An thuchath u ani an Ajatic axi bijiyab jaye ti Cordero
1 Taley u tsu’u a Dios quetel tin lej ts’alat coytal c’al i t’ulilith thuchath u tin huinab c’ubac. Thuchath an u tin hual ani tin cux, ani ts’at’at buc i timbre ti junchic ti junchic tin tamcul. 2 U tsu’u jun i ángel lej pulic in ey. U ats’a’ quin conoy lej cahuith antse’:
―¿Jita’ hualam in huit’al quin huila’ nixe’ xi t’ulilith thuchath u ani quin tixc’anchi xi buc i timbrechic?
3 Ni jita’, ni i ángel ti eb, ni i inic ti tsabal, ni i ejattalab tin alcom an tsabal jun ti c’uajat in ejattal axi tsemenequits. Ni jita’ yab hua’ats ax in huit’al quin huila’ nixe’ xi t’ulilith thuchath u abal quin met’a’ jahua’ in cua’al thuchath. 4 Cum yab hua’ats jita’ ax in huit’al quin huila’ quin met’a’ abal quin ajiy, jaxtam in lej uq’uin. 5 Tamna’ jun axi c’al nixe’ xi jun inic c’al tse’ i yejtselchic tin ucha’ antse’:
―Yabats quit uq’uin, cum hua’ats jita’ ne’ets quin huila’ nixe’ xi u. Pel i inic ax in atamalits patal c’al ax ti tomolna, ani jaxtam in huit’al quin huila’ an u ani quin tixc’anchi xi buc i timbrechic. Ja’its an Ajatic. Cum in lej cua’al in tsap ejtil i tsoj jaxtam tu bijiyab ti Tsoj. Pel i juntalab c’al an cuenel Israel im bij Judá. Ani pel in at juntal xits’al am biyal ts’ale David.
6 Tamna’ u tsu’u ts’ejel jun ti quetel a Dios tin ts’alat coytal ani nixe’ xi tse’ i ejattalab ax tu olchits, cubat an Ajatic axi bijiyab jaye ti Cordero ejtil max tsemthamejits. Tin tonith jaja’ c’uajat nixe’ xi jun inic c’al tse’ i yejtselchic. Ani an Cordero u tsu’u ejtil max in cua’al buc in its’am ani buc in tsu’uxtal hual. In tsu’uxtal hual in le’ quin ulu ejtil nixe’ xi buc i espirituchic ax u abnal c’al a Dios tim puhuel an tsabal quin t’aja’ jahua’ ca uchan c’al jaja’. 7 Utey jaja’ an Cordero jun ti quetel a Dios tin lej ts’alat coytal quim bats’u an t’ulilith thuchath u axi c’uajat tin huinab c’ubac a Dios. 8 Ani tam tim bats’umalits, tam nixe’ xi tse’ i ejattalab ani nixe’ xi jun inic c’al tse’ i yejtselchic in tuthuhual in c’ualal tin tamet an Cordero. Tim patal nixe’ xi yejtselchic in cua’al tin c’ubac i arpa ani ejtil i lac oro t’uchichic c’al i jom. In nihuihuiltal nixe’ xi jom lej culbetnanchab an inic pel ejtil axi huahua’ i conchixtal c’al a Dios. 9 Ajtinchab an Ajatic i it ajatlab antse’:
Cum it tsemthame ani tu ts’a’iyamal huahua’ c’al a xits’al, jaxtam a bajumal ca bats’u nixe’ xi t’ulilith thuchath u ani ca tixc’anchi xi buc i timbrechic.
Pel tu c’al a Dios huahua’ yan tu pil at juntal xits’talab ani tu pil cahuintalab. Ma tim patal am bichouchic ani tim patal i pactha’ bichoulomchic teje’ u c’uajat.
10 Tu punumalits tu ts’alechic ani tu pale’chic c’al a Dios. Ne’ets qui baju tu abatnom c’al an inicchic axi teje’ tsabel.
11 Tam u tsu’u yantalam i millonchic i ángel tin tonith in lej ts’alat coytal a Dios ani xi tse’ i ejattalab ani xi jun inic c’al tse’ i yejtselchic. U ats’a’ cauchic. 12 Lej cahuith ti cau in ulalchic antse’:
Cum tsemthame jaja’ axi bijiyab ti Cordero, jaxtam im bajumal ca pithan c’al a Dios i pulic eyaltalab. Im bajumal quin thabalna’ patal jahua’ hua’ats ti eb ani ti tsabal. Pithnenec i tsalpathtalab ani i ahuiltalab quin t’aja’ jahua’ quin le’na’.
Jaxtam i c’ac’nal an Cordero. Jaxtam i puhuethanchal ani i ajtinchal im bij.
13 Taley u ats’a’ cau tim patalchic an ejattalab ax ti eb, ani ax ti tsabal, ani axi tin alcom an tsabal jun ti c’uajat in ejattal axi tsemenequits, ani patal axi xe’ets ti al an ja’ abal ju’tamq’ui. In ulalchic:
Qui ajtinchi ani qui puhuethanchi abal ets’ey im bij a Dios axi quetel tin lej ts’alat coytal ani jaye an Ajatic axi bijiyab ti Cordero. Pulic in eychic ani in cua’al in tsap abal quin t’aja’ patal jahua’ quin le’na’.
14 Nixe’ xi tse’ i ejattalab ax tu olchits in ulal antse’:
―Anits qui t’aja’.
Ani xi jun inic c’al tse’ i yejtselchic in tuthu in c’ualal tin tamet a Dios axi ejat abal ets’ey. In c’ac’nalchic a Dios.
<- APOCALIPSIS 4APOCALIPSIS 6 ->
