LOMO 10

1 I̱ hamene mbaliniru-o Yu wali agali i̱ damene bibahende karume Ngode Datagaliwabenaga pele muleneore yamia nabiragola hame timbuniore lo kogoni. Ani hame lowa i̱na hongo howa Ngode Datagaliwabehondo tinaga bi la haabo halu kogoni. 2 I̱na ti ogobiore ka manda bu kogoni. Tigua Ngode Datagaliwabenaga biabe bulene hame timbuni lo kagoni howa biabe ogoni bia holenego irane bayuwa manda nabi howa hamelo ka.[a] 3 Ngode Datagaliwabehanda wali agali mini tigabiwi ka lagago hariga ogoni ti manda nabiaga henego ka. Ani hene kago howa mini tigabiwi holene hariga tini bo wule manda buwa Ngode Datagaliwabehanda wali agali mini tigabiwi ka lagane hariga walia henego tigua yu tiga nabiaga henego ka.[b] 4 Wali agali Kerisohondo mini mbiraore wiraru tihondo Ngode Datagaliwabehanda, Tí mini tigabiwi kami, lelo Mana lowinigo ngadagua Keriso ibugua bu maro bilene.[c]

Wali agali bibahendenaga pele mulene ngago ogo

5 Ngode Datagaliwabehanda, Í̠ mini tigabiwi ke, lelo Mana lowini ngagome, Bibe, laradagua bulene nga lowa Mosesehanda bi mbira gilibu wini ngago ogo, Mbiralime Mana lowini ngagome, Bibe, laradagua bialu kayagua nde ibu holene tene ogoni holebira, lalu gilibu nga.[d] 6 Anigo Ngode Datagaliwabehanda wali agali mini mbiraorewi karuhondo, Tí mini tigabiwi kami, lagagonaga bi mbira Anduane Homogonaga mbugani lo ngago ogo, Í̠naga miniha bi mbira ogodagua mitangi bulene nawi. Dahuliya andaga aiwa iraga halu polobadabe, lo nga. Ani lo mitangi birimayagua ogoni Keriso dalilo damu polenaga mitangi berama.[e] 7 Bi mendebi lo ngago ogo, Humbirini andaga aiwa dalialu polobadabe, lo nga. Ani lo mitangi birimayagua ogoni Keriso iraga helo damu polenaga mitangi berama. 8 Bi kira ogoni laragonaga lo ngago ogo, Ngode Datagaliwabenaga bi mana ogoni tí kamigoha kaware nga. Tíni bu minihabi ne hambunibi nga, lalu gilibu ngago ogoni bi mana iname lameramaligo Ngode Datagaliwabehondo mini mbiraore wulenenaga lameramali. 9 Í̠na bime Yasu ibu Anduane Homogo ka latagi halu bu minime Ngode Datagaliwabehanda ibu mo heya hene kago yu tiga biriyagua Ngode Datagaliwabehanda í̠ pele ngulebira. 10 Anigo iname Ngode Datagaliwabehondo mini mbiraore weramagola ibugua, Tí mini tigabiwi kami, laga ka. Iname mini mbiraore wirimadagua walia halu bime latagi haramagola Ngode Datagaliwabehanda ina pele ngiaga ka. 11 Anduane Homogonaga mbugani lo ngago ogo, Mbiralime ibuhondo mini mbiraore wiyagua ibu mini burugulo naholebiraore, lalu gilibu nga.[f] 12 Bi ogoni wali agali ta nabi bibahendenaga ngago irane Ngode Datagaliwabehanda Yu wali agalibi wali agali tara tarabi baba tu nawiaga ka. Ngode Datagaliwabe ibu bibahendenaga Anduane Homogo howa ibugua ibu olararu bibahendehondo turu holene timbuniore miaga ka.[g] 13 Anduane Homogonaga mbugani lo ngadagua ogo, Anduane Homogo mini olararu Ngode Datagaliwabehanda ti pele mulebira, lalu gilibu nga.[h]

14 Ani ngago tigua ibuhondo mini mbiraore nawiyagua ibu mini agua olabehebe. Bi mana hale naheyagua mini mbiraore agua wibehebe. Bi mana nalamidayagua hale agua habehebe. 15 Bi mana lamule piagahondo, Pu naledayagua bi mana agua lamibehebe. Anduane Homogonaga mbugani bi lo ngadagua ogo, Bi mana debene yalu ibiragola turu timbuniore holene nga, lalu gilibu nga.[i] 16 Anigo Bi Mana Debene yalu ibiyago hale howa ti bibahendeme yu tiga biai nahe hene. Aisaiahanda bi lo ngago ogo, Anduane Homogo-o iname bi mana lamirimago hale halu aiwa yu tiga biyabe, lalu gilibu nga.[j] 17 Anigo bi mana hale haramagome Kerisohondo mini mbiraore wulene mo anda haga. Bi mana ogoni Kerisohanda agua biya lalu lamulene nga.[k]

18 Anigo bi mana lamirimago ti hale nahayadago henenebe laro. Henene ndo ti hale haiore hayagoni. Anduane Homogonaga mbugani lo ngadagua ogo,[l]

Tigua bi lenego dindi bibahendeha pume hene.

Tigua bi mana laminigo dindi gimbuni bibahendeha piai hene,

lalu gilibu nga. 19 I̱na lone laro, Isaraele wali agalime bi mana ogoni manda nabi henebe. Bi ogoni pigane Mosese ibunime ladai bialu Ngode Datagaliwabehanda lenedagua lamialu lo ngago ogo,[m]

I̱na wali agali hameigini mbira ka lene ndo karuhondo bayale bigi berogo hondowa

tí kamirume, Inahondo bayale nabira agini, henge lolene mini wilo mo wia holebero.

I̱na wali agali dindiha marume yo hendene karu tiha howa bigi berogo hondowa

tí kamiru mo keba holebero,

lalu lenego gilibu nga. 20 Aisaia ibugua Ngode Datagaliwabehanda lenedagua hongoore howa lalu,[n]

I̱ hai nabi hearume i̱ handa walia haya.

Wali agali marume, Í̠ agoha kebe, nale hearu hendelo i̱ni ha pani haru,

lalu lenego gilibu nga. 21 Ngode Datagaliwabehanda Isaraele wali agali mitangi bialu lenedagua Aisaiahanda lenego ogo, Wali agali bi mo wahalu bi ko hangu ladai biaga hearu pele mule i̱na i̱naga gi dogolo tagi ho haabo harugola ti naibiya, lalu lenego gilibu nga.[o]

<- LOMO 9 LOMO 11 ->