1 Yudidi ibugua Isaraelenaga Ngode Datagaliwabehondo bi lai howa 2 ibu paliyagoria howa heyalu wali ibunaga biabe bia haga bereago ibilo olene. Ani bialu anda hobane mbira horo Sabadangibi bi lagane horo timbuni tagira ibirangibi ibuni biragadagoha daliape halu anda pene. 3 Puwa aga dara ho howa karulagane karulo birayagobi ibu agalini homayagola dalo tangi karulo birayagobi golo wahai hene. Ibu waya balu tingini mbagua ngabi mbira mini sanda laga wiagome ha̱i̱ hene. Ani buwa ibunaga mandari gumu bialu aga bayale tara mbirame mandari hubabu dambi halu agali bayale ibu agalini Manase heangi karulagane wiago mo karulalu bini. 4 Ani buwa ge su mo karulalu ge hala gi pagidaru mo karulai halu haleira dalu gihondeneni gi da wialu ibunaga yári wiago damene mo karulai halu biyagola wali biago wali maru baba tabe nabi baya dege lalu agibe tobahe ona berene. Ani bereagola agali ibu de handararume dimagoli timbuni habeheore berene. 5 Ai waini iba be mbirabi olibe lini ibane be mbirabi ibunaga biabe bia hagane wali biagome henelo mini. Ani bialu bali lini hirini wiagobi mberedi hirini bayale wiarubi kegi maru ira lini do gembeme wabini wiarubi bibahende nuha hangu hanai hene. Baya hangu hubabu ndagi laga buwa wali biabe bia haga bereagome nuha henelo mini. 6 Ani biai halu libu tanonaga wai pabe panga haraba heagoria pialu hebiria Usia halu Bedulia tanonaga agali kirali Kabarisi Kamisila ti haru mandagi howa tanonaga wai pabe panga dugua hene. 7 Ani buwa handalu hemiria Yudidi wali baya dege lalu agi loabe tobaheni ibunaga dengui baya tara howa ibunaga agabi tara dege biaria hendene. Tigua turu halu bi ogodagua lamini. 8 Í̠na hame ledegobi mini ngegobi bibahende í̠naga mamalirunaga Ngode Datagaliwabehanda mo karulape helo. Ani biragola Isaraele ti lone wayali haragola Yarusaleme mini lene ngelo laro, lene.

9 Yudidi ibugua Ngode Datagaliwabehondo bi lai howa ibugua ladai bialu lalu, Ai i̱na mbirale bule lalu larugoni bule poliya agali biabe biaga karuhondo tano pabe panga dugua ladaba, lene. Ani layagola tigua igiri daliahe bu hearuhondo pabe panga duguadaba lene. 10 Panga dugua hayagola Yudidila wali ibunaga biabe bia haga bereago libu haru tanoha howa tagira pialu hari bare wiagoha daliape halu dindi tigabi wiagoha puabo halu pene.

11 Libu dindi tigabi wiagoha puabo halu hebiria Asiria ami agali bu hearu mamage ibagabu hearia ngola hene. 12 Tigua hapai howa Yudidi hale halu lalu, Libu dindi timbuni agoha howa ibalu hameigini ai aria eberebibe, lene.

Ani layagola Yudidi ibugua ladai bialu lalu, I̱ Hiburu wali bedogonigo tígua wai bialu bo podanda holeberemigo manda bialu i̱ dindi yu wahalu ibida poro. 13 Ai i̱ ami agali tínaga agali haguane Holoberenesehondo bi bayale maru lolego ibu hondo polene hame ledo. Ibu dindi barebare ngaru bibahende bo podai holene hame leagua nde i̱na ibuhondo ogodagua bibe lalu bi lamerogo hale holene nga. Anidagua biyagua nde ibunaga ami agali bu karu bope halu ti wayali holeberemi, lene.

14 Ami agali biaru tigua handalu hemiria Yudidi baya taraore heagola tigua handaya hai hene. Ibugua bi layago hale hai howa tigua ladai bialu lalu, 15 Í̠ore wali oheme hariga baya handarida. Í̠na abale ibalu inanaga agali haguane Holoberenese hondole abale ibiridagome í̠ homolene nawi. Ai gi nahabe. Áyu ogoni ibunaga balai anda kagoha abale pu. Inanaga ami agali bu karume í̠ heba pialu haru halu inanaga agali haguane karia haru polebira, lene. 16 Í̠na ibu deni pu howa gi nahe howa bi bibahende áyu inahondo langirigo damene ibuhondo lamiai habe. Ani beregola ibugua í̠ baya hangu handaya ho holebira, lene. 17 Ani lalu tigua ami agali handari mbirame (100) Yudidila wali ibunaga biabe bia haga biagola haru halu Holoberenese ibunaga balai anda heagola berearia haru halu pene.

18 Ami agali balai andaha bu hearume hale halu hemiria wali baya taraorene tara mbira ibiya layago hale halu ti de hondole gerai ibugu ibugu bini. Tigua Holoberenese berearia wali mbira ibira lalu bi lo yalu piyagola Yudidi ibu balai anda haneni hondo hene. Agali ibu heagoria ho mabu bu howa 19 wali baya taraore heago hondowa mogo lowa tigua bi dewaore laga laga bialu hene. Tigua manda bialu Isaraele wali agali maru karu aria ndo tara mbira harua lo manda bini. Tigua lalu, Hameigini wali baya biraga uruni wali agali abime mege bibehedabe. Iname wali uruni agalini kago damene bo wahai holene karulapeda. Hameigini wali baya biraga tigua wali agali dindi bibahendeha palima pedaru mo hondo hai holigo, lene.

20 Ani lalu hemigola ami agali Holoberenese mamage haga hearubi agali ibunaga biabe bia haga hearubi bibahendeme tagira ibalu Yudidi minu yalu anda ibini. 21 Holoberenese ibu andaga tamuha palene. Ibunaga paliaga dagia ogoni aga mindibi hari mindini handalehemebi ngolo pume wabini wiagome hinabibi anda bu dambihe wini. Aga ogoni pu tara taramebi ege to̱le̱ muni timbunime miaga tara taramebi mo yári bia ho wini. 22 Agali biarume Yudidi ibiya lalu bi lamiyagola Holoberenese ibu balai anda haneni tagira íbu heagola agali marume lamu silibame wabini wiagome hale hedo yalu tigua bamba halu ibini. 23 Yudidi ibu heyu heagola Holoberenese halu agali ibunaga biabe bia haga ibiyadaru ti de hondowa Yudidi dengui baya taraoreyago hondowa ti hame timbuni lene. Wali biago ibugua Holoberenese wanakuihayagi howa ibunaga mini yaraga halu ge duli hanga howa bulu palialu hearia agali hearume mo heya howa heyu helene.

<- YUDIDI 9YUDIDI 11 ->