5
Yarusaleme wali agalirume Anduane Homogohondo, Ina dara howa biamogo bia, lenego ogo
1 Anduane Homogo-o genda tara ina kamaria tagira ibiyago mitangi bialu í̠na dara habe.
Wali agali hameigini tara karunaga deni ina ko nakarulape habane nabulene kamagonigo de handa.
2 Inanaga dindi andarubi agali tara karu tigua karulo aribia ho kagoni.
3 Ina aba waitigirume bo wahai hayagola ina waneigini hono wahene ale halu
ina ai̱yaru wali dalo bedagoni.
4 Ala ira gabunibi iba nolenebi minana miagane winigo
áyu iname ira bolenebi iba hambulebi yolo bulene hangu ngagonida.
5 Waitigirume ina nogo dongi kamelerunaga biruyu ibaga biagadagua biyagola ina erekui taraore handalu kamagoni.
Tigua ina ha̱lo biruluma̱yabi henge nangiagaore.
6 Ina tomo nolene nawi buru paleoreyagola nahome holoma̱ya
ina Iyibiali Asirialirumebi biamogo bilo lowa hale harima.
7 Inanaga mamalirume ko bialu tini homeagola ai iname tigua ko biyagonaga genda yu kamagoni.
8 Babilononaga garabaya biabe ale biahagane bu karume ina handayaho halu
tinaga giha howa ina pele ngialu haru dai bulene agali mbira naheda.
9 Agali homelo bo wahaga biaruni inanaga dindiha wai taya ibagabu haame howa
ina tomo taya bu poramagola bo wahole yu biraga.
10 Ina hina garibi timbuniore lalu tingini ngo̱e lowa warago baradagua biaga.
Garibi dege lalu inanaga tingini poboyogo bu yolo mialu ege to̱le̱ kundibi ale haga.
11 Hari Saiono weagoria waitigime ina one berearuni ti kayu yai halu
Yuda tanoruha ina wane biru wiarubi kayu ya dege biya.
12 Tigua ko taraore bialu inanaga agali haguane hearuni bame gini minu daba howa gerelaho ngelaya.
Inanaga agali wahe miniwi hearubi yo handalu mo taga haga biya.
13 Inanaga igiri daliahe hearu garabaya biabe ale bialu widi lini dambiaga helalu
igiri emene hearuni ira gendabiore timbuni wiaru mo ya haga bialu helaya.
14 Agali haguaneru tanonaga pabe haraba ngagoriani nabiraga.
Wandari igiri daliahe karumebi ngida balu iba gana lalu nahaga.
15 Inanaga turu holene winigo ereba hai hayagola
iname iba gana lalu mali leremaliru dara holene íbu aribia hayada.
16 Mbirale ina mo turu haga winigo damene ereba hai hayada.
Inane ko birimagome ina darabiore kamagoni.
17-18 Hari Saiono bo gialabaga biyagola
biango duduru hangu hagane bu hinayada.
Ogonidagua bidago hondowa ina dugu biaabo haramagome
inanaga gubalini mo ko halu de tandaga biarua.
19 Anigoyu Anduane Homogo í̠ kini haabobo halu
handame ho haabo holebere.
20 Ina aginaga erembira ngialu yu wahowa haabo kebe.
Ina lone angi mitangi buleberebe.
21 Anduane Homogo-o ina haru dai bia.
Ina haru dai bialu mini yaraga holene ala wiagane biagobi wia dai bila.
22 Be ina yu wahalu handabe manga halu erembira ngiaabo holeberebe.