Obadaia
Mbuga ogoha gilibu ngarunaga nemandi ogo
Anduane Homogonaga bi mana latagi haga agali Obadaia ogoni ibunaga bi mana latagi halu henedagoni Babilonoalirume Yarusaleme tano bo gialo wahai halu mo labu hene wiangi howa latagi halu hene. Abale Idomoali tigua Isaraele baba waitigi ho haga henego ainde Babilonoalime ibalu Yarusaleme bo gialobaga bialu mo labu hayagola Idomoali tigua nde turu timbuni ho hene. Ani howa tigua Babilonoalirume Yarusaleme mo ko helonaga tigua Babilonoaliru biamogo bialu wai bini.
Ani biyagola Obadaia ibugua mbiwia halu, Anduane Homogohanda Idomo dindi mo ko holebira. Idomo wali agalirubi wali agali hameigini dindi tara tara ngaruha karubi Isaraele wali agali baba waitigi haga hama pedaru bibahendeore mo ko halu homo ereba haiore holebira, lalu mbiwia hene.
Idomo wali agalirume mana ko wiaru bialu heagola Anduane Homogohanda tinime biyagonaga pani nelo mini.
Bu̱lu̱ baga buwa kuni gilibu ngago
1-14
Idomo wali agaliru pani nenego
15-21
Dabaki bulene horo wulebira lenego

1 Anduane Homogo Bibahende Haru Haame kago ibugua Idomo wali agalinaga dindihaore ogodagua bule ngeledo lalu Obadaia ibugua latagi helo lamini.✡Ais 34.5-17, 63.1-6, Yar 49.7-22, Ese 25.12-14, 35.1-15, Amo 1.11-12, Mal 1.2-5

Anduane Homogohanda Idomo wali agali pani nelo minigo ogo

Anduane Homogohanda ibunaga bi lamiaga agali mbira dindi bibahendeha piai hole pu layagola bi latagi hama penego ogoni ibugua bi layago ina hale harima.

Ibugua lalu,

Idomo baba wai bu mali̱ya manda manda bu halimu, laya.

2 Anduane Homogohanda Idomoali hearuhondo lalu,

I̱na tínaga hongo bo podalu bope holebero.

Anidagua berogola wali agali hameigini tara tara palu karume tí erembira ngialu yo hondolebira.

3 Tínaga balagala haga mana ngamigome tíni mo hondo henego kamigoni.✡

Tínaga tano wai pabe ege to̱le̱me bu yu mabu bini kagoni.

Tí hari neneha haga kami.

Ani howa tíni laga bialu lalu,

Ina bope habehe ai haruadabe mbirali naheore ndobe, laga kamigoni.

4 Anigo i̱na tíhondo langerogo ega bodo hariaweme hari nene daligaoreha pialu hari bareore ngagoria anda bu paliagadagua tígua daligaore yakundi bu karuha anda bu ha kamiyaguabi nde horo mbiru i̱na tí dindini bo haealape holebero.

5 Pagealime mbiraga ibalu mbirale ti hameleda alego mo yu pialu maru ngelo wahaga ndobe.

Ani bialu wali agalime pu mbira mini gerebi lini do wialu howa maru delo wahaga.

Anigoyu tí waitigi bu karume ibiragola tí balu bo bibaore hai holebira.

6 Iso hameigini kamiru tínaga munirubi dabudabu tara tara ngamirubi bibahende mo yu piai holebira.

7 Hameigini maru tí haru mandagi haga biarume tíhondo ke̱ halu mo hondo holebira.

Urunime tí bo batagi haragola tínaga dindi yu wahalu tagira piai holeberami.

Hameigini maru tí haru mandagiore haga biarume tíni baba wai bialu tí bope holebira.

Tínaga nenegeore tí baba mandagi biruwa tomo naga hayarume tí gonoha dalimulo gono wu holebira.

Anidagua gono wedagoha tí do ngamigola uruni tigua lalu,

Idomoalirunaga mini giga bulene biago ai agoha ngabe, lolebira,

8 I̱na Idomo wali agali pani merongi tinaga agali manda timbunibi karuni bibahende bo wahai halu tinaga mini gigabi ngaruni mo ereba hai holebero.

9 Ani berogola nde Temana tanoali wai bulenenaga manda timbunibi howa bogabiore karuni bibahende gi hai holebira.

Ani bialu Iso hameigininaga dindini ami agali hongohe bu karuni ti bibahendebi bo wahai holebero,

lalu Anduane Homogohanda laya, lene.

Idomo tini biyagonaga pani nolene winigo ogo

10 Anduane Homogohanda laabo halu lalu,

Idomoali tígua tí hamene Yagaba hameigini bu karunaga mbirale wiaru mo pagebu yu piai halu tini homelo bo wahai harimigoni.*

Ani birimigonaga i̱na tí mo taga timbuniore halu tínaga mini mo ko hai holebero.

11 Yudanaga waitigi bu hearume ibalu Yarusaleme tanonaga wai pabe heago bo gialalu anda puwa tanoha munibi dabudabu wiarubi mo yai howa talebu ta haga bialu hearia tígua nde mbirale uruni aria mbira mo ya nabi bame howa Yudabi biamogo bialu mo wia nabi dege harimigoni.

Ani birimigome tíbi nde pageali o hayadarubi dege harimigoni ndobe.

12 Tí hamene Yudahondo mana ko liahe dewaore bialu harimi.

Yuda mo ko hayagola tínaga bu miniha turu halu dungulo harimigoni.

Ti mo ko hene heagola tígua mine halu handape ho harimi.

13 I̱naga wali agaliru genda yu heagola tigua tanoha anda puwa tandaga nalu wiagola tí turu haga birimi.

Ani bialu tinaga dabudabu bayale wiaru mo yarimi.

14 Tígua hariga gebaga wigi biagoria handayaho howa Yuda wali agali ibida pole pugu biyaria tígua minu yania haga buwa tinaga waitigi hearuhondo minu migi birimigoni.

Tígua mana urunidagua bialu harimigo mana koorene ko birimigoni, lene.

Anduane Homogohanda wali agali bibahendeore pani mulebirago ogo

15 Anduane Homogohanda laabo halu lalu,

Horo mbira i̱na wali agali bibahende dabaki bulene winigo ai ibulene kaware haragoni.

Idomo wali agaliru-o tígua maruhondo birimidagua tínihondo nde anidagua dege bulebira.

Tígua mana ko birimigonaga pani tínihondo biadai bulebira.

16 Ainde i̱naga wali agali bibahende i̱ninaga Hari Saiono loma bia hene biagoria bu haga hearuhondo pani iba kaubi ale nelo mirugoni ndobe.

Ani birudagua wali agali hameigini dindi tara tarani bu karuni tibi nde pani nelo iba kau timbunibi ale hambu mulebero.

Ani merogola ti iba ogoni nai halu bibahende biba haiore helolebero, lene.

Isaraelealime wai bialu wayali holebira, lenego ogo

17 Anduane Homogohanda laabo halu lalu,

Wali agali maru Hari Saiononi yu wahene karu ti mo ko nahe bayale halu i̱ninaga Hari Saionobi loma bia hene bayale haabo holebira.

Yagaba aguanene bu karu tinaga dindi i̱na mirugobi tinime mo yu dai bialu karulo holebira.

18 Ani howa wali agali Yagaba aguanene bu karubi ibu igini Yosebe aguanene bu karubi ti gibiore ira hungu bialuhe ale howa irame dangi gabuni yobi ngagoha ira hedope haragola hungu kiau lalu emene hangubi mbira ibira nahe do mundulo ai̱ hagadagua bialu tigua Iso hameigini mbiraore hangubi mbira yu wanahe bo hilo wahai holebira.

I̱ Anduane Homogo i̱na bi o ledogoniore.

19 Isaraele wali agali Yuda dindinaga abene unurahayagi dindi hobane mini Negebe ngagoria karu tigua Idomo dindiha Isonaga hari ngaru karulo holebira.

Ani bialu Yuda wali agali ni paliragohayagi hari bare bare ngaruha haga bidaru tigua Pilidia wali agalinaga dindi ngago karulo holebira.

Ani bialu Isaraele wali agali marume Eberaimi hameiginirunaga dindi ngago karulalu Samaria dindibi karulolebira.

Beniyamini hameiginirume dindi iba Yodana doma edeyagi ni tagira ibiragohayagi Gileada dindi hobane ngagobi karulai holebira.

20 Isaraele wali agali dindi abene uyurahayagi haga karu ti nde dindi taraha garabaya pu hayago golaragola tini dalu dai bulebira.

Dai buwa tigua Ponisia hameiginirunaga dindi ngago karulaga bima pialu uyuraore Sarebada tano ngagoria puabo holebira.

Yarusaleme wali agali Sadisi tanoni garabaya pu hayaru ti garabaya golalu dai bialu Negebe dindiha tano bu ngaru karulai holebira.

21 Yarusaleme agali wai bialu wayali hayarume Idomo dindiha pialu wai buwa Idomo wali agalirunaga dindi hari ngaru ti karulo howa tigua handayaho holebira.✡

Ani kagola i̱ Anduane Homogo i̱ni tinaga kini holebero,

lalu Anduane Homogohanda Obadaiaha howa latagi hene.