1 Dogoda biabe biaga karunaga mini mo yaraga holene nga. Ani bulene ngago irane ibugua í̠ baya hanguore handaya ho hagabi Ngode Datagaliwabe ibunime dabo helenebi kagonaga ibu mini yaraga holene nga. 2 Anduane Homogo Daligaore kagome wali agali warago bo ngaru mo dabi helonaga manda dogoda tihondo talebu biyagola gabumane kagome ti yolo biragola biabe bialu haga ka. 3 Dogoda ibu ibunaga manda ngadagua ibunaga henge mo wu kagola agali haguane karume ibu bayale baba bialu haga ka.

4 Datagliwabehanda marasini tara dindini wini ngarume wabini ngagome wali agali tigua marasini mo nagalone habe naheore. 5 Bambaore howa ira mbirame iba ko kaubi bereago nolene bayale helene. Ani mo dende bia hayagola wali agali bu hearume ira ogoninaga hongo tara winiyane hendene.[a] 6 Wali agalime Anduane Homogo ibuninaga mini mo yaraga halu mini leneore kagoni lelonaga ibugua ti manda bulene mo mini. 7 Ibugua wali agali warago bo ngaru mo dabi halu tinaga tinginiha tandaga ngaru mo wahai haga ka. Ainde dogoda bu karu tigua ira yuni tara tara bu karu yuwa marasini tara tara ngaru wabiaga nga. 8 Ani bialu kagome Ngode Datagaliwabenaga biabe bu hawia nahe bialu haabo kagoni howa wali agalinaga holene bayale ngelo mo tiga biaga nga.

9 Waneigini-o warago bayagua ogoni bame bira lowa mo nagalene holeni nahabe. Ani nabi howa í̠ biamogo bialu mo dabi habe lalu Anduane Homogohondo bi lolene nga. 10 Mana ko bulene ngaru handalu hogorale bialu puwa mana bayale ngago talialu bialu howa mana ko í̠naga miniha hengedego dugu wahai halu buwa holene nga. 11 Loma bu merego nde balawa bayaleni olibe lini ibaneme wabini weli bayale ngaru odoba howa loma ngabioreru bu mulene nga. 12 Ani biai halu mani howa dogoda Ngode Datagaliwabe ibunime dabo helene kagohondo í̠ biamogo bia lalu lamulene nga. Dogoda kago ibu í̠ biamogo bulene ngago manda bialu ibu í̠ wahalu pelo yupe nahabe. 13 Heneneore marungi warago timbuni ngago biamogo bulene dogodameore biamogo bialu mo dabi holebira. 14 Anidagua biaga ngago irane dogoda tiguabi warago bo ngagonaga tandaga nalu ngago mo wahalu warago mo dabi holene hariga maru mo walia ha lalu tigua Anduane Homogohondo bi laga ka. 15 Wali agalime Ngode Datagaliwabenaga deni howa mana ko biyagua nde tiha warago anda ibiragola ti dogoda hondolene nga.

16 Waneigini-o wali agali mbirago homaragola í̠na ibuhondo dara halu dugu bialu howa dara ho kego mo walia halu kiabu dugu bulene ngadagua bulene nga. Homa tingini ngagonaga mini mo yaraga hole baya hangu mo manda manda bu ngelowa hora holene nga handala wahalu napobe.[b] 17 Mbirali homo ngagola tínaga biagane mana ngadagua bialu dara howa dugu bilimu. Hora howa nde wali agali maru bu karume í̠ mege buligo duganda hagadagua hora howa halu mani nde latara halu haga haga bulene nga. 18 Dara holene ngagome wali agalinaga hongo bope haga ngago dara haho wiaabo holene nawigo tigi mbira hangu dara ho holene nga. 19 Heneneore mbirali homarago hora halu purogo lowabi dara ho haabo hagago ainde ani dara ho haabo keria í̠naga holene ngagoha yagi mo ko holigo manda bibe.

20 Luore dugu bialu haabo holene nakarulape nga. Í̠naga biabe bialu haga wirigo í̠ni abale ibabelo maliaho ngago manda bibe. 21 Mbirali homarago lone mo heya halu haru dai bulene nawiorego baya hangu manda bibe. Í̠niha dara holene ngagome í̠ni dege mo ko holene nga ndobe. 22 Hale harene. Í̠nibi nde homole dege kegoni ndobe. Abe mbirago ibu homayago ayu henge í̠naga ngelo kegoni ndobe. 23 Mbirali homarago hora halu howa í̠naga miniha genda hui hame ngego damene bibahende hora hamaga habe. Ibunaga dinini pedaha í̠na ibuhondo lone mitangi halu holene nawigo mitangi nahabe.

24 Wali agalime mbirale mbira baya hangu manda bule hame lo heagua nde ti lo manda bialu birulene henge ngelolene bayale. Wali agali tinaga biyinayaha mini piai hene kagome mbirale mbira lo manda bibe nahe ka. 25 Agali dindi aliaga kago ibubi mbirale lo manda bibe nahe nga. Ibunaga bulumaga karume dindi tombelo bo daila halu howa ibunaga mini biabe ogoniha piai helowa ibugua bi mende tara ngagonaga bi lolene henge nawiore kagome mbirale uruniale lo manda bibe naheore ka. 26 Ibunaga mini mabu biabe bulene ngagoha piai helalu ibunaga nogo bulumaga hungubalua kagonaga tomo nelo mule taya bulenego dege mitangi bu haga ka.

27 Uruni ti agali irame wabiaga karubi bebani wabiaga karubi ogonidagua dege biaga ka. Tigua mbiraga horombebi biabe dege bialu haabo haga ka. Tigua irame wabialu howa ogoriani yari tara tara bia holenenaga aguaore berogola karulapedabe hondole ogoni hangu mitangi tangi bialu haga ka. Ani bialu biabe ogoni dege bialu haabo howa bu maro bialu wahaga ka.

28 Agalime aeanebi mbirale gahange ngaru wabiaga bu karu tiguabi anidagua dege biaga ka. Ira hongohe dedagome tini dalu do poboyogo bia hagane nga. Aeane hamame baragola hale poboyogo birago bilowa tinaga mini biabeha hangu piai helowa aeane hongohe ngaruni hamame bo dambigi bialu mbirale wabialu haga ka. Ani bialu ibunaga mini mbirale wabialu wabu maro buleneru hangu mitangi buwa wabiai halu wahaga.

29 Agali be dindime wabiaga kagomebi anidagua dege biaga ka. Ibugua biruwa ibunaga geme garo geale dindiha ngago mo beregedaga nga. Ibunaga miniha biabe baya hangu bulenego hangu mitangi bialu daga ogodagua wabibe lalu lamiyadago abale wabiai holene mitangi biagane nga. 30 ibugua dindi dongoma ngago dugu ngelowa geme hengedo waru wia hagane. Ani biai howa gime be wabiaga. Ani wabiai howa mo yaribia holenego mitangi bialu howa biabe bu maro bialu ibunaga biabe uruni bialu haga anda kago baya hangu mo tiga biai howa mburuma bu wahai halu u palue piagane ka.

31 Wali agali tinaga gime biabe bialu haga karu tinaga biabe bulene ngago baya hangu manda biaihe ka. 32 Agali biabe biaga uruni ale mbira naheyagua nde tano bu ngaru timbu habe naheore. Ani bialu wali agali tanoha nakale dege. 33 Anigo agali biabe biaga uruniale karu ti ganisolo karu aria mbirago holenebi ti gabumaninaga agali haguane holene ngarubi nahaga. Ti godi hale halu mo tale biaga karu ale holenebi 34 tigua mana lo wini ngago baya hangu manda nabibi ka. Tigua lawai helo napene howa tinaga manda bayale nawi ka. Ani bialu tigua bi bayale wále mbira nalolebira. Anigo agali uruniale kago ti dindi ogoninaga hongo holene pini howa tigua Anduane Homogohanda tinaga biabe bialu karu mo hongo helo bi laragola ibugua tinaga bi larago hale haga ka.

<- SIRAGA 37SIRAGA 39 ->