1 Max u witʼálak tin káw kʼal xowaꞌkichkʼi i káwintaláb xi techéꞌ ti chabál ani xi walkʼiꞌ, por yab in kʼanidhax, u junwal jelti nukub xu tʼenyáb o jelti patʼál xu tsʼimbix. 2 Max u koꞌolak i awiltaláb ku ólnaꞌ i tsubaxtaláb xi tál ba Dios, max u exbayalak ani u choꞌóbak ejtal xowaꞌ kʼwajat yab tejwaꞌ ani max in belomak tʼajat ke asta u utsál an chʼéntsik ka yoyon, por yab in kʼanidhax, yab xataꞌ u éy. 3 Max ku pidhaꞌ ejtal xowaꞌ u koꞌol an chʼojontáltsik, o ku pidhnaꞌ tubáꞌ kin tsikan kʼal tin kwenta an alwaꞌ tʼilab, por yab in kʼanidhax, ejtal jechéꞌ, yab xataꞌ ti alwaꞌ.

4 Xitaꞌ u kʼanidhax, in koꞌol i chaꞌattaláb, alwaꞌ inik, yab in chakuntsal ni jun xitaꞌ kʼal tin kwenta xowaꞌ in koꞌol ani yab in tʼekʼál tinbáꞌ. 5 In lujtalkʼi u káw ani yab in ayal xataꞌ abal jajáꞌkʼi tin alwaꞌbíl; yab u chakulom nibal u jilkʼonal ti chakúl max ka tʼajtsin xataꞌ yab alwaꞌ. 6 Yab u kulbél max kin chuꞌu jun xitaꞌ in walál, u kulbél tam kin chuꞌu u tʼajnal xowaꞌ alwaꞌ. 7 Xitaꞌ u kʼanidhax, in kóꞌontsal ti chaꞌattaláb xi kʼeꞌet; in belál xowaꞌ ka utsan ani in aytsal kin jilaꞌ kin tʼajaꞌ xowaꞌ yab alwaꞌ xi kʼeꞌettsik. In kuxyal jeye ejtal max ka tʼajtsin xataꞌ yab alwaꞌ.

8 An kʼanidhaxtaláb yab jaykʼi in koꞌol in okʼontal. Neꞌech kin bajaw an kʼij tam yabich neꞌech ka ólná i tsubaxtaláb xi tál ba Dios, nibal xitaꞌ neꞌech ka káwin kʼal xowaꞌkichkʼi i káwintaláb ani yabich jeye neꞌech ka yéntsin i chalpadhtaláb. 9 Pos ejtal jechéꞌ, wéꞌ ti exlál ani wéꞌ jeye ti ólnál i tsubaxtaláb xi tál ba Dios; 10 por tam ki exlaꞌich ejtal, xi wéꞌ, neꞌech ka wékʼon.

11 Tam ti nanáꞌ in chipíl, in káw, in chalpax ani u tʼajál xowaꞌkich jelti jun i chakam; por tam tin inikbéch, u jilaꞌ tu kúx ejtal xowaꞌ u tʼajál tam tin chipíl. 12 Anchanꞌ jeye, xoꞌ i telál na Dios, por jelti max yab i chuꞌtal alwaꞌ. I chuꞌtal jelti jun xataꞌ xu xalkʼanal ba jun i podhenek lam, por neꞌech kin bajaw xowkʼi neꞌech ki chuꞌu alwaꞌ. Xoꞌ tokot wéꞌ u exlál, por neꞌech ku exlaꞌ alwaꞌ, jelt xan ti na Dios tin exlál nanáꞌ. 13 Anchanꞌ pé, an belomtaláb, an aytsixtaláb ani an kʼanidhaxtaláb, neꞌech ka kʼwajay echʼekʼi; por xowaꞌ más púlek kʼal xi jechéꞌ óx, jaꞌich an kʼanidhaxtaláb.

<- 1 KORINTIOS 121 KORINTIOS 14 ->