104
Ngode Datagaliwabehanda bibahende wabiai henego iname ibunaga mini mo yaragaore holene ngago ogo
1 I̱na Anduane Homogonaga mini mo yaraga holebero.
Anduane Homogo i̱naga Ngode Datagaliwabe-o í̠ daliga gibiore kegoni.
Í̠ kini daliga gibiore howa mini mo yaraga holenebi duniniore holenebi
aga karularadagua karulo kegoni.
2 Wá holene gibioreme í̠ni aga karu laradagua karulo howa haru kegoni.✡Ais 40.22, Dan 7.9
Agalime balai anda dungume howa anda biagadagua
í̠na hari daliga li kagoni wabuwa dungume ho heledegoni.
3 Ani buwa í̠ninaga andaga iba bedago yarali howa uyuraore daligani bu kegoni.✡Iba 18.10
Í̠ hari beraliba ngarunaga biralu eberegola
puyabume í̠ yalu ibirayagoni.
4 Puyaburume í̠naga bi yalu ina kamaria pu lareya.✡Hi 1.7
Hari daba biralirubi í̠naga biabe dege bia ha lareya.
5 Dindi timbuni ogo í̠nime wabuwa winiyagobiore hongohe ngagoni.
Dindi ogo imi ema emene mbira nabi girigurabi mbira nabulebiraore.
6 Iba solowarame dindi timbuni ogo bibahende bu dambi haiho winiya.
Iba ogonime hari hearubi bibahende biru namulaiho winiya.
7 Ani dambi haiho wiaria í̠naga bi hongoheme iba solowara taliriya.
Taliri handala iba ibu gerai ibida puabo hayiya.
Iba solowara ibu í̠naga bi hongohe biago hale halu
bia laridagua bialu ibida piyiya.
8 Ibida pialu hari hearu yu wahalu porabu pebe bialu
dindi ulini wiaruha í̠nime tini berelo wabu winiyarunaga pu birayiya.
9 Iba uruni biru bolangua nahelonaga
í̠nime tu winiyagoriani iba áyu ogoriani birairi kagoni.
Áyu ibame ala bibahende namulaiho winiyadagua
lone namulai naholebira.✡Yar 5.22
10 Dindi uliniruha howa iba dugutagi helalu
hari labo dombeneruha howa iba duguaga duguaga bilalu
unura pugulu pebe biledegoni.
11 Ani biledegoria nogo gabua tara tara karume
iba uruni naga naga bialu kagoni.
Nogo dongi gabua karumebi iba noa howa
hége lebolaho henedagobi karulapeore nalu kagoni.
12 Iba uruni angeni ira bu karuha egarume tininaga anda bigi bigi bialu biruwa
iba ganaru turu howa laga laga bialu biru ngagoni.
13 Hariha howa dalu hari hombene ngarunaga dalipe helaga bialu kegoni.
Ani bigi beregome dindini mbirale bayale bayale bu paya bu ngagoni.
14 Nogo bulumagarume nelo tani mo anda helalu
ina wali agalime nalu holoma̱yanaga
tomo inaneme hengedamaru mo anda haga beregola nalu kamagoni.
15 Ani bialu iname ina mabuni pu mbira lini daga mini gerebi hangalu
linime pingidowa waini iba wabu nalu
ina miniha turuore halu dungu lo kamagoni.
Ira olibe lininaga ibane hambuwa denguinibi haguanibi haiho kamagola
inanaga dengui haihe wále bu kamagoni.
Widi hangalu dowa mberedi wabuwa
dawa no kamagola ina tinginiha hongo ngidagola kamagoni.
16 Lebanono dindini ira tamia bu karuni
hariha howa dalu ibaabo haragome damiaabo haga kagoni.
Ira tamia uruni Anduane Homogo ibugua bamba hengenego
ibuninaga ira bu kagoni.
17 Ira tamia uruniha egarume tininaga anda bigi bigi biaga beda.
Ai ega ma luhe mbira bedarume tinaga anda ira guraya ale karuha biaga bedagoni.
18 Meme gabua karu ti hari timbuni wedarunaga neneni ibagabu haga kagoni.
Tia amala horia ale bedaru ti egeandaha bira do haga bedagoni.
19 Harini ege wabu helariyagome tagira ibuwa ngoaho haga bialu
mali mbiragonaga ege biagoni ogoaleneda lalu ibuni langialu kagoni.
Ai ni ibu nde ogoangi anda pialu dadai bialu
palue ibuni manda bu kagoni.
20 Í̠na aruma helaregola mbiraga nogo ega gabua tara tara
ti bibahende tagira ibuwa ibaga bu haga kagoni.
21 Laiono hungubaluarume tomo taya bialu howa
ne noani bi hongo howa ladaga halu larayagoni.
Ngode Datagaliwabe í̠na tomo ti nelo mereyago
ogoni mbira agini ngabe hondole taya bialu howa bi ani larayagoni.
22 Ti ani bialu howa ni dara handala
uliha tini paliradagoha palima dai biaga.
23 Ani pedaha wali agali ti heyalu biabe bu puwa
biabe bialu kane dege alendo ni palira handala ti andaga piaga.
24 Anduane Homogo-o í̠na mbirale dewaore wabiriyagoni.
Í̠ mini gigabiwi gibiore kegome
mbirale uruni bibahende í̠nime wabiriyagoni.
Dindi timbuni ogoni mbirale tara tara í̠ni wabiriyarunime
wu to̱lotagi kagoni.
25 Iba solowara timbuniore gibi bedagoni.
Iba o bedagoniha wena timbuniore gibirubi
wena emenebi dewa daga labenaheore biralu
mbirale marualebi ogoniha dege biru ngagoni.
26 Iba solowara daligani iba sibi puíbu daibu biaga.✡Yob 41.1, Iba 74.14, Ais 27.1
Iba unura dindiha wena gibi hiriribi bamba í̠ni wabu berelene
o bedagome gini biaga bedagoni.*Iba Gana 74.14 de handabe
27 Uruni bibahendeme ti tomo noa biaruangi
í̠na dege mibelo í̠naga gi handayaho biraga bedagoni.
28 Í̠na ti tomo nolene meregola ti naga.
Ti tomo merego karulapeore nalu tombeore hara handala piaga.
29 Í̠na ti erembira meregola ti giho haga.
Í̠naga buhe̱ tiha helarigo yameregola
ti homo tongolo daga halu lone dindi tago biaga.
30 Í̠na ti buhe̱ lolene meregola ti emabu haga.
Í̠na dindini mbirale bibahende gahenge hangu tagira íbu helaga bialu kegoni.
31 Anduane Homogonaga hongo holenebi
ibunaga wá holenebi wiaaboore helo hame ledo.
Anduane Homogo ibugua mbirale ibunime wabu helaga biyadaru handaga bialu
ibuni turuore helo hame ledogoni.
32 Anduane Homogo ibugua dindi timbuni o ngagoni de handaya haragola
dindi ogoni duru laga.
Ibunaga gime hari karuni ela haragola
hari karuni hagua hungula bulebira.
33 I̱ dindini emabu kongi
i̱na Anduane Homogohondo iba ganaru lo mulebero.
I̱na i̱naga Ngode Datagaliwabe kagonaga mini mo yaraga halu iba ganaru laho ngoore dege
i̱ni homalu lairi holebero.
34 Anduane Homogo ibugua i̱ mo turu haga biragola haruligo
i̱na iba gana lo meroruore ibu hale halu turuore helo hame ledo.
35 Anduane Homogo-o wali agali mana ko biaga bu karuniore
dindini nahelo balu bo ereba habelo hame ledo.
Wali agali ko ngubiore uruni ereba hai helo hame ledo.
I̱na Anduane Homogonaga miniore mo yaraga holebero.
Anduane Homogonaga mini mo yaraga hama.
<- IBA GANA 103IBA GANA 105 ->
- ~6~ Iba Gana 74.14 de handabe
✡104:26: Yob 41.1, Iba 74.14, Ais 27.1