2
1 I̱ Sarono dindi ira teha palawaya minana anda haragobi bedo.
I̱ hari bu karuha dindi ulini ngaruha palawaya dedagobi bedogoni.
Igirime iba gana lenego ogo
2 Datani anihe bu karu dombeneha palawaya hagadagua
i̱ lawini biago ibu wali dege dombeneha bayale birarua.
Wandarime iba gana lenego ogo
3 Ira dege dombeneha ira lini bayale daga mbira hagadagua
i̱naga yamali biago ibu agali dege dombeneha biatago nahe kagoni.
Ni tandagabi darangi i̱ ira ogoni teneha gumba birulene hameore ledo.
Ira ogoninaga lini bayale dedago do narogola i̱naga ne harigaha dendeore biagane.
4 Ibunaga anda heagoha tomo timbuni dawa wiagoria ibugua i̱ haru piya.
Tomo nagane anda biagoha labolabo bayaleorerume yári bidagonaga turu haradagua
ibugua i̱ gubaliniore hayagonaga turuho kogoni.
5 I̱ lawini i̱na ibu gubaliniore kogola i̱naga kuni gedaore halu hongo naharuago
aiore ira linirubi gerebi lini do gembe binirubi i̱ hongo helonaga nabehe bedo.
6 I̱ lawini biagome ibunaga gi lehagome i̱naga mahayagi yani halu
ibunaga gi tigagome i̱naga tinginini yani haya.
7 Yarusaleme waliru-o tígua nogo gabua mini dia karu mitangi bialu
mbira nabuleore lalu i̱hondo bi lo widaba.
Mbirale ogoni iyanagago tígua iya mo mogola howa
gubalini holene mo dala hangu hangu nahalimu.
Iba gana mende
Wandarime iba gana lenego ogo
8 I̱ lawini i̱ bedoria ibaruane hale ko.
Ibu amura hari bare wiagohayagi howa
pogola edene bima gerai lalu ibaruane hale ko.
9 Ibu gerai lalu biango dudu aleme dai lagadagua lalu
nogo bulumaga wangabe daliaheme dai lagadagua lalubi ibarua.
Abale ibalu anda mandaha íbu kago hendedo.
Íbu howa ibu windoha handa anda haragoni.
10 Handa anda howa ibugua i̱hondo bi langiragoni.
Igirime iba gana lalu ladai binigo ogo
I̱naga lawini gubalini-o tagira íbu.
Yamali-o iya haru áyu mbaliya tagira íbu.
11 Iba dalu to hayago dalunaga gi nahabe.
12 Áyu ogoni dindi bibahendeha palawaya dame kago
ai iba gana lolenengida.
Ega bedarume turu halu bi taratara lagalaga biarua.
13 Ira poge ale karume lini dalu ibirarua.
Pu kuabu tara tara irabuha karume lini dagadaga biaruago
ai palawaya uruninaga nga baya taraoreda.
I̱naga lawini gubalini-o tagira íbu.
Baya-o iya mbaliya tagira mbaibu.
14 Í̠ andaga tamuha ega emenerume ibuni andaga ege kaba ngagoha bira do hagadagua bira do haridago.
Ainde í̠naga dengui baya hondoabago hondoliya tagira ibalu
í̠naga bi baya tara laruegobi hale holiya tagira íbu.
15 Biango dudu emene bu karuni minu yani hadaba.✡Iba 80.13, Ese 13.4, Lg 13.32
Iyanaga gerebi mabu gamaha anda ibuwa palawaya bayale dedaru mo ko holigo abale minadaba.
Wandarime iba gana lenego ogo
16 I̱naga yamali ogoni ibu i̱ agalini kagola i̱ nde ibu one bedogoni.
Ibugua ibunaga nogo memeru palawaya bayale bu karu dombeneha tani nelo haru pu haga.
17 Ibugua nogo meme biaru handayaho kane dege ni anda pialu dagare bulebira.✡Sol 4.6
Hari bare hombene bu ngaruha nogo gabua mini diame gerai lalu ibagadagua
i̱ lawini-o í̠ abaleore ibabelo hameledo.