15
Mosesehanda turu howa iba gana lenego ogo
1 Ani biyago hondowa Mosese Isaraele wali agali hearumebi turu howa wai bi lalu iba gana ogo Anduane Homogohondo lo mini.✡Mo 15.3
Áyu Anduane Homogohanda wai bialu wayali taraore hayagonaga
i̱na Anduane Homogohondo iba gana lo mulebero.
Anduane Homogohanda Iyibinaga nogo hosibi nogo hosini agali berearubi
ibaha minu bope hayagoni.
2 Anduane Homogo ibugua i̱ mo hongo haga kago✡Har 3.6, 3.15, Iba 48.14, 118.4, Ais 12.2
i̱na ibunaga mini yaraga halu iba gana lolebero.
Ibugua i̱ pele ngiaga kago
i̱na ibunaga mini mo yaraga halu iba gana lolebero.
Ibu i̱naga Ngode Datagaliwabe kago
i̱na ibunaga mini mo yaraga holebero.
Ibu bamba i̱ abanaga Ngode Datagaliwabe hene kago
i̱na ibunaga mini lene daligaore wini ngago
mo yaraga halu iba gana lolebero.
3 Anduane Homogo ibu wai biaga kago
ibunaga mini Anduane Homogo ka.
4 Ibugua Iyibi amirubi nogo hosirubi nogo hosirume gili laga karisirubi karisi yaga agali hearubi
bibahende iba solowaraha bopebe biai haya.
Iba solowara mini Iba Daramabiha bopebe biyagola
Iyibi ami haru haga haguane hearu ibame nai haya.
5 Bopebe biyagola bibahende ibaha ege to̱le̱ ibira haradagua bialu
unura yupebe bialu ibame nai hayagoni.
6 Anduane Homogo-o í̠naga gi tigagoore hongo gibioreya.
Í̠naga waitigi hearu bame gi mbiraoreme bo gingirulo paya bialu barigoni handarima.
7 Hongo gibihegonime í̠naga waitigi bibahende bope harigoni.
Í̠naga keba holenego ira hungu kiaulo tagi haradagua bialu
gambe aea daradagua í̠naga waitigi karu bo ereba hareya.
8 Í̠na puyabu hongohe pu lelarigoni.
Puyabu hongohe puloyu ibiyagome
iba biago daliga biruyu iraga helaya.
Iba biago halu ki bira migimigi buwa
gana wa mini hagahaga biradagua biya.
Iba kuyamaore unu dindiha bereago giambe hodaga hayagola ege mbaulene.
9 Inanaga waitigirume lalu,
Ina talima ibalu tigua ina minu yani howa
inanaga mbirale bayale yidamaru gingilamu yuwa mo tale bimi̱ya.
Ina hame lara alego mo ya dege bimi̱ya.
Iname ayu tibu yidamarume balu inanenaga hongome Isaraele wali agaliore mo ko howa bami̱yago ma,
lalu hongoho yalu ibirimi.
10 Ani bu yalu ibiyago ndo Anduane Homogo í̠na í̠naga buhe̱ halu mbira hangu latagi harigome
Iyibiali biaru bibahende iba nai hayagoni.
Ibaha to̱le̱ ibira haradagua
unuraore ti kuni duguale ndoni yupe hayagoni.
11 Anduane Homogo-o dama tara tarahondo bi pupu wiaga bu karuni aria mbirago hongohe í̠ aleore ai kabe.
Daligaorebi duninibi baya buruguleorebi í̠ni dege kegoni.
Í̠na hongo gibi howa agalime nabiagane ale tara tara bigi berego
wali agalime í̠ hondowa gi timbuniho bu kagoni.
12 Í̠na í̠naga gi tiga biago dogola amu harigola
dindi wiagome ne ha̱lowa
inanaga waitigi hearu minu mbedogo biya.
13 Í̠nime haru holebero lalu lo wiridagua
heneneore wali agali í̠ni pele miriru baya hangu haru halu
í̠ninaga hongome ina haru halu dindi mbira wali agali nahaga í̠ni dege haga wiagoha haru ibirigo kamagoni.
14 Wali agali dindi tara tarani hearume í̠na bigi biriru hale howa
ti gi dege dindi howa duru ala lalu kagoni.
Pilidiali karubi gi timbuniore halu kagoni.
15 Idomo dindinaga agali haguanerubi gi timbuniore ho ka.
Moaba dindinaga agali hongohe karubi gi howa duru ala lalu kagoni.
Kenana wali agalinagabi hongo bibahendeore pirilipe hai henego ka.
16 Gi holenebi mogo lolenebi ti kagoha ibiraho nga.
Anduane Homogo-o tigua í̠naga hongo timbuni kegoni hondowa
ti gi dege dindi howa mbirale mbira bibe nahe ka.
Ti bame de pigi piagolo ira tili haradagua bu ka handala helalu
í̠naga wali agali Iyibi dindi garabaya hemaria golope hene kamaru
iname ti bolangua halu pole kamagoni.
17 Garabaya hemaria golope halu haru halu ibuwa
í̠ninaga hari mbira í̠ni ogoriani hole lowa dabo wini biagoria haru puwa berelo harili.
Anduane Homogo-o hari ogoriani í̠nime í̠ninaga anda bulebere.
18 Ai Anduane Homogo-o í̠ handame haga kini haluhe haabobo haga kegoni,
lalu iba gana lene.
Miriamuhanda iba gana lenego ogo
19 Iba solowara mini Iba Daramabi biago dombeneha hariga yobi wiyagoria Isaraele wali agali ti dindi ange mendeha howa ange mendeha uba ede hene. Ani uba edede biyaru hondowa Iyibinaga ami biarubi nogo hosini berearubi nogo hosirume gili laga karisini agali heyu hearubi bibahende Isaraele wali agali talima ibaha hariga wiadagua yupebe bialu hearia Anduane Homogohanda iba biago lone biragimbu bilayagola Iyibiali biaru bibahende ibame nai hene.
20 Ani biyago hondowa Anduane Homogonaga mana latagi haga wali Arono mbalini Miriamuhanda ibunaga ngilinge̱le̱ laga irabitele ale mbira wiago mo yayagola Isaraele wali maru berearume nde tininaga ngilinge̱le̱ laga wiaru mo yagayaga bialu Miriamu piyadagua haruru pialu irabitele ale balu turu howa ae̱a kae̱a bialu mali lima pialu hene. 21 Ani pialu howa Miriamuhanda tihondo iba gana mbira ogo lo mini.
Anduane Homogohanda wai bialu wayali taraore hayagonaga ibuhondo iba gana lo midaba.
Ibugua nogo hosibi nogo hosini agali berearubi bibahende mo paraho bagabu ibame bo nai helayagonaga Anduane Homogohondo iba gana lo midaba,
lalu lama pene.
Iba kaubi berenego ogo
22 Uruni bialu Mosese ibugua Isaraele wali agali Iba Daramabi bere biagoria howa haru halu pialu dindi ko wali agali nahaga mini Sua wiagoria haru anda pene. Puwa horo tebiru dindi ko wali agali nahaga ogoriani pu dege bialu iba nolene mbira nabereoreyane hendene. 23 Ani bialu dindi mbira mini Mara wiagoria anda pialu hemiria iba mbira bereago hondowa iba biago nole birimiria nabenahe kau gibiore bini. Dindi ogoriani iba kaubi ogoni bereago hondowa dindi ogoni mini Mara inanaga bi lalu Kaubi wininagaya. 24 Wali agalime iba biago nalu hemiria kaubiyago hondowa tigua keba howa Mosesehondo gimigomo lalu lalu, Ina iba agi noledabe, lene. 25 Ani layagola Mosese ibu mini burugu lowa ibugua Anduane Homogohondo hongo howa bi lene. Bi layagola Anduane Homogo ibugua Mosesehondo ira gabini mbira wiago mo walia hayagola Mosesehanda ira gabini biagoni muwa ibaha mo bape hayagola iba biago kau biyago ereba halu dendebi hene.
Ani bialu dindi ogoriani Anduane Homogohanda Isaraele wali agalihondo ibunaga bi mana lamialu lalu, Langerodagua bilimu, lene. Ani bialu dindi ogoriani dege hearia ibugua ti ba handalu hene. 26 Ani bialu ibugua tihondo lalu, Tígua i̱na bi larogo damene bibahende hale halu biaiore halu i̱na mana bayale manda bidogo bilimu larodagua bialu mana maru ko manda bidogo nabilimu laruyagua nabilimu. Aniore birimiyagua i̱na Iyibi wali agalihondo warago tara tara mirugodagua tíhondo nangulebero. I̱ Anduane Homogo i̱na tí mo dabi haga biago kogoni, lene.
27 Ani bialu Isaraele wali agali ti dindi ogoni yu wahalu dindi mende mini Elimi iba nairia duguaga duguaga bialu homberia (12) dugualuhe bibi ayage ale mini dedi dege panda pira karia (70) buhe wiagoria anda puwa ogoriani handa palene.
<- HARU PENEGO 14HARU PENEGO 16 ->