1 Ai wali agali mbira kagohondo keba halu lai lolene manda biriyagua nde ibu abiale kabe ala dabo handabe. Ani handaregola ibuhondo lai labe naheda lo manda biriyagua nde wahalu í̠ bi nale waholene nga. 2 Ainde í̠naga keba ogoni wia ho wiaabo holigo ayu ogoni abale la tagi holene karulape. 3 Í̠na bia ko hene ngago latagi hariyagua nde í̠naga mini mo ko holene nawulebira. 4 Í̠naga godi larego lo bolangua haga kago pani mialu bulene nawi. Í̠ agalime wali mbirago ibugua í̠ hame leaguabi nale bereaguabi harugo lowa agalime ibu dabu bule manda bu hagadagua habe. 5 Wali agali maru ti bi nale hondo haganego irane ti mini gigabiwime haga. Wali agali maru bi dewa lagimbu bialu hagago maru bu karume tihondo turu nahe haga ka. 6 Marume bi nale hagago tigua lolene mbira nawidagola haga. Marume bi nale hagago tigua henge bayale tigua bi labehe wilonaga hondo haga. 7 Wali agali mini gigabiwi karu tigua bi nale hondo howa tigua bi lolene henge ngagola tinaga bi latagi haga. Anigo lulu mini nawi karume kudaga bi lo paya bialu tinaga bi lolene henge nawini bame lo pebe bialu haga. 8 Agali bi dewa laabo halu nabulene wali agali mende kago bi lelo henge namiaga karu wali agalime handabe manga haga ka.

9 Horo kongi wali agalime mbirale bayale ngaru mo yu halu horo bayalengi ko ngaru mo yu haga.

10 Í̠na agali mbira biamogo beregola ibugua í̠ yolo nabi polebira bada. Agali mende biamogo beregola ibugua í̠ yolo halu kira bulebira bada.

11 Agali mini lene timbuni kago mana agali damene maru karubi dege holebira. Ani bialu agali damene bame karu horo mbiru mini lene timbuni holebira.

12 Í̠na muni emene mbira wahalu mbirale emene ngago bayalebe toba howa yolo bulebere. Anigo mani howa muni dewaore wahalu ogoniale dege yolo bulebere.

13 Wali agalime tihondo bi bayalego hangu lamilo hame laga. Anigo wali agali lehe karume bi nagalone ngaru lalu ladebodebo biaga karu ti turu nahaga ka. 14 Wali agali mbirame mbirale mbira í̠ mo turu halu bame ngiyagua nde ogonime í̠ biamogo nabulebira. Ibunime í̠hondo mbirale ngerobe toba howa ngiragoyu ai ogoni bayale ndo nagalone dege nga. 15 Emene bame galoneale ndo ngago ngulebira. Ani bialu ibugua bi ko ngago lalu wali agalime de hendelo bi hongo howa huaro lalu lama ibaga bulebira. Ayu dano helo mialu yawi lone mo yu dai bulebira. Wali agali mana urunibi biaga karu í̠ hame nale ke bada. 16 Ibugua lalu, I̱naga nenege mbira naheore. Wali agali bu hearume i̱na bayale birugo ngiadai nabiya. 17 Ti tomo nolene i̱na wiwago dege nalu howa mani tigua i̱ mege biya, lolebira. Henene larogo wali agali bibahendeme ibu hondowa oba haabo haga ka.

18 Í̠ harigani pilariyagua nde í̠ mo ko hene nga. Anigo í̠na ke howa mo ha halu te lariyagua í̠ mo ko timbuni holene nga. Anidagua dege wali agali ko biaga bu karu mo ko holene abaleore ibulebira.

19 Wali agali te laga galone nabulene karu te laragola wali agali bu karu ti hale holene manga halu pugu biagago irane te wali agali ti hale hole hame naledago laabo haragola ti manga haga ka. Anidagua dege wali agali tigua bi irane galone ogoale laro lo manda nabi howa bi lo pebe bialu karu manga holebere.

20 Mbirali bi la ko haga kagome bi bayale lalu heagua wali agali ti hale habe manga hai holebira. Hale habe manga hai holebirago irane ti bi ogoni hale hole manda nabi kago bame bi dege lopaya biragola tiha anda napolebira.

21 Wali agali maru ti yagibano kagome tigua mana ko bulene henge nawiore ka. Tiha genda halu mini burugu lolene mbira nawi howa ti u baya hangu paluebira.

22 Wali agali marume agali mana lehe biaga bu karu deni howa tini mo ko haga biagaya.

23 Wali agali marume ti aria kagohondo bi ko lolene taga howa tigua mbirale mbira buleore lalu bi lo wiagaya. Anigo daraba. Tigua buleore lalu ti damenehondo bi lo wiyago bame bi dege lenedagola tinaga nenege biarume keba timbuni howa ti baba lone mo waitigi ho hagaya.

24 Ke̱ hagane mana wali agali tininaga mini heba haabo hagane nga. Anigo mana lehe bialu haabo haga karu tiha mana ogoni bialu haabo haga nga. 25 Wali agali bu karume maru mbirale page biaga karubi ke̱ haabo haga karubi ti hame nalagaore. Mana kira ogoni biaga karu bibahende mo ko holene wulebira. 26 Wali agali ke̱ haga karu tinaga mini wali agalime mo ko haragola ti bibahendengi taga ho haabo holebira.

27 Wali agali mini gigabiwi karu tigua bi bayale dege laga kagome ti bayale holebira. Agali haguane bu karume wali agali urunibi kago turu haga ka. 28 Wali agali e baya hangu hengedago ibu tomo dewa nalu haga ndobe. Wali agali biabe bayale biaga kago agali haguane kagome ti turu ho haga. Haguane kagome wali agali uruni tigua ko emene bini ngago mitangi naholebira.

29 Wali agali mini baya wi ha heneyaguabi mendeali kagome ibu mo turu halu mo gede howa mbirale bayale tara tara ngaru bame miyagua nde mini gigabiwi hayago ndo ibu mo luluya halu de kohe ale ibagabu helaga. Anidagua bidagola ai ibugua wali agali uruninaga hame ngago talima pialu maru karume ibuha mana lehe ngago mo tiga bule manda biragola tigua mo tiga bule karuni erembira mialu piaga ka.

30 Mini bayale wulene wali agalime latagi nahe ngago wali agalime muni mbogoyiha ngelowa mo doho ngaligobi nga. Ani wuwa ibugua wali agali mbirago biamogo bulene henge nawiore bame wu wahene wulebira. 31 Ainde wali agalime tinaga lulu mini wu kago anidagua mo doho holene bayale. Tigua mini gigabi wulene ngago mo doho holene bayale ndo nga.

<- SIRAGA 19SIRAGA 21 ->