1 Anduane Homogo ibugua Mosesehondo lamialu lalu,✡Har 25.31-40, 37.17-24 2 Arono ibugua i̱naga tamu Hobane Loma Bia Hene biagoha lamu hale wiagane irane mbiraore gebagane kariahe ngagoria mo berelaga bialu i̱naga tamu hobane ngago dombeneha wá hai helo lamu hale baya hangu mo tiga buwa ngelabe lalu lamibe, lene. 3 Ani layago hale halu Arono ibugua Anduane Homogohanda bibe layadagua bialu lamu hale wiagane irane wabu wini biagoria berelaga buwa delayagola anda tamu Hobane Loma Bia Hene biagonaga hanuni wá haame hene. 4 Lamu hale wiagane irane ogoni ala Anduane Homogohanda Mosesehondo bibe lalu walia hayadagua bialu tigua ngolo maru mo yuwa hamame bo dambu mbaralaga buwa lamu hale wiagane irane gebaganebi ogoninaga yári balawaya alebi bibahende wabu wini.

5 Anduane Homogohanda Mosesehondo laabo halu lalu, 6 Í̠naLibai hameigini tini hangu olalu ibidaba lowa tini i̱naga deni dodo nahe bayale helo dabo helabe. 7 Ani bule howa ogodagua bibe. I̱naga deni dodo nahe helonaga iba biagome Libai agali uruni tandala bahaga bibe. Ani bialu tinaga mandari angaribi bibahende dogo wahai halu tinaga agabi wayawaya bo wahai hadaba labe. Anidagua biragola ti dodo nahe bayale holebira. 8 Ani biai halu tigua nogo bulumaga wangabe hungubalua mbirabi balawa bayaleore olibe lininaga weli heba biamaga hene lomabu delole ngagobi nogo bulumaga biago heba lomabu mulene nga. Bulumaga wangabe mendebi ko domo wahelonaga loma buwa bo delole haru ibulene nga. 9 Ani bidagola Isaraele wali agali bibahende íbu ngoai howa Libai aria bibahendebi i̱naga Balai Anda kago haneni haru íbu helowa helabe. 10 Ani helowa horo ogoningi Libai ti i̱naga deni íbu kagola Isaraele wali agali tigua agali uruninaga emboneni gi wiaiore halimu lamibe. 11 Ani biai kamigola Arono ibugua Libai uruni ibunaga giha lomabu yuwa ngiradagua bialu i̱naga deni gi dogolowa wigiwaga lalu holebira. Anidagua biragome Isaraele wali agali tigua Libai hameigini uruni i̱ninaga biabe biagaore helo loma biaho helolebira. 12 Ani buwa Libai hameigini tigua nogo bulumaga wangabe kira biago labonaga haguaneni gi wulebira. Ani wialu bulumaga mbirago tininaga ko domo wahelonaga loma buwa bo delalu mendego irame dai helo loma buwa bo delolebira. Loma kira ogonilabo Libai uruni ti i̱naga deni ko dodo nahe bayale helonaga loma ogoni.

13 Í̠na Libai hameigini uruni i̱ninagaore helo i̱hondo mbiraleore ngiradagua ngeregola Arono aria karu tigua Libai uruni handayaho holebira. 14 Anidagua beregome Libai ti Isaraele hameigini maru karu aria ndo ti i̱ninaga daba bagi hene tara holebira. 15 Í̠na ti mo bayale halu i̱nihondo loma biaho heledegola tigua i̱naga Balai Anda kagoha biabe bulene ngaru bialu holebira. 16 Isaraele wali agalinaga igiri wahene taba hanarago i̱nihondo ngulene winigo wahalu i̱na Libai hameigini i̱ninagaore helo dabo helarugo ti i̱ni hangunagaore holebira. 17 Ai hale halimu. Isaraele wali agali tinaga igiri wahenebi nogo bulumaga sibirunaga igini wangabe pigane wiyaguabi i̱naga dege haga wiyagoni. Mana ogoni i̱na Iyibi wali agalinaga igiri wahene bibahende bo wahai harungi howa i̱ninagaore helarimi.✡Har 13.2 18 Ani binigo ai áyu Isaraele wali agali tinaga igiri wahene wahalu Libai hameigini bibahende i̱ ha aribia harogoni. 19 I̱na Isaraelealihondo i̱naga Balai Anda kagoha biabe ogo bulene nga lalu abale langirugo ai Libaiali uruni tigua bialu helo Arono halu ibu igini karu ti merogoni. Isaraeleali tigua biaga winigo áyu Libai hameiginime bu aribia haragonigo ai ti nde i̱naga Balai Anda Hobane Loma Bia Hene kagoria kaware napoleberemi. Ti ogoriani kaware pu karia i̱na ti mo ko holene wuligo napilimu lamibe larogoni, lene.

20 Ani layagola Mosese Aronobi Isaraele wali agali bibahendebi tigua Anduane Homogohanda Mosesehondo bi layadagua bialu Libai hameigini Anduane Homogonagaore lomabia hene helonaga loma biaho helene. 21 Ani loma biaho helayagola Libai hameigini tini dodo nahe holene mana biaga wiago bialu tinaga aga winirubi wayawaya biai hene. Ani biai heagola Aronohanda uruni ti Anduane Homogohondo lomabu mialu ibunaga deni gi yaraga howa wigiwaga lalu Libai hameigini lomabia hene. Ani bialu ti dodo nahe bayale helonaga loma bo delalu bini. 22 Isaraele wali agali tigua Anduane Homogohanda Mosesehondo lamiyadagua bialu Libai hameiginiru dabo bagiho helene. Ani biyagola Libai aria tigua Anduane Homogonaga Balai Andaha biabe bulene wiaru bialu helo Arono halu ibu iginirume ti haru haga hene.

23 Anduane Homogohanda Mosesehondo lamialu lalu, 24 Libai hameigini agali ibunaga mali pira kirani duria (25) bolangua hene kagome i̱naga Balai Anda kagoha biabe bialu holebira. 25 Ani bialu kane dege tinaga mali pira duria (50) bolangua haragola biabe nabi waholebira. 26 Mali ogonidagua haragola uruni tini hangu howa Balai Andaha biabe bulene wiaru bulene nawulebira. Tigua ti aria karu biamogo bialu i̱naga Balai Anda kagoha biabe biamogo bulene ngaru biamogo mogo bialu holebira, lalu Anduane Homogohanda Mosesehondo lamini.

<- DAGALENE 7DAGALENE 9 ->