1 Mosese Aronola libugua Isaraele wali agali haru halu ti Iyibi dindi yu wahalu tagira puwa balai anda bu haga bima pugu bini. 2 Anduane Homogohanda Mosesehondo bibe lalu lamiyadagua dindi ti balai anda bu haga binidaru mini gilibu wigi bini. Dindi ti haga binidaruni ogodagua.

3 Isaraele wali agali ti ege mbiranaga horo nguini (15) hayagola horo ogoni Anduane Homogohanda ti nabe Bolangua Halu Penegonaga lalu horo mendengi ti Iyibi dindi yu wahalu tagira pene. Anduane Homogohanda ti baya hangu haru heagola tigua dindi mini Lamesese yu wahalu tagira pene. Ani piyago Iyibi wali agali ti de hendeaore tagira pene. 4 Horo ogoningi Iyibi wali agali ti tinaga igini wahene Anduane Homogohanda bo wahayago hora halu hea handala pene. Anduane Homogohanda Iyibinaga dama bi pupu wiaga wiaru bope haga howa ibuni Anduane Homogoore kogoni lalu ibunaga hongo tihondo mo walia halu anidagua bini.

5 Isaraele wali agali ti Lamesese dindi wahalu Sugodo tano wiagoria tagira pialu balai anda bu hene. 6 Ani buwa ogoriani halu puwa dindi ko yobi iba dalu naibaga wiagoria dindi mini Edama wiagoria puwa balai anda bu hene. 7 Ani bialu tigua Edama wahalu pialu dindi mini Pihahirodo anda pene. Pihahirodo dindi ogoni Balasebono ni tagira ibiragohayagi wini. Ogoria anda pialu Migidolo tano kaware wiagoria tagira puwa balai anda bu hene. 8 Ogoriani howa Pihahirodo dindi ogoni wahalu iba Solowara Daramabi laga bereago domalu Sua dindi ko yobi iba dalu naibaga wiagoha tagira pene. Ani bialu tigua horo tebiru pu dege bialu dindi mini Mara wiagoria tagira pialu ogoriani balai anda bu hene. 9 Mani Mara wahalu pialu Elimi dindi wiagoria tagira puwa tinaga balai anda bini. Elimi ogoriani iba hambiaga uli homberia (12) wialu ira mini dedi pira karia (70) halu biagoria hene.

10 Mani tigua Elimi yu wahalu puwa iba timbuni Solowara Daramabi bereagoria tagira puwa ogoriani balai anda bu hene. 11 Ani bialu iba Solowara Daramabi bereago yu wahalu dindi ko yobi iba dalu naibaga mini Sene wiagoria anda puwa ogoriani balai anda bu hene. 12 Ani buwa Sene ogoni wahalu puwa dindi mini Doboga wiagoria tagira puwa ogoriani balai anda bu hene. 13 Ani bialu nde Doboga wahalu puwa Alusu wiagoria tagira pialu ogoriani balai anda bu hene. 14 Mani ti Alusu wahalu puwa Lebidimi wiagoria tagira puwa balai anda bu hene. Dindi Lebidimi ogoriani iba nolene mbira nabereore wiagoria pu hene.

15-37 Mani Lebidimi ogoni wahalu puwa balai anda bu haga binidaru dindi ko yobi iba dalu naibaga Sainai wiagoriabi Kibirodohadababi Haserodobi Lidimabi Limonoberesebi Libinabi Lisabi Keheladabi Hari Sebe heagohabi Harada dindibi Magahelodo wiagohabi Tahada wiagoriabi Tera wiagoriabi Midiga dindi wiagoriabi ani bialu Hasamonabi Moserodobi Beneyaganabi Hohagidigada wiagoriabi Yodobada wiagoriabi Abarona wiagoriabi Esiongebe tano wiagoriabi pialu ani bialu Sene dindi ko yobi iba dalu naibaga wiagoriabi pene. Sene ogoni Kedese wiagoha wini. Maniore Hari Ho heagoha Edomo dindi gibuni wiagoria tagira puwa balai anda bini.

38-39 Dindi ogoriani heangi ti Iyibi dindi wahalu ibinigo mali pira maria (40) hayagola ege dauninaga horo mbirangi loma binigo mo miaga Arono ibugua Anduane Homogohanda bibe lalu lamiyadagua bialu ibu Hari Ho heagoha irigi howa homene. Ibu ai̱yahanda taba hanayangi howa hama ibinigo mali handari mbirani pira kirani tebira (123) halu homene.[a]

40 Dindi ogoriani pu hemigola Kenana dindinaga abene unurahayagi dindi mini Arada wiagonaga kini heago ibugua Isaraele wali agali ibira layago hale hene.[b]

41-49 Isaraele wali agali ti Hari Ho heago helalu puwa balai anda bigi bima pugu binigo dindi mini Salamona Punono Obodo Abarimibi dindi uruniha pene. Abarimi ogoni Moaba dindiha tano mbira gialo payabu winigoria pene. Ani bialu Dibonogada tanobi Alamono Dibiladaimi dindibi Hari Nebo heagoria kawareni Abarimi hari hearuhabi pene. Ani bialu Yarigo wiagoria kaware iba Yodana peago doma ederahayagi tano kira mini Bedeyasimodobi Sidimi hengene wiagoha dindi uli uli bayale wuyu peagoha pugu bini. Ani bialu dindi ulini bayale wuyu peago bibahendeha balai anda bu haga bima pugu dege bini.

50 Ti puwa Yarigo tano kawareha iba Yodana peago abene ederayagi Moaba dindi ulini wuyu peagoria hemiria Anduane Homogohanda Mosesehondo bi maru 51 Isaraele wali agali lamilonaga ibu lamini. Anduane Homogohanda lalu, Tígua iba Yodana porago domalu Kenana dindi anda pialu howa 52 wali agali dindi ogoniha hene karu bibahende bo pelai halimu. Ani bialu ti dama mitangi bialu bi pupu wulenaga mbirale ege to̱le̱me wabini ngarubi aeaneme wabini ngarubi bibahende bo dambiai halu tinaga bi pupu wiagane anda karubi gialo wahai halimu. 53 Dindi ogoni i̱na tí ngerogo karulole pu halimu. 54 Tígua dindi tíni hameigini mbira mbira kamidagua tu wa tahole tadu ale ege to̱le̱ tínaga mini gilibu wini biago badaga halu handalimu. Ani hondowa hameigini wali agali dewa karu dindi timbuni tu wa mialu wali agali emene karu dindi emene migi bilimu.[c] 55 Anigo wali agali dindi ogoniha hene bu karu ala bo batagi nahe ani helo harimiyagua nde wali agali urunime tí tandaga mo ngulebira. Tigua biragome tínaga denibi gubalinihabi igibu anime nogoba haradagua bialu holebira. Ani bialu dindi tí pu holeberemigoha wai bialu haabo holeberemi.[d] 56 Tígua wali agali dindi ogoniha haga karu bo batagi naharimiyagua nde i̱na wali agali uruni mo ko hole manda birudagua tí mo ko holebero, lalu Anduane Homogohanda lene.

<- DAGALENE 32DAGALENE 34 ->