1 Wali agali Isaraele hameigini biaru bibahende Iba Yodana domai hayagola Anduane Homogohanda Yosuahondo lalu, 2 Agali homberiali (12) hameigini homberia (12) biagoha howa dababe. 3 Dabowa au bidaba labe. Loma binigo mo miaga biaru hene muguni biagoria howa ege to̱le̱ homberia (12) payani mo yalimu. Yalu puwa áyu mbiraga paleremigoria ngelalimu labe, lalu lene.

4 Ani layagola agali homberiali (12) Yosua ibugua biabe ogoni bilo dabo helene biaru, Ibidaba, 5 lowa tihondo lalu, Anduane Homogo inanaga Ngode Datagaliwabenaga Habo Nalolene Bi lowinigonaga Mbogoyi yu kagoria emene puamu howa ege to̱le̱ homane mbira mbira tí Isaraele hameigini ta howa dugu payani yalimu, lene. 6 Ege to̱le̱ urunime tígua mani Anduane Homogo ibugua biyago mo mitangi bia helo. Mani tí waneiginirume, Ege to̱le̱ uruni aginaga winibe, laragola[a] 7 tígua ladai bialu lalu, Anduane Homogonaga Mbogoyi biago yalu Iba Yodana domayagola iba biago bira migimigi binigonaga lamilimu. Ege to̱le̱ uruni ogoria wiaabo howa Isaraele wali agali mani hararu mo mitangi bia ho wiaabo helo wulebira, loleberemi, lene.

8 Agali biarume Yosuahanda layadagua bini. Anduane Homogo ibugua Yosuahondo bi lamiyadagua bialu tigua to̱le̱ homberia (12) Iba Yodana hanuni wiaru Isaraele hameigini tara tara hayadagua hangu hangu ta howa dugualu payani yalu puwa tini balai anda bu paliyagoriani ngelene. 9 Yosuahanda to̱le̱ homberia (12) mende yalu puwa iba hanunini loma binigo mo miaga biarume Mbogoyi biago yu hayagoria ngelene. Ege to̱le̱ odaruni áyu ogoriani wia ho wiaabo ka. 10 Anduane Homogohanda wali agalime bilonaga Yosuahondo lamiyadagua biai helo lowa loma binigo mo miaga biaru tigua Iba Yodana hanunini haho wiaabo hene. Mosese ibugua ala anidagua bilimu lalu lowinigo layadagua bini.

Wali agali biaru tigua Iba Yodana abale ubade haga bini. 11 Wali agali bibahende dindi edeyagi piai heagola loma binigo mo miaga biarume Anduane Homogonaga Mbogoyi biago yalu ti bamba halu pene. 12 Lubene hameiginirubi Gada hameiginirubi Manase hameiginiru hanuni talebu ki bini biaru mendegome Mosesehanda bilimu layadagua wai biagane ale taba yalu tigua ala bamba halu pene. 13 Agali daosini pira maria (40,000) agima wai biagane wiyaru ale taba yalu Anduane Homogonaga deni Iba Yodana domalu Yarigo tano yu palepale wiagoria kululape hene. 14 Horo ogoniangi Anduane Homogohanda galone o binidarume Yosuanaga mini Isaraele wali agali hearu deni mo yaraga hene. Ani bialu Mosesenaga mini yaraga haabo hayadagua Isaraele wali agalime Yosua heangi ibunaga mini yaraga haabo hene.

15-16 Ani buwa Anduane Homogohanda Yosuahondo lamialu lalu, Loma binigo mo miaga biaruhondo Mbogoyi biago Iba Yodana hanuni howa yalu irigi hadaba la, lalu lamini. 17 Ani layadagua Yosuahanda ani lamini. 18 Ani lamiya handala loma binigo mo miaga tigua irigi halu ibiyagola iba li timbuni abale piyadagua lone pene.

19 Ege mbiranaga horo pini layagola Isaraele wali agali biarume Iba Yodana domene. Domalu puwa tigua dindi mini Giligalani Yarigo kaware howa ni ibiragohayagi balai anda bu hene. 20 Ogoriani Yosuahanda to̱le̱ homberia (12) Iba Yodana howa duguayayaru mo mogo buwa wima irigi hene. 21 Ibugua Isaraele wali agalihondo lamialu lalu, Mani tí waneiginirume ogo aginaga bu ngamibe layagua 22 tígua Isaraele wali agalime Iba Yodana yoabu wahowa dindi dege wiagola ubade halu penegonaga te lalimu, lalu lamini. 23 Lamialu lalu, Anduane Homogo tínaga Ngode Datagaliwabehanda Iba Yodana yoabu wa helowa tí bibahende iba domai hemigola pene biadagua piyaru te lalimu. Ibugua solowara mini Iba Daramabi ina ibirimagola biyadagua bini lalimu. 24 Ani biyago hale howa wali agali dindi bibahendeni karume Anduane Homogonaga hongo timbuniore ogobida lowa manda biai holebira. Ani biragola tíguabi Anduane Homogonaga mini mo yaraga halu haho wiaabo holeberami, lalu lamini.

<- YOSUA 3YOSUA 5 ->