Hosea Mbuga ogoha gilibu ngarunaga nemandi ogo Ngode Datagaliwabenaga mana latagi haga agali homberiali (12) henerunaga bi mbuga emene dege dege gilibu wigi bini ngarunaga Hoseanaga mbuga ogo ngagoni. Mbuga maru mana latagi haga Aisaianagabi Yaremaianagabi Esegiele imarunaga luni wigi bida. Mana latagi haga Hosea ibu Isaraele dindi uyurahayagi mani bulebirarunaga mbiwia halu bi mana latagi haga bialu heagola ogoningi Asirialime Isaraele dindiha wai bialu wali agali dindi andabi bo gialo bagabu waholene kaware wiagola genda tandagabi timbuniore ngelo dege hene. Hosea ibugua bi irane kiranaga gilibu winigo nga. Bi mbiragome lalu Isaraele wali agalime Ngode Datagaliwabe yu wahalu gime wabini wiaruhondo bi pupu wialu mana ko dege mo tene halu pirimiruni wahalu mini beregedalu dai bidaba lowa bi hongo howa lenego gilibu nga. Bi mendegome lalu wali agali mbiralime ko bialu piyagua Ngode Datagaliwabe ibugua dara halu haru dai bule manda biaga ka leda. Hosea ibuniha Ngode Datagaliwabe ibugua biagane mana ogoni ogobi lalu manane walia ka. Hosea oneme ibu agalini helalu agali mendela kayu yama penego irane Isaraele wali agalirume Ngode Datagaliwabe ibuni helalu puwa gime wabini wiaruhondo bi pupu wialu piyagobi Hosea oneme biyagobi dege ani bini. Ani biyagola mani howa Hosea ibugua ibu one lone haru dai binigo ogoni Ngode Datagaliwabehanda ibunaga wali agaliru dara halu haru dai bulebirarunaga manane walia hene. Ngode Datagaliwabe ibugua ibunaga wali agaliru gubalini timbuniore howa ti yu wanahaga ka lalu gilibu nga. Be 11.8 Isaraelealiru-o i̱na tí yu wanaholebero. Tí helo wahalu napolebero ... I̱na tí gubalini timbuniore ho kogome tí mo ko nahole, Ngode Datagaliwabehanda ani lene. Bu̱lu̱ baga buwa kuni gilibu ngago (1.1–3.5) Hosea ibugua Gome dabu buwa waneigini henego 4.1–13.16 Isaraele wali agalime ko bialu hearia Hoseahanda talinigo 14.1-9 Isaraele wali agalime mini beregedalu Anduane Homogo ibuni karia dai bulebira, lalu Hoseahanda mbiwia halu lenego
1 Usia Yodama Ahasa Hesegaia imaru ti Yuda dindiha kini haga binidangi Yahoasa igini Yaroboama ibu Isaraele dindiha kini hene. Ogoningi Anduane Homogohanda Beri igini Hoseahondo bi ogo lamini.✡2 Kin 14.23-29, 15.1-7, 15.32-38, 16.1-20, 18.1–20.21, 2 Bit 26.1-23, 27.1-8, 28.1-27, 29.1–32.33
Hosea oneme waneigini taba henenego ogo 2 Piganeore Anduane Homogohanda Isaraele wali agali bi lamilonaga Hoseahondo ogodagua lene. I̱naga wali agalirume i̱nihondo bi lalu ha nabi tigua gime wabini ngaruhondo bi pupu wialu uruninaga mini yaraga halu karuni agali onerume ti agalini helalu agali mendela kayu yama poralidagua bialu kagoni. Ogodagua bulebira lalu walia holenaga ai í̠na wali mbira dabu bule pu. Mani í̠ one ogoni agali mendela kayu yama polebira. Ani biragola ibunaga waneiginirume nde ogonidagua dege bialu wali agali kayu yaga holebira, lalu lene.3 Ani laya handala Hosea ibugua Dibilaimi wane Gome dabu buwa mani Gome ibugua igiri mbira taba henene. 4 Ani biyagola Anduane Homogohanda Hoseahondo lalu, Í̠na igiri ogoni ibu mini Yaserili wibe. Irane Yihu ibugua Isaraelenaga mamali kini kira bamba dindi ogoniha bo wahenego manda bialu dindi mini ogoni wibe. Ai i̱na áyu Yihunaga aguanene Isaraelenaga kini karunihondo mana lalu pani mule ngo. Ani berogola maniorebi Yihunaga aguanene uruni aria mbira Isaraele wali agalinaga kini lone naholebiraore.✡2 Kin 9.1–10.36 5 Wai birangi i̱na Isaraele ami agali wai bule dindi Yaserili ogoriani tidiyu pialu karia i̱na tinaga hongo bo podai holebero, lalu Anduane Homogohanda ani lene.
6 Emene howa nde Gomehanda wandari mbira taba henene. Ani taba hono berearia Anduane Homogo ibugua Hoseahondo lalu, Wandari ogoni mini I̱na Gubalini Nahe wibe. Ani larogoni irane i̱na Isaraele wali agaliru gubalini nahe howa tinaga ko biyaruni lone nadomoleore lalu laro. 7 Anigo i̱na Yuda wali agaliru dege gubalini ho kogoni. I̱ni Anduane Homogo tinaga Ngode Datagaliwabe kogo i̱nime ti biamogo bulebero. I̱na ti wai bialu danda timu ayu tiburumebi nogo hosini ami agali wai biagarumebi ndo. I̱na ti biamogo bulene hariga tara mende ngelowa kogoni, lene.✡2 Kin 19.35, Seg 4.6
8 Emene howa wandari I̱na Gubalini Nahe biago ibu emene anda halu andu wahayagola Gome ibugua igiri mende taba henene. 9 Ani taba hono bereagola Anduane Homogohanda Hoseahondo lalu, Í̠na igiri gali ogoni ibu mini I̱naga Ndo wibe. Irane Isaraele wali agali ti i̱naga ndo kagoni. I̱bi tinaga Ngode Datagaliwabe ndoore kogoni, lalu lamini.
Isaraele wali agaliru mani bayale holebira lalu mbiwia henego ogo 10 Mani howa nde Isaraele wali agali dewaore daga labe nahe ibamu ngaligobi holebira. Áyu Ngode Datagaliwabehanda tihondo lalu, Tí i̱naga wali agali ndo kamigoni, leda. Anigo horo mbira tagira ibirangi ibugua tihondo lalu, Tí Ngode Datagaliwabe haluheore kagonaga waneigini kami, lolebira.✡Pig 32.12, Hos 2.23, Yo 1.12, Lm 9.26, 1 Pi 2.10, 1 Yo 3.1 11 Ani bialu Isaraele hameigini Yuda hameiginila mani mo mbiraore halu hameigini mbiraore holebira. Mo mbiraore halu tinaga haru haga agali mbiraore hangu dabo helalu manabi biabebi tigua bulebiraru bibahende bayale hai holebira. Ti bayaleore Ngode Datagaliwabe ibunime mabu hengene ale holebira. Heneneore Anduane Homogohanda biabe ogoni birangi Yaserili ibunaga horo ogoni timbuni gibiore holebira.
HOSEA 2 ->
1 Usia Yodama Ahasa Hesegaia imaru ti Yuda dindiha kini haga binidangi Yahoasa igini Yaroboama ibu Isaraele dindiha kini hene. Ogoningi Anduane Homogohanda Beri igini Hoseahondo bi ogo lamini.✡2 Kin 14.23-29, 15.1-7, 15.32-38, 16.1-20, 18.1–20.21, 2 Bit 26.1-23, 27.1-8, 28.1-27, 29.1–32.33
3 Ani laya handala Hosea ibugua Dibilaimi wane Gome dabu buwa mani Gome ibugua igiri mbira taba henene. 4 Ani biyagola Anduane Homogohanda Hoseahondo lalu, Í̠na igiri ogoni ibu mini Yaserili wibe. Irane Yihu ibugua Isaraelenaga mamali kini kira bamba dindi ogoniha bo wahenego manda bialu dindi mini ogoni wibe. Ai i̱na áyu Yihunaga aguanene Isaraelenaga kini karunihondo mana lalu pani mule ngo. Ani berogola maniorebi Yihunaga aguanene uruni aria mbira Isaraele wali agalinaga kini lone naholebiraore.✡2 Kin 9.1–10.36 5 Wai birangi i̱na Isaraele ami agali wai bule dindi Yaserili ogoriani tidiyu pialu karia i̱na tinaga hongo bo podai holebero, lalu Anduane Homogohanda ani lene.
6 Emene howa nde Gomehanda wandari mbira taba henene. Ani taba hono berearia Anduane Homogo ibugua Hoseahondo lalu, Wandari ogoni mini I̱na Gubalini Nahe wibe. Ani larogoni irane i̱na Isaraele wali agaliru gubalini nahe howa tinaga ko biyaruni lone nadomoleore lalu laro. 7 Anigo i̱na Yuda wali agaliru dege gubalini ho kogoni. I̱ni Anduane Homogo tinaga Ngode Datagaliwabe kogo i̱nime ti biamogo bulebero. I̱na ti wai bialu danda timu ayu tiburumebi nogo hosini ami agali wai biagarumebi ndo. I̱na ti biamogo bulene hariga tara mende ngelowa kogoni, lene.✡2 Kin 19.35, Seg 4.6
8 Emene howa wandari I̱na Gubalini Nahe biago ibu emene anda halu andu wahayagola Gome ibugua igiri mende taba henene. 9 Ani taba hono bereagola Anduane Homogohanda Hoseahondo lalu, Í̠na igiri gali ogoni ibu mini I̱naga Ndo wibe. Irane Isaraele wali agali ti i̱naga ndo kagoni. I̱bi tinaga Ngode Datagaliwabe ndoore kogoni, lalu lamini.