APOKALIPSIS 5

An dhutsadh úw ani an Ajátikláb xi jaꞌich jelti an borrego xu pikbantsáb na Dios

1 Bin eját kʼubak xi taꞌ ti buxúl ban tʼokat kʼwajtaláb, u chuꞌu jun i dhutsadh úw tʼulilidh, dhutsuntsidh alkʼidh ani eblidh ani pajkʼidh kʼal búk i pajkʼixtaláb. 2 Ani u chuꞌu jun i likat tʼokat abatwále xi kʼwajat in ulal kawidh tʼajat enchéꞌ:

―¿Jitaꞌ in tomnál kin welaꞌ an dhutsadh úw ani kin wékʼontsi an tin pajkʼíl?

3 Por nibal walkʼiꞌ, nibal chabál, nibal alkʼidh ban chabál, yab waꞌach ni jun xitaꞌ xi neꞌech kin ejto kin welaꞌ an dhutsadh úw, nibal elaꞌ kin telaꞌ. 4 Nanáꞌ in ukʼin tʼajat abal yab elan ni jun xitaꞌ xin tomnál kin welaꞌ ani kin ajay an dhutsadh úw, nibal elaꞌ kin telaꞌ. 5 In utsan tám enchéꞌ kʼal jún ti éb an yejcheltsik:

―Yabich más ki ukʼin, pos xu kidhtaláb kʼal na Judá ani u kidhtaláb jeye kʼal an pulek takʼix Dabid, in átámalich ani neꞌech kin ejto kin welaꞌ an dhutsadh úw ani kin wékʼontsi xi búk an tin pajkʼíl. Jechéꞌ an kidhtaláb, in koꞌol in cháp ani in awiltal jelti an padhum, jaxtám tu bijyáb ti padhum.

6 U telaꞌ tám juní ani u chuꞌu ke junax chʼejel ban tʼokat kʼwajtaláb, ba xi chéꞌ xi taꞌ ti kʼwajat ejattsik ani junax chʼejel ban yejcheltsik taꞌ ti kubúl an Ajátikláb xi jaꞌich jelti an borrego xu pikbantsáb na Dios, por kʼwajat jelti max chemdhats. Jechéꞌ xi jaꞌich jelti an borrego xu pikbantsáb na Dios, in koꞌol búk in ichʼám ani búk in wal. Nin ichʼámtsik ani nin wal, jaꞌich xi búk nin ejattal na Dios xi kʼwajat putálkʼi an kʼayꞌlá. 7 Jechéꞌ xi jaꞌich jelti an borrego xu pikbantsáb na Dios, kʼale ani in bachʼu an dhutsadh úw xi taꞌ tin koꞌol bin eját kʼubak xi taꞌ ti buxúl ban tʼokat kʼwajtaláb. 8 Tam tin téynaꞌ an dhutsadh úw, xi chéꞌ xi taꞌ ti kʼwajat ejattsik ani xi jun inik chéꞌ an yejcheltsik, tudhlan tin tamét an Ajátikláb xi jaꞌich jelti an borrego xu pikbantsáb na Dios. Ejtaltsik in teykóm juntsik i són ani in teykómtsik jeye i lejab xi tʼajadh kʼal i oro tsʼutsat kʼal i ikob. Jechéꞌ an ikob, jaꞌich jelti nin ólábil xu dhabalábichtsik kʼal na Dios. 9 Ani in ajatnáltsik jechéꞌ an ít ajatláb:

Tatáꞌ nin tomnál ka téynaꞌ an dhutsadh úw ani ka wékʼontsi an tin pajkʼíl;

pos Tatáꞌ i chemdhá ani kʼal na xichʼál tu chʼaꞌyámal abal ku dhabalnájich kʼal na Dios,

ejtalkʼi an kidhtalábtsik, an káwintaláb ani an atiklábtsik.

10 Tu pidhámalich ti awiltaláb abal ku kʼwajay tu pakdhaꞌ takʼix ani tu páleꞌ abal ni Diosil,

ani neꞌech tu takʼix ban chabál.

11 Tayíl u telaꞌ juní ani u axtsi tin káwintal yán i tʼokat abatwáletsik xi taꞌ ti kʼwajattsik malilíl ban tʼokat kʼwajtaláb, ba xi chéꞌ jeye xi taꞌ ti kʼwajat ejattsik ani ba xi jun inik chéꞌ an yejcheltsik, 12 ani in ulaltsik kawidh enchéꞌ:

An Ajátikláb xi chemdhá, xi jaꞌich jelti an borrego xu pikbantsáb na Dios,

in tomnál kin kóꞌoy an chápláb, kin dhabalnaꞌ ejtal xowaꞌ waꞌach,

kin kóꞌoy an chalpadhtaláb ani an chapniꞌtaláb.

Jajáꞌ kin bachʼu an kʼakʼnaxtaláb ani Jajáꞌ kin kóꞌoy an labidh tʼokattaláb.

13 U achʼaꞌ jeye ejtal xowaꞌ tʼajadh kʼal na Dios, xi kʼwajat walkʼiꞌ, xi kʼwajat chabál, xi kʼwajat alkʼidh ban chabál, xi kʼwajat ban pujal ani ejtal xowaꞌ xi waꞌachtsik tajaꞌ in ulaltsik enchéꞌ:

Kin bachʼu an kʼakʼnaxtaláb, kin kóꞌoy an labidh tʼokattaláb ani an awiltaláb malilíl i kʼij,

xi buxúl ban tʼokat kʼwajtaláb ani an Ajátikláb xi jaꞌich jelti an borrego xu pikbantsáb na Dios.

14 Xi chéꞌ xi taꞌ ti kʼwajat ejattsik, in ulal enchéꞌ:

―¡Anchanꞌ ka tʼájan!

Ani xi jun inik chéꞌ an yejcheltsik tudhlan kututsik asta chabál ani in kʼakʼnaꞌtsik xi kʼwajat ejat malilíl i kʼij.

<- APOKALIPSIS 4 APOKALIPSIS 6 ->