1 Yudasa halu ibunaga agali biaru Samaria dindihayagi ka layago Nigano ibu hale hene. Ani hale howa ai Nigano ibugua wai hanalu Yudasa halu ibunaga agalirume Sabadani wai biadai nabulubada lo manda buwa ibugua Sabada horoni wai bu pole manda bini. 2 Ani pole manda bu ha hearia dege Yuda agali maru Nigano heba hearume ibuhondo lamialu lalu, Agali lu mini nawime biagadagua wali agali homelo Sabada horongi wai nabulebere. Horo Ngode Datagaliwabehanda mbirale bibahende karubi ngarubi handai haga kago ibugua mbirale ibunaga ngelo dabalu handaya ho haga kago ibunaga deni mana bayale hangu bialu holene nga. 3 Ani bialu agali ko dama Heyolabe igini ogoni ibugua tihondo hale halu lalu, Agali haguane mbira hari daligaha howa ogoni ibugua inahondo Sabada horo dabo ngelalimu lene ngabe, lalu tihondo hale hene. 4 Ani layagola tigua ladai bialu lalu, E̱ Anduane Homogo ibu holenehe yu howa mbirale bibahende karubi ngarubi haru hai haga kago ibugua inahondo langialu Sabada horo ogoni talialu halimu, lene.

5 Ani layagola Niganohanda lalu, I̱ hangu daliga howa dindi ogo i̱na handaya ho howa i̱na tíhondo langialu tínaga wai biaganeale ngemiru mo yai halu kininaga biabe bule pudaba laru, lene. Anigo ibugua ibuninaga hame ko wiyadago talialu habe nahe hene.

6 Nigano ibuninaga mine halu biaga tingi hayagome ibugua lo mitangi bialu, Í̠na Yuda baba wai buwa Yuda ami karu bope halu tinaga dabudabu ngaru bibahende ibu mo yai halu puwa ege to̱le̱ timbuni mbira ibugua wai bialu wayali henego mitangi biaabo holenaga hama dombeni hongole manda bini. 7 Ani bialu heago helowa Yudasa Magabeusu ibu mogo nale hene. Anduane Homogohanda ibu biamogo bulubada lo manda bu hene. 8 Ani howa ibugua ibunaga ami agali biarunaga bu miniha mo hongo ho howa lalu, Agali Anduane Homogo yu tiga nabiaga ina baba wai bule ibiragohondo gi nahalimu. Ngode Datagaliwabehanda ina biamogo biaabo haga kago mitangi biadai bulene nga. Ani bialu ayubi nde Ngode Datagaliwabe Bibahende Hongo Haiheore kago ibunime ina biamogo bialu kagola iname wai bialu bo podahana holeberema lo manda bialu ibuhondo mini mbiraore hongohe wu holene nga, lalu lamini. 9 Ani bialu Yudasa ibugua ibunaga ami agali biaru bi bayale mana mbugaha howa lo wini wiarumebi agali maru Anduane Homogonaga bi latagi halu mbiwia haga henerunaga bi lo wini wiaru tinaga buminiha hongo ho helo mo hongo halu hene. Ibugua tihondo lamialu lalu, Wai bialu tí wayali haga wirimigo baya hangu mitangi bilimu, lene. Ibugua bi ogonidagua laga biyadagome ti wai hongo howa bilonaga mo hongo halu laga bini. 10 Ani lai hayagola ibunaga ami agali biarume wai bule manda manda bu hene. Ibugua ti lamialu, Agali Ngode Datagaliwabe kagohondo mini mbiraore nawiaga howa bi henene lo wini ngago mo habo lalu mo hondo halu ohaga bu kago baya hangu de hondo halimu, lene. 11 Yudasahanda ibunaga ami agaliru mo hongo halu danda timu humbiru mo mini ndo. Ibugua tihondo mo hongo halu bi bayaleru dege lamialu mo hongo hene. Ani bialu emaga mbira Yudasa ibugua hendenego tihondo lamialu bini. Agali bibahende emaga bini te layago hale howa henene layabe toba ho hai hene.

12 Yudasa ibugua emaga handayadagoha agali loma binigo mo miaga haguane timbuni mini Oniasa bamba halu homenego ogoni hearia hendene.*Oniasa ogoni ibu ala henego ibunaga te 2 Magabi 3.1–4.38 ogoniha gilibu nga.) Agali Oniasa ogoni ibu bayale tigabiore howa ibuni mo dindiha ho howa hendore dege bulene ngago bialu haga hene. Ani bialu agali bi lagane gibiore mbira hene. Bamba igiri emeneni howa ibu mana bayale tigabi bulene ngaru hangu bulenenaga sigulu bialu hene. Ani bini henego ai Yudasa ibugua emagaha handalu hearia Oniasahanda ibunaga gi doladaga howa Yuda wali agali bibahendenaga bi la halu hearia hendene. 13 Ani hondo heagola agali mende ha pana howa Oniasahanda bi layadagua dege lalu hearia hendene. Agali ogoni ibu waheoreni daguaheyago agali mini lene howa hongo tara yi heago hendene. 14 Ai Oniasahanda lalu, Agali ogoni ibu Ngode Datagaliwabenagabi mana latagi halu mbiwia haga ibu mini Yaremaia ka. Ibugua ibunaga wali agali Ngode Datagaliwabe ibuninaga tano Yarusalemeha bu karu gubalini timbuni ho haga ka laya, lene.

15 Ani hondo hewagola Yaremaia ibunaga gi tigahayagi ayu tibu nene gadele wai biagane baya tara ngolome wabini wiago yu hearia handaru. Ayu tibu ogoni Yudasa mialu 16 ibugua lalu, Wai biagane ayu tibu ogo yamia. Ayu tibu ogoni baya buruguleore loma biahego Ngode Datagaliwabe ibunime í̠ bameore mo turu halu ngirago ogonime í̠naga waitigi bo wahai habelo biamogo bulebira, laya lene.

17 Ani layagola Yudasanaga bi bayale ogonime ami agali bu hearunaga bu miniha mo kula halu mo heya hai hene. Igiri daliahe hearu ti agali wahe hearuha howa hongo mini. Ani howa heyalu wai pora bima lalu bi lo mbira hai howa waitigi baba wai bule pene. Ami agali mbirame mo ta halu tinaga waitigi mbira mbira headagua wai biaho wialu wai bu maro bini. Tigua ogonidagua bulene wai henenedagoni irane tinaga waitigime tinaga tano bo gialahole bu wahai halu tinaga lotu manabi Anduane Homogonaga andabi bibahende bo haealabaga biai halu mo ko hole ibiragola tigua wai ogoninaga pene. 18 Yuda ami agali uruni tigua ti onebi waneiginibi ti damenebi bibahende mo embeda hai halu Ngode Datagaliwabenaga anda kago mitangi halu wai pene. 19 Wali agali Yarusaleme tanoha hondo hearu tigua dindi tigabi wiagoria wai biyagola gi timbuni howa mini burugu lalu genda yu hai hene.

20 Wali agali tigua ai ibugua bo podahana harabe toba howa gi halu mini burugu lo hene. Ani hondo heagola waitigi ami ti ibalu wai bule amuna tidiyu hene. Nogo hosi wai biagame lene labolaboha heagola nogo elebana wai biaga hearume dombeneha hene. 21 Ainde waitigi ami agali iba ale timbuni íbu hearubi wai biagane masini tara tara yiarubi nogo elebana gabua haru hearubi bibahende Yudasa ibu de hondo hene. Ani hondowa ibugua gi yaraga halu Anduane Homogo ibuni mbirale agalime nabiagane ale biai haga kagohondo bi lene. Anduane Homogonaga minini howa wai pora birago ibu pari wayali halu danda timuru hongoni howa wai birago ibu wayali nahaga ngago ti manda bini. 22 Ani manda buwa Yudasahanda Anduane Homogohondo bi lene. Ibugua lalu, Anduane Homogo-o ainde Hesegaia ibu Yudanaga kini heangi í̠nime dahuliyali mbira ibilarigola ibugua Kini Senageribinaga ami agali daosini dege handari mbira pira halirani duria (185,000) bibahende homelo bo wahai hene.✡2 Kin 19.35 23 Ainde Anduane Homogo-o ayubi nde ina waitigi karume de handalu mogo lowa duru lalu helo í̠naga dahuliyali mbira ina haru halu bamba helo ibilabe. 24 Í̠ninaga hongo gibiore kegome waitigi agali í̠nihondo bi ko ngubiru lalu oali ibuwa í̠naga wali agali bu karu bo wahai hole karuni bo hilo wahaiore habe, lene. Yudasahanda Anduane Homogohondo bi lenego ogoni.

25 Nigano halu ibunaga ami agali biarume wai porabupe halu howa pilipe biguli pu lalu wainaga iba gana laga laga bini.✡1 Mag 7.43-50 26 Anigo Yudasa halu ibunaga ami agali biarume wai pora bialu waitigi ngola hole pialu howa tigua Anduane Homogo olalu ibunihondo bi lama pene. 27 Tinaga bu miniha howa Anduane Homogohondo bi lalu tinaga gime wai bialu hene. Anidagua bialu Yuda tigua waitigi agali daosini dege pira tebirani duria (35,000) bibahende horo ogoningi homelo bo wahai hene. Anidagua buwa Ngode Datagaliwabehanda ti biamogo biyagonaga tigua turu timbuni hene. 28 Wai biai howa ti turu timbuni hene. Ani bialu andaga dai bialu howa handalu hemiria Nigano homo tungulo miniyago ibunaga wai pole mo karu laganealeru karulaabore wiaria handa walia hene. Ani handa walia howa 29 tigua huaro laga laga bialu tininaga bi lalu Anduane Homogonaga mini mo yaraga hene.

30 Yudasa Magabeusuhanda ibunaga wali agali biamogo bialu mo wulenaga wai bialu howa horo bibahendengi ibunaga mini dininibi tinginibi heba howa wai biaga hene. Yudasa ibu wene igiri emeneni howa hama ibinidagoha howa ibuore ibunaga dindi gubalini ho kago mo walia ho haga hene. Ai Yudasa ogoni ibugua ibunaga ami agali hearuhondo lamialu, Niganonaga gi tigabi haguanebi pugu yalu Yarusaleme pudaba, lene. 31 Ani lalu tigua ani pugu yalu Yarusaleme tano anda puwa ibugua wali agali bibahendeore íbu ngoai hadaba lowa agali loma binigo mo miaga hearu ti Anduane Homogonaga lomabu delaga dabu heago wanakuihayagi hadaba lene. Ani bialu ami agali wai pabeanda hongohe heagoha haga hearubi olalu íbu ngoai hadaba lene. 32 Ani layagola tigua íbu ngoai howa agali ko Niganonaga haguane pugu yu íbu wiago de handalu gi ko Anduane Homogo Bibahende Hongo Haiheore kagonaga anda ogo bo gialo wahai hole lo gi dola haga biago wiaria de hendene. 33 Ai Yudasa ibugua lalu Niganonaga hége minu duguwa ega bedarume nelo mialu gi biagola haguanela wai pabe neneni amu Anduane Homogonaga anda kagoha handa daibu wilo mo paga hadaba layagola tigua anidagua ngelene. Niganohanda mine howa mana lehe bialu hayagonaga pani nenego te ogoni hangu. 34 Wali agali bibahendeme hongo howa hoaro ladaga daga bialu Anduane Homogohanda ibunaga hongo timbuni wiago tihondo mo walia hayagonaga tigua ibunaga mini yaraga halu lalu, Ngode Datagaliwabehanda ibunaga dindi ibunaga loma bia hene ngago ibunime baya hangu handaya ho hayagonaga iname ibunaga mini yaraga hama. Ibunaga anda ilili biagaore wiabagi hene wiago waitigi agalirume ibalu bo gialo wahai helo yupe nahaga ka, lalu hene. 35 Wali agali bibahendeme Anduane Homogohanda ti biamogo biyadago de handai helonaga Yudasahanda Niganonaga haguane biago wai pabeanda kago anda háini mo derela hene. 36 Ai wali agalime bi lo mbira halu lalu, Mali mbira mbirani howa iname horo timbuni ogoni mitangi biaabo hami̱ya. Horo ogoni ege hombenenaga (12) horo halene (13). Tinaga bi lalu ege mini Adu laga nga. Horo ogoni horo Modegainaga horo biago mani dege ibule ngelowa ogoni ibu ala mo bamba ho ngelene.†Yudanaga ege mini Adu ogoni inanaga ege mende tebonela hengeneha ibaga nga. Modegainaga horo timbuni ledagoni Yuda wali agali horo timbuni mini Purimi lagane ngago leda. Te Eseda 9.20-32 ngago hondolene nga.✡1 Mag 7.49

37 Ai Niganonaga binigo te ogoni hangu. Ogoni howa Yuda tinime Yarusaleme handaya ho henego hama ibalu ayu kemagonigo ainde i̱na te ogoria howa haru lalu lamaro bero. 38 I̱na bite ogoni baya hangu gilibu ngogola te wáleni bayale dendene heyagua nde i̱ni turu ko. Ai te ogoni wá naleyagua nde te nagalone dewa wiagua i̱na ogodagua laro. Gilibu manda dege biru laro. 39 Ainde waini iba hangubi iba henene mendego hangu nolene bayale dendebi ndo ngago ina manda biai kema. Dende bilonaga waini iba henene mo biamaga haramagola dende biaga ndobe. Anidagua dege te tara tara ngaru heba mo biamaga howa gili beremagola daga laga kagonaga te bayaleore hale hoabi hale holebira. I̱naga bi lamaro ogoni.

<- 2 MAGABI 14