14
Juan Bautista mɨcorɨ fiodailla rafue
(Mr 6.14-29; Lc 9.7-9)
1 Naie facaiseconi Herodes railla gobernador Jesús mamecɨna cacade. 2 Naimɨe ecɨmo maɨjɨuidɨnomo llote:
—Fiodaillamona Juan Bautista mɨcorɨ jai jillode. Jesús raillamɨedɨ naimɨe. Ie jira naimɨedɨ siño rafuena fɨnocabide.
3-4 Iese raite, Herodes Juan mɨcorɨna navui meinetaja jira. Juan Bautista mɨcorɨna nia meinetañenia, Herodedɨ ie ama Felipe aɨna ote. Naiñaiño mamecɨdɨ Herodías. Ie jira Juan mɨcorɨ naimɨemo llote:
—O ama aɨ dɨga itɨo. Maraiñede rafuena fɨnodɨo. Jusiñamui iena rairuide.
Herodes Juan mɨcorɨ lluana gaɨñenano, naimɨena duere fɨnode. Herodes Juan mɨcorɨna gaɨtatajanona, cárcelmo jonetade. 5 Naimɨe mɨcorɨna meinetaacade; iadedɨ Herodes dɨnena comɨnɨna jacɨruite. Juan mɨcorɨdɨ Jusiñamui facaina lloraɨmana naimacɨ raillanona, naimɨe mɨcorɨna jacɨruite. 6 Iemei Herodes cumpleaños ie rafuena fɨnode. Nainomo jɨaɨe comɨnɨna uaidote. Rafuemo Herodías jisa naimacɨ uicomo saillamona, Herodena iobitade. 7 Ie jira naiñaiñomo llote:
—Nɨe isoide rana o jitaiadedɨ, omo iitɨcue. Illaɨma uai cuemo illa jira, iena ua fɨnoitɨcue.
8 Naiñaiño ei naiñaiñomo lluanona, naiñaiño uai ote:
—Juan Bautista ɨfogɨ bandejamo jonecaida, cuemo ine.
9 Iena cacajano, naimɨe sunaite; iadedɨ naimɨe jino ie llua uaina jira, nainomo naimɨe uaidogano jɨaɨ jai cacaja jira, Juan mɨcorɨna meinetajana llote. 10 Ie lloga uaina fɨnollena, cárcelmo soldadona orede. Nainomo Juan mɨcorɨ ɨfogɨna jaitade. 11 Bandejamo naimɨe mɨcorɨ ɨfogɨ jonecaida, soldado atɨano, Herodías jisamo fecade. Ieconi ie eimo fecade. 12 Iena fɨdɨanona, Juan mɨcorɨ llofueoicaigano naimɨe mɨcorɨ abɨna uaɨbitɨmacɨ. Iena naimacɨ raɨa mei, Jesúmo lluaidɨmacɨ.
Jesús cinco mil ɨiñɨaɨna ecaja rafue
(Mr 6.30-44; Lc 9.10-17; Jn 6.1-14)
13 Juan mɨcorɨ meiniana Jesús fɨdɨano, nainomona comɨnɨ iñenanomo ie llofueoicaigano dɨga botedo jaide; iadedɨ naimɨe jaillana comɨnɨ fɨdɨano, naimɨena racadɨmacɨ. Dɨga comɨnɨ illanuaɨmona eɨllɨdo bitɨmacɨ. 14 Enɨruemo Jesús sɨjɨia, ailluena comɨnɨna dafaɨfide. Naimacɨna cɨuanona, naimacɨna duenaillanona, duidɨnona jillotate. 15 Jitoma ana itemo, ie llofueoicaigano naimɨe dɨne lluaɨbitɨmacɨ. Raitɨmacɨ:
—Jofue bene iñede. Jaca buedɨ iñede. Jai navuiacade. Comɨnɨna mai abɨdo oreta. Ianori ite naɨraɨmo naimacɨ guille ollena, naimacɨna oreta.
16 Uai ote:
—Naimacɨna oretañeitɨcue. Naimacɨna omoɨ eca.
17 Uai onaisɨte:
—Danɨ caɨmo ite cinco llomenico, mena llɨcɨaɨ dɨga.
18 Uai ote:
—Iena cuemo atɨ. 19 Raitɨe illanomo comɨnɨ ana raɨllesa llono —raite.
Naie cinco llomenicona naie mena llɨcɨaɨ dɨga uanona, monamo eruaɨllanona, Jusiñamuimo iobillacɨnona fecade. Iemei taɨllude. Ie llofueoicaiganomo fecade, comɨnɨna ecallena. 20 Nana guillanona monidɨmacɨ. Monillamona, fɨebide guillena ɨraɨdɨmacɨ. Doce cɨrɨgaɨaɨmo oruitatɨmacɨ. 21 Cinco mil ɨiñɨaɨ dɨese guitɨmacɨ. Naimacɨ aɨtɨaɨ jɨaɨ guitɨmacɨ. Naimacɨ uruiaɨ jɨaɨ guitɨmacɨ.
Jesús jɨnui emododo macarilla rafue
(Mr 6.45-52; Jn 6.16-21)
22 Guilla mei, botedo ie llofueoicaigano ruica dɨne jaillena llote. Naie facaiseconi naimɨe comɨnɨna nia facadote. 23 Comɨnɨna facadua mei, aneduaɨmo dane jaide, Jusiñamui dɨga ñaɨllena. Jitɨbicaidemo nainomo dama ite. 24 Naie facaiseconi ie llofueoicaigano jorai motomo itɨmacɨ. Aɨfɨ billamona, eo bagode. Naimacɨmo rɨire aɨfɨ rilla jira, rɨire jaɨtɨmacɨ. 25 Nia monaiñedemo, jɨnui emododo naimacɨ dɨne Jesús bite. 26 Naimɨena naimacɨ cɨuanona, jacɨnaillamona, raitɨmacɨ:
—¿Bu joreño caɨmo billana cɨodɨcaɨ? —Jacɨnaillamona cuiriidɨmacɨ. 27 Naie dacaiño Jesús naimacɨmo llote:
—Omoɨ joreñonicaiñeno. Cuesa. Jacɨruiñeno.
28 Pedro uai ote:
—Uanai caɨ Namadɨo. O dɨne cue billesa cuemo llono.
29 Jesús uai ote:
—Cue dɨne bi. —Ie jira botemona jɨnui emodo Jesús dɨne Pedro macarite; 30 iadedɨ aɨfɨ billana naimɨe cɨuanona, jacɨnaite. Jɨnuimo anabaiacade. Ado cuirioide:
—Nama, cuena cano.
31 Jesús ie onollɨ oni ñuitajanona, naimɨena llɨnuanona, raite:
—Eo janore cue uaina ɨɨnotɨo. ¿Bue ñellena eo ɨɨnoñedɨo? Cuena ɨɨnotɨodena, jɨnui emododo cue dɨne niadedɨ ridɨo.
32 Botemo a iaɨmaiaɨ jaillamona, ie facaise aɨfɨ llɨɨcaide. 33 Ie jira botemo itɨno Jesúmo iobillacɨnona fecadɨmacɨ.
—Odɨ ua Jusiñamui Jitodɨo —raitɨmacɨ.
Jesúdɨ duidɨnona Genesaret enɨruemo jillotaja rafue
(Mr 6.53-56)
34 Ruica dɨne jaillanona, Genesaret railla enɨruemo ridɨmacɨ. 35 Jesúna nainomo itɨno uiñuamona, naimɨe dɨne duidɨnona atɨllena, nana naɨraɨmo jɨaɨe comɨnɨna oredɨmacɨ. 36 Naimɨe dɨne billanona, danɨ ie ɨniroi fuedamo jutadallena naimɨemo jɨcanotɨmacɨ. “Naimɨe ɨniroimo caɨ jutadallemona jilloitɨcaɨ” raillamo comecɨaɨna facadɨmacɨ. Nana jutadate dɨese jillodɨmacɨ.
<- MATEO 13MATEO 15 ->
