Dama mitangi bialu bi pupu wiaga Belela Puya mbiralilanaga te nga
3 Babilono wali agalinaga bi pupu wiaga gime wabini mbira mini Bele laga wini. Horo bibahendengi wali agalime balawa bayaleoreru mbasegedi nuha honowa nu homberiabi (12) nogo sibi pira mariabi (40) waini iba dewaore genda magi manda lida handari kirani pira duria (250) lowa urunidagua Belenaga loma wiaga wini.✡Ais 46.1, Yar 51.44 4 Ainde Kini Sairusu ibugua Bele ogoni galoneorebe toba ho howa horo bibahendengi ogonihondo bi pupu wu piaga hene. Anigo ainde Daniele ibu ibunaga Ngode Datagaliwabe kagohondo bi lalu haga hene.
5 Ainde horo mbirungi kini ibugua Danielehondo hale halu lalu, Í̠na Belehondo bi pupu nawi kego irane agibe, lene. Ani hale hayagola Danielehanda ladai bialu lalu, I̱na mbirale bi pupu wulenaga agali gime wabini urunialehondo bi pupu nawiaga ko. I̱ Ngode Datagaliwabe ibuni holeneyi howa ibugua hari daliga dindibi wabialu wali agali bibahende handame ho howa haru haga kago andaneha haga ko, lalu ladai bini.
6 Ani layagola kini ibugua lone hale halu lalu, Í̠na inanaga bi pupu wiaga ngago ibuha holene nayi nga larego irane agome. Mbirale horo bibahendengi loma bu mialu kemaru naiore haga ngago nahendedebe, lene.
7 Ani layagola Daniele ibugua oba halu lalu, Kini-o í̠ tigua mohondo halu helo waholene nakarulape mbira kegoni. Mbirale bi pupu wiaga mini Bele ogoni dindime wabuwa daliga mboronosime para hadambi howa ngago ogonime tomobi ibabi mbira nolene nakarulapeore ndobe, lene.
8 Kini ibugua bi ogoni hale howa ibu tandaga emene ndo howa ibugua Belenaga loma binigo mo miaga agali bu hearu ibidaba lene. Ibiyagola ibugua tihondo hongo howa lamialu, Tígua bi pupu wiaga Bele ogonime tomo loma bu mialu kemagonaga lalu heneneore mo walia naharimiyagua nde tí homalimulo bo wahai holebero. Anigo ainde bi pupu wiaga Bele ogoni ibugua loma wialu kemaruni bibahende heneneore naiore haga ngago mo walia harimiyagua nde Danielehanda inanaga bi pupu wiaga baya ngago mege biyago ainde ibuni homelo, lene. 9 Ani layagola Daniele ibugua kinihanda bi layadago karulape lene. Agali Belenaga loma binigo mo miaga pira karia (70) bibahende howa ti one waneiginibi bere hene. 10 Ai Daniele ibu kini heba bi pupu wiaga Belenaga anda heagoha pene.
11 Piyagola Belenaga loma binigo mo miaga agali hearume lalu, Kini-o ina bibahende tagira piai haramagola í̠nime tomobi waini ibabi tebolo dagia ngagoria mo manda manda bu wiai habe. Ani wialu í̠ni tagira pialu panga baya hangu paya dai bialu kininaga magi pangani helabe. Ani bialu egerebahagi dai bibe. Dai buwa handalu keria Bele ibugua tomo uruni nai nahe wiagua nde í̠na ina bibahende bo wahai habelo. Anigo tomo uruni nai hayiyagua nde Daniele ibugua inahondo bi ko layagonaga ibuni homelo, lene. 12 Anigo ainde agali loma binigo mo miaga uruni tigua anda ogoni tamuha panga wia do hene mbira dagia wiago andaneha ngelo howa ti mogo nale hene. Ani ngelowa mbiraga bibahendengi tigua panga wia do hene ogoniha anda puwa tomo ngago nai halu piaga hene.
13 Ai agali loma binigo mo miaga biaru ti peagola kini ibugua tomobi waini ibabi dagiani mo manda manda bu wiai hene.
14 Ani wiai heagola Danielehanda agali ibunaga biabe bia haga hearuhondo lamialu, Be abalu dewaore dugu yalu ibuwa anda tamuha wali agali ge haga wiagoria dugu paya bu ngeladaba, lene. Mbirale ogoni biyago kini ibu hangu hendene. Ani biai halu ti tagira puwa panga payadai bini. Payalu kininaga magi pangani de hondo wialu ti andaga pene.*Tigua panga payadai bialu kininaga magi pangani delene. Anidagua biyadagoni irane agali mbira kagome ti pedaha aribia howa panga duguayagua nde kininaga magi helayago panaga budalu panga duguayada lo hondolebira.
15 Anidagua bialu peagola mbiraga urumaha agali Belenaga loma binigo mo miaga hearubi ti one waneigini bu hearubi bibahendeore horo bibahendengi biaga winidagua panga haraba wia do hene biagoha anda puwa tomobi waini ibabi dagiani manda manda bu wiyago naiore hene.
16 Egerebagiore kini Danielela heyalu Bele bi pupu wiaga andaha tomo wiyago hondole pene 17 Puwa kini ibugua Danielehondo lalu, I̱naga gi magigo hondole pangani helarugo budayadabe nabudidabe, lene. Ani layagola Danielehanda ladai bialu lalu, Agali haguane-o nabudida, lene.
18 Ai kini ibugua panga dugualu anda puwa handalu hearia tomo dagiani manda manda bu wiyago nawiyagola ibugua lalu, Bele í̠ timbuniore. Í̠ ke̱ nahaga kegoni, lene.
19 Ani lole lalu heaore dege Danielehanda oba halu kinihondo hondo ha hondo ha lowa lalu, Ai dindi ge haga ngagoria de ala handa. Ai i̱ hale holiya ge hayadago ogonaga ge lalu langi, lene.
20 Ani layagola kinihanda ge biago hondowa lalu, Walibi agalibi waneiginibi hai hayadane hendedo, lene. 21 Ani lalu kini ibugua keba timbuni howa, Agali loma binigo mo miaga biarubi ti one waneigini heba ibaiore hadaba, lene. Ai tigua ibalu anda tamuha panga haraba wiado hene ngagoha anda ibalu tomo nai haga wiago kini hendelo mo walia hene. 22 Ani biyiyagola kini ibugua badaba layagola agali loma binigo mo miaga biaru homelo bo wahai hene. Ani bialu kinihanda wali agalinaga bi pupu wiaga Bele wiago Danielehanda Bele heba ibunaga anda timbuni heagobi bo gialabaga bialu mo ko hai hene.
25 Ani layagola Danielehanda ladai bialu lalu, I̱na Anduane Homogo ibu hangu holenehe kago ibunaga mini hangu yaraga haruli. 26 Ai kini-o í̠na karulape lariyagua nde i̱na puya timbuni ogoni bo waholebero. I̱na ogoni bole howa i̱na ayu tibu wai biagane nene gadele ngagobi kangobi mbira nayi howa bameore homelo bolebero, lene. Ani layagola kinihanda ladai bialu, Karulapego í̠na babehedabe hondole pu, lene.†Henene dege puya ogoni ibu holeneyi ema bialu piaga winigo ai nde Daniele ibugua mitangi bialu i̱na puya ogoni baruyagua nde ogonime kini mo mini wia halu puya ogoni ibuhondo bi pupu wulene nagaloneore nga lalu mo walia howa bolene manda bini.
27 Ani laya handala Daniele ibugua puwa mundu kalaro ale mbirale mindibi ndobabi wiagobi nogo habene wiarubi wali agalinaga mandaribi mo biamaga howa todobeneha hiruwa deagola mo molo̱ molo̱ bigi buwa puya biago nelo mini. Puya biagome mbirale uruni nai hayagola ibunaga tombene timbu halu pururu lalu tulalaki hene. Ani homayagola Danielehanda tihondo lalu, Tínaga bi pupu wiaga wiyuago ogonibe, lene.
28 Ani biyago Babilono wali agali bibahendeme hale hai howa tigua keba timbuni howa tinaga kini bope hole manda biai hene. Tigua hongo howa lalu, Ai inanaga kini biago ibu ai Yudali hayada. Abale inanaga bi pupu wiaga Bele bo pambulabaga bu wahai halu agali Belenaga loma binigo mo miaga hearu bo wahai hayago. Ani bialu mani inanaga puya dama bi pupu wiaga wimago bo wa hayada, lene. 29 Tigua kini berearia puwa kinihondo lalu, Daniele ibu inanaga giha minu ya habelo hame ledema. Anidagua layagola iname í̠nibi í̠ one waneiginibi í̠ damene bibahende bo wahai holeberema, lene.
30 Tigua genda timbuniore kini mo ya hene. Anidagua biyagola ibugua gi timbuni howa Daniele tinaga giha minu ya hene. 31 Ani biyagola tigua Daniele minu yalu puwa gundu uli laiono heagoha bape hene. Ani buwa tigua horo waragaria uli laiono haga wiagoha ngelo hene.✡Dan 6.16-24 32 Gundu uli laiono haga ogoniha laiono karia hene. Horo mbira mbirani laiono ti wali agali kira nalu nogo sibi kira naga hene. Anidagua biaga henego ai horo ogoningi laiono urunime Daniele balu nelonaga tigua laiono tomo nami hene.
35 Ani layagola Habaguguhanda ladai bialu lalu, Í̠ Babilono nahendene kogoni. Ani bialu laiono uli ogoni agoha ngabe i̱ manda nabi kogoni, lene.
36 Ani layagola dahuliyali biagome Habagugunaga mandari heagoria yaraga howa yalu harini puyabu poradagua bialu Babilono yu pene. Yalu puwa Babilononi laiono uli wiagoria kaware yu ibira hene.✡Ese 8.3 37 Ani biyagola Habaguguhanda lalu, Daniele Daniele-o Ngode Datagaliwabehanda í̠naga tomo maru wia hayago mo ibu, lene.
38 Daniele ibugua Habaguguhanda bi layago hale howa Ngode Datagaliwabehondo bi ogodagua lene. Ngode Datagaliwabe-o í̠na i̱ mitangi bu haga kegoni. Wali agali í̠ gubalini haga karubi embeda nahagaore kegoni, lene. 39 Daniele ibu abale heyuwa tomo nalu berea handala Ngode Datagaliwabenaga dahuliyali biagome Habagugu yalu ibuni dalu yu dai bini.
40 Ai horo kaneni kini ibugua Danielenaga dugu bulenaga laiono uli wiagoria pene. Puwa uli biagoha handape halu hearia Daniele laionome balu na nabi berearia hendene. 41 Ani hondowa kini ibugua hongo howa ladaga howa lalu, Danielenaga Ngode Datagaliwabe í̠ hangu Anduane Homogo kegoni. Í̠ hangu Ngode Datagaliwabeore kegoni, lene. 42 Ani lalu agali bu hearu hondo lamialu Daniele uliha bedago irigi halu ibilo yamidaba lene. Ani bialu kini ibugua Daniele bolene manda biaga hearu tini laiono uli biagoha minu bape hadaba layagola tigua minu bape hene. Ani bape hayagola kini ibuni de hondo heaore dege laiono biarume agali biaru abale balu buda migimigi bialu nai hene.
- b Tigua panga payadai bialu kininaga magi pangani delene. Anidagua biyadagoni irane agali mbira kagome ti pedaha aribia howa panga duguayagua nde kininaga magi helayago panaga budalu panga duguayada lo hondolebira.
- ~3~ Henene dege puya ogoni ibu holeneyi ema bialu piaga winigo ai nde Daniele ibugua mitangi bialu i̱na puya ogoni baruyagua nde ogonime kini mo mini wia halu puya ogoni ibuhondo bi pupu wulene nagaloneore nga lalu mo walia howa bolene manda bini.