1 Í̠naga dinini haabobo haga kago ibu bibahendeha ho to̱lai ka. 2 Ani kagome í̠ mbirali ko birago hendore tiga biaga ke. Anduane Homogo-o wali agalime ko mbira biyagua tinime handalu tiga bulene ngadagua mo tiga bilo í̠na mini mo wia haga ke. Í̠na tihondo bi hongo howa lamialu ko bialu kemigo wahai halu í̠ninaga biamogo biaga ngego manda bialu yutiga bilo ani biaga ke.

3-4 Í̠na wali agali hameigini tara bamba í̠naga dindi ngegoria hearuhondo turu nahe hene. Tigua mana koore wiaru dewa biaabo halu tomia bialu dama togo wialu mbirale gime wabini wiaruhondo bi pupu wialu hene.✡Man 12.31, 18.9-13 5 Tigua dara naheore howa tinaga waneigini homelo balu wali agalinaga tingini daramarubi nalu hene. 6 Wali agali dindi ogoniha haga hearume mana ko bulenaga bi pupu wiaga howa ai aba ai̱ya hearume tinaga waneigini galiru homelo baga hene. Ani bialu haga heago hondowa í̠nime inanaga mamaliruhondo lamialu, Wali agali dindi ogoniha hene karu homelo bo wahai halimu, lariya. 7 Ani bialu dindi ogoni í̠ni gubalini timbuni howa dindi maru ngaru gubalini anidagua nahe ke. Ani howa í̠naga wali agali ti dindi bayale ogoniha helo hame lede. 8 Anigo dindi ogobi í̠nime gubalini ho hariyago irane wali agali dindi ogoria hene hearubi nde í̠nime wabini dege heagola biriya. Ainde í̠na ema bialu piaga berearu ala bamba halu wali agali waitigi bu hearu hendore mbira balu homelaga bule pudaba lowa í̠naga mamage agali hearu mani pelariya.✡Har 23.28 9 Agali mana ko biaga karu bo wahai helo agali bayale biaga karu biamogo biaga í̠naga hongo gibi nge. Í̠na bi hongohe mbira laregomebi mbirale ema bialu piaga biru karu ibilalubi waitigi bu karu abaleore homai helo bo wahai holene karulape ke. 10 Anigo í̠na ogonidagua nabiaga. Tigua bu mini beregedelonaga hendore dege mo tandaga haga biaga ke. Heneneore ti wali agali ko biaga waneigini howa ti wene waneigini gali heangi ko biawai hene kago í̠ manda bide. Ani bialu tigua mini beregedabe nahe kagobi í̠ manda bu ke. 11 Ani bialu kago irane bambaore howa wali agali bibahende í̠naga deni nahe pu ereba hai hene kagome ani biaga ka. Heneneore tinime ko biyago karulape pani nelo nami hari. Í̠na ti pani nelo nami harigo irane í̠na agali mbira gi howa ndo í̠na ti dara ho howa pani nami wahariya.

12 Ngode Datagaliwabe-o í̠hondo o beregoni agile berebe labehe ai kabe. Ani bialu í̠naga bi mo wahabehe mbirali ai kabe. Ani bialu wali agali bibahende í̠nime wabini bu karu bibahende bo wahai hariyagua ko birida lalu í̠hondo laba lolene mbira ai kabe. Ani bialu wali agali ko biaga bu karunaga bi lamogo bia hole mbirali í̠naga deni ai ibu holebirabe. 13 Mbiralime urunidagua bibe nahego irane mbirale bibahende í̠nime handaya ho howa haru hai haga ke. Ani bialu ogoale biru ogoale laru lalu í̠na lamulene bi pupu wiaga wiarualebi mbira naheore. 14 Ani bialu ína wali agali bo wahai hariyagua agali haguane mbiramebi kini mbiramebi í̠na ko birida lalu bi ladai bulene mbira naheore. 15 Í̠ tigabiore howa í̠na mbirale ngaru mana tigabi handaya ho holene ngadagua handaya ho haga ke. Í̠na mbirali ko nabiaga kago bame laede halu ko birida nalaga ke. 16 Anidago irane mana tigabi í̠na biaga ngegome í̠naga hongo gibi ngego mo walia haga nga. Í̠ni tinaga Anduane Homogo howa wali agali bibahendehondo dara hai haga ke. 17 Wali agalime í̠ hongo naheda lo manda bu kangi í̠naga hongo ngego mo walia haga ke. Mbirali í̠naga hongo ngego manda bu howa mine haga karu í̠na ti pani nelo mialu minu baga kegoyu tinime mine halu í̠ erembira ngiaga ka. 18 Hongo damene bibahende í̠ninaga giha yu howa ina wali agali pani ngulene ngangi ngialu minu baga ke. Anigo ina baba daba ki lolene ngangi ina wali agali dara holene irane nawini dara haga kegoni. Í̠na ina wali agali mana tigabi ngagoria howa hendore haru haga ke.

19 Í̠na mana ogonidagua birigome mbirali tigabi kago ibugua wali agali tigabi bu karu mini turuho haga lalu biawai hari. Í̠naga waneigini tigua ko bialu hayaru erembira mialu í̠ni keria dai bilo hondo haga kegonaga tigua í̠hondo mini mbiraore hongohe wua ka. 20 Í̠na keba abale tungu nale howabi í̠naga wali agali waitigi karu abale nabagabi kegoni. Heneneore ko tinime biyagonaga tiniore homolene nga. Anigo ainde mana ko tinime bialu henedaru yu wahai helo henge miaga ke. 21 Í̠naga waneigini tinaga mamaliru baba habo nalolene bi lo winiyago ngelowabi tihondo mbirale bayaleru nguliya lalu bi lo winiyago ngelowabi uruni ani ngela lowa í̠naga waneiginirume ko biyaore lalu mo ko howaore dabariya.

22 Heneneore í̠nime ina pani ngiaore biri. Anigo ina baba waitigi karuhondo pani nelo dewaore daosini dege pihalu (10,000) agima mo miaga ke. Í̠na ogonidagua birigo irane ina wali agalime mo tiga bialu larago hale halu howa í̠naga mana dara holene irane nawini howa dara haga kego manda bu howa hale halu mo tale buluma̱ya biri. Ai ko iname bidemangi tigua ina mo tiga bilo anidagua pu howa nde tigua ina dara helo malia ho holeberema.

23 Ani bialu í̠na maru lulu yu howa mana ko wiagoha talima pialu hearu tandaga nelo migi biriya. Anidagua biriyago irane tinime mbirale ema bialu piaga ko hearuhondo bi pupu wima pialu hearia tandaga nelo mo miriya. Ainde mbirale ema bialu piaga urunime ti tandaga nelo mo miya. 24 Tigua bi henene lolenenaga hariga ngago wahai halu puwa mbirale ema bialu piaga ko bu hearuhondo bi pupu wima piya. Ti waneigini gali mini nawiore hagagobi howa lulu yu ibaga bu ka. 25 Í̠naga deni wali agali uruni mini bayale nawiore waneigini ale kagola í̠na ti baba daba ki bialu pani nelo mo meregobi nde mo ko holeneore ndo bame wali agali tara tara bu karume de hondowa oba halu mege bilo manda buwa mo miaga ke. 26 Pigane ti mini beregedelonaga genda emene hangu mo mirili. Anidagua beregola tigua í̠naga dara howa biamogo bulene ngago manda nabi kagome ai tiha í̠naga manani tigatigaore mo tale bulene ngadagua mo tale bulebere. 27 Mbirale ema bialu piaga uruniale tinaga bi pupu wiaga hearume tinihondo tandaga taraore nelo miya. Anidagua biyagome tinaga miniha mo wála hayagola abale howa Ngode Datagaliwabe tigua manda bulene manga ho heneyago hendene. Anidagua bialu tiha mo ko holene timbuniore mo yu anda ibini.