AISAIA 38

Kini Hesegaia warago bo wiaria Anduane Homogohanda biamogo binigo ogo

(2 Kini 20.1-11, 2 Bi Te 32.24-26)

1 Asirialirume Yudali baba wai bialu mo ko halu heangi Kini Hesegaia ibu warago timbuniore bowa homabeheore wini. Ani homabehe wiaria Emoso igini Aisaia ibu Anduane Homogonaga bi mana latagi haga heagome Kini Hesegaia warago bo wiago hondo puwa lalu, Í̠naga warago ogoni dabi nahe ani bo wiaho wialu homolebere. Ani homoleberego manda buwa ai wali agali í̠ andagaha haga karuni lamialu, Tínaga biabe biaga wiyadagoni mo tiga biai hadaba, lalu lamibe, Aisaiahanda lamini.[a] 2 Bi ogoni layago hale howa Kini Hesegaia ibu beregedalu dengui anda hai heagoha handa ede ho wuwa ibugua Anduane Homogohondo bi lamialu lalu, 3 Anduane Homogo-o i̱na í̠ni hanguore talima ibalu í̠naga biabe hangu biahalu harugoni. Í̠naga hame wiru bibahende i̱na talialu biai harugoni manda bibe, lene. Ani lai howa ibugua dugu timbuni hongo howa bialu berene.[b]

4 Ani bialu bereagola Anduane Homogohanda Aisaiahondo lone lamialu lalu, 5 Hesegaiahondo bi ogodagua labe. I̱ Anduane Homogo í̠ mamali Debidinaga Ngode Datagaliwabe kogome í̠na bi larigo hale halu dugu bialu beregobi handaru. Ani birugo ainde í̠ mali nguiria (15) lone halu homabelo helolebero. 6 Ani bialu i̱na Asirianaga kini kagome ibalu wai buwa Yarusaleme karulelo yupe naholebero, laya lalu Aisaiahanda lene.

7 Aisaiahanda ladai bialu lalu, Anduane Homogo ibugua í̠hondo mbirale bulebero laragoni heneneoredalo manda bibelonaga manane mbira mo walia holebira.[c] 8 Manane ogobi. Bamba Kini Ahasa ibugua egageria mbira wabu wini biago í̠ manda bidegoni. Egageria biagoria ni munini manane handaga biagoria kagola Anduane Homogohanda abaleore ni manane hobane pira dai bilolebira, laya. Ani layadagua ni manane hobane pirani dai biyaria hendene.

9 Hesegaia ibu warago bo wiyago dabiho howa ibugua Anduane Homogonaga mini yaraga halu iba gana ogo gilibu wini.

10 I̱ni mitangi bialu aiore nde i̱ wene daliahe koore dege homalu nde homenerunaga dindi ngagoha pu holoboda.

I̱ dindini holenenaga lu naholoboda mitangi biru.

11 Wali agali dindini nahome karu baba howa

i̱na Anduane Homogo de nahende holoboda.

Wali agali maru homa nabi karubi mbira nahondoleorebero mitangi bu haru.

12 I̱ homo tongolo mini ale kogoni.

Agalime balai anda gialo paulo ngagobi

labolabo wabialu henego podope hagadaguabi binigo kogoni.

Ngode Datagaliwabehanda i̱naga dindi ogoriani holene biba helolebiya mitangi bu harugoni.

13 Laionome mbirale baragonaga kuniru gingiru lalu biralu gao lagadagua

i̱na horombe mbiragabi i̱ tandaga nalu homoliya abale bo waharegonidalo mitangi biru.

14 I̱ha tandaga timbuniore biyagola

i̱ ga̱ lalu berewagola

i̱naga bi emeneore hagarerebi lalu tagira ibiya.

Ega umime u̱ lalu wiagadagua dege lalu wiru.

Dahuliya andagaha howa i̱ biamogo bulene mbira ibirabe hondole handadagaho bira dege biwagola

i̱naga deha de mborere bialu de iba ibiya.

Anduane Homogo-o genda o bu ngagoria howa

i̱ biamogo bialu haru pubagi ha laro.

15 Ai i̱na agi loabe.

Anduane Homogohanda i̱ biamogo buleore layagoni o biragonidabe be agi loabe.

I̱na genda timbuni yu harugo mitangi bigi bialu

áyu i̱ dindini kongi i̱ninaga mini mo dindiha halu holebero.

16 Anduane Homogo-o genda urunime

wali agalinaga mini mo beregedalu bayale tigabi helonaga biamogo biaga winida manda bido.

Mbirale genda tandagabi i̱ha ibiyagome holene gahenge ngiya.

I̱naga warago bo wiwago í̠na mo wahalu i̱ mo dabi harigoni.

17 Mbirale genda i̱ha ibiyaruni bibahende i̱ biamogo bule ibinidane hendedo.

Í̠na i̱ gubalini timbuni howa i̱ wali agali homenerunaga dindiha polilono yu wanahe biamogo birida.

Ani bialu i̱na ko bibahende bialu harugo í̠na domo wahai harigoni.

18 Wali agali homene dindiha karume í̠naga mini yaraga nahabehe.

Homene dindiha karume í̠na wali agali bayale helonaga biamogo biaga kego mo dunubia nahabehe ka.

19 Áyu i̱na bi lalu í̠naga mini mo yaraga halu kodagua

wali agali homa nabi dindini bu karume anidagua bibehe ka.

Waneigini aba karume tinaga waneigini ogodagua lamialu

í̠na mbirale bayale bialu mini bilinahe kego lalu lamiaga ka.

20 Anduane Homogohanda i̱ mo dabi hayagoni.

Ai horo bibahendengi ibu andaga pialu iname ibunaga mini yaraga halu

ngida balu iba gana lalubi ibunaga mini mo yaraga hami̱ya.

Ina dindini nahome kamangi howa anidagua bialu haabo holeberama,

lalu Kini Hesegaiahanda iba gana ogoni lene.

21 Ani lai hayagola Aisaiahanda kinihondo bi lamibe layadagua lamiai howa ibugua kininaga biabe biahaga agali hearuhondo lamialu lalu, Tígua poge lini maru do yalu ibule pudaba, lene. Tigua do yu dai biyagola ibugua tihondo lalu, Hesegaianaga moge hongohe bidagoriani poge lini dambuwa ibane biagome wai haramigola moge biago abale dabi holebira, lene. 22 Ani layagola Hesegaia ibugua Aisaiahondo hale halu lalu, Ai i̱ dabi halu horo tebira howa Anduane Homogonaga anda poleberodagoni henene lalu manane mbira áyunaga i̱hondo agi ale walia holebiradabe, lene.[d]

<- AISAIA 37 AISAIA 39 ->