

O fiodailla jira, o dɨaillamona, Jusiñamui dɨbeimo naga naɨraɨmona comɨnɨna itatatɨo.

Naimacɨ jeacɨnomona jillotatɨo.

10 Naimacɨna jai fetodɨo.

O comɨnɨ naimacɨ illamona, Jusiñamui dɨga atona ñaɨcabitɨmacɨ.

Naimɨe anamo jɨaɨruido enɨruemo ite comɨnɨna sedaitɨmacɨ.

Ie jira naie rabena oni suiñoredɨo.

11 Iemei dane eruaɨllamona, naimɨe ecɨmo eo ailluena Jusiñamui jaɨenisaɨna cɨodɨcue. Naie cuatro cajedɨno ecɨmo, naie veinticuatro einamacɨ ecɨmo itɨmacɨ. Dɨga illa jira, facanide. 12 Ado llotɨmacɨ:

Bie Toɨca Llauda isoidɨmɨe jaie fiodaite; ia jai jillode.

Naimɨe eo mareuidɨmɨena jira, Jusiñamui ie uai naimɨemo jai illamona, Jusiñamui nana naimɨemo jai illamona, Jusiñamui naimɨena eo abɨna uiñotajamona, naimɨena jɨaɨ iobitaiacadɨcaɨ.

Naimɨena caɨ ɨɨnuanona, naimɨemo iobillacɨnona fecaacadɨcaɨ.

13 Iie facaise nana comɨnɨ, nana Jusiñamui comuitaga ra dɨga, lluana cacadɨcue. Monamo itɨno, enɨrue itɨno, jai fiodaitɨno, monaillaimo itɨno lluana cacadɨcue. Llotɨmacɨ:

Jusiñamuina jaca caɨ iobicabillasa. Toɨca Llauda isoidɨmɨena jaca caɨ iobicabillasa. Iobillacɨnona jaca fecaacadɨcaɨ. Caɨna jaca sedallesa.

14 Naie cuatro cajedɨno raitɨmacɨ:

—Ie isoi jɨaɨ lloiacadɨcaɨ.

Ie facaise naie Llauda isoidɨmɨena sedallena, naie veinticuatro einamacɨ ana bɨtadatɨmacɨ.

<- APOCALIPSIS 4 APOCALIPSIS 6 ->