2 MAGABI 13

Menelausu homelo bo wahenego ogo

1 Mali handari mbira pira mariani dira (149) layagola Yudasa halu ibunaga ami agali biaru handalu hearia Andiogusu Yubadohanda ibunaga ami agali haru halu Yuda dindiha anda ibira layago hale hene. 2 Agali mende mini Lisiasa ibu Andiogusu ibu aba hamene gabumane agali haguane mende henego ogoni libu haru mandagi ibini. Ani bialu Girigi ami agali bu hearubi ti haru ibini. Ami agali geni piaga dewaore daosini dege handari mbira pira mbira (110,000) ibalu ami agali daosini duriani handari tebira (5,300) nogo hosini biruwa wai biaga heba ibini. Ani bialu wai biagane nogo elebana pira kirani kira (22) haru halu wai biagane garo ale nogo hosime gili lagane wiarunaga ge bibahendeni wai biagane ayu nabi nene gadeleru wabu helaga binigo handari tebira (300) bibahende ibalu bini. 3 Ani pialu howa Menelausu ibu ohowa ti haru mandagi wai ma lalu ti heba petingi halu Andiogusu bime ladebodebo bima pene. Ibugua anidagua binidagoni ibunaga dindi mitangi halu ibu dindinaga oha ndo ibu agali mini lene timbuni mbira loma binigo mo miaga agali haguane timbuni kago dugu waholigonaga ibu ohowa ti heba mandagi pene. 4 Ani pialu heagola Kini haguaneore kago Ngode Datagaliwabe ibunime Andiogusunaga miniha mo tandaga timbuni helowa Menelausuore biba helelo mo bia hene. Ani biyagola Lisiasahanda kininaga deni howa tigatiga latagi halu lalu, Genda tara tara Kini Andiogusuha tagira ibugu biyago tene Menelausu kagome ibiya, lalu latagi hene. Anidagua layagola kini ibugua lalu, Menelausu ibu homelo Beria tanoha puwa tininaga maname homelo bagane ngadagua bole pudaba, lene. 5 Beria tano ogoniha dabu bima irigi hene magi manda daliganaga mida pira kirani duria (25) henego dabu ogoniha ira punga be abalu dewaore wini. Dabu bima irigi hene ogoni tamuhayagi bu yulopehe hene. 6 Ai wali agali tano ogoniha hagarume de hondo karia mbiralime mbirale lotunaga ngaru mo ko halu mana ko mbira birane handayagua tigua dabu daliga ogoriani haru irigi howa homelo dindiha be abalu ngagoria helope haga. 7 Ai agali Ngode Datagaliwabenaga mana lo wini ngago pugualu haga Menelausu ibu anidagua dege homene. Ani homayagola tigua ibunaga tingini mo hora nahene. 8 Ibugua mana ko biaabo halu Ngode Datagaliwabenaga dabu kagoria be abalu wiago mo ko halu haabo haga henegonaga pani ogoni karulape nene. Anidagua binigome ibuni lomabu delaga dabu kagoria be abalu wiagoria homadambi hene.

Modeini tano kawareni wai binigo ogo

9 Ai Kini Andiogusu ibu ibalu heagola ibunaga bu miniha keba holene timbuni tagira ibini. Ibugua ibu aba henego bolangua howa Yuda wali agali tandaga nolene dewaore mo mule manda bini. 10 Ai Kini Andiogusuhanda anidagua bule manda bu ka layago Yudasa ibu hale howa ibugua Yuda wali agali lamialu, Mbiraga horombebi Anduane Homogohondo bi hongo howa laabo halimu, lalu lamini. Waitigime ibalu horo ogoningi tinaga mana lo wini ngagobi dindibi Ngode Datagaliwabenaga anda kagobi bo gialo wahai halu mo ko hai holebiragonaga bi lahalu halimu, lalu lamini. Ibugua lalu, Ngode Datagaliwabehanda ti abale biamogo biyadagua ayubi nde biamogo bulebira. 11 Tínaga dindi ala mo ko hene labu dindi winigo ayu emene bayale ngago mani agali ko Anduane Homogohondo mini mbiraore nawiaga karunaga hongo andaneha pilaede holigonaga bi lalimu, lalu lamini. 12 Ani layago lole howa wali agali bibahendeme Yudasanaga bi layago taliai halu bini. Tigua horo tebirani howa Anduane Homogo dara holene irane nawini dara timbuni haga kagohondo bi lalu haabo hene. Tigua tomo nane dindini dengui handa dindiho paluwa Anduane Homogohondo dugu bialu hene. Ani bialu heagola mani Yudasahanda ti olo mogo buwa lamialu, Wai bule manda manda bu halimu, lalu lamini.

13 Ai Yudasa ibugua agali haguane hearu baba mandagi ngoai ho biruwa tigua bi lo mbira halu lalu, Tigua ayu ogoniore heyalu wai poramagola Ngode Datagaliwabe ibunime ti biamogo biragola wai kini karia bu yalu polebirago ai kini ibu wai Yuda dindihabi Yarusalemebi anda naibidaore iname wai ala anda polene nga, lene. 14 Ani lalu Yudasahanda mbirale bibahendeore dindi harilabi uruniha karubi ngarubi wabiaga Ngode Datagaliwabe ibuninaga giha mo ya hai halu ainde ibunaga ami agali hearume wai hongo howa bilo tinaga miniha mo hongo hene. Ani biyagola tigua nde Ngode Datagaliwabenaga mana ngagonaga manda bialubi ibunaga anda kagonagabi Yarusaleme tano mitangi bialubi tinaga dindi bibahende mitangi bialu tinaga mamali mana ngago mitangi bialubi homole manda buwa hongo ho hai hene. Ani howa tigua tano Modeini wiagoria puwa balai anda bini. 15 Ani bialu Yudasa ibugua ibunaga ami agaliru wai bilonaga hoaro lalu howa lalu, Ngode Datagaliwabehanda wai bialu waitigi bope halu wayali holebira, lene. Ani lalu mbiraga howa igiri daliahe gi nahaga hearu haru halu Yudasahanda wai mbiraga kininaga balai anda bu paleagoha anda pene. Puwa mbiraga ogoningi kininaga ami agali daosini kira (2,000) bibahende homene bai hene. Ani bialu wai biagone nogo elebana duniniore heago heba nogo ogoriani mo tiga bialu biraga heago heba homelo balu bini. 16 Ani bialu tinaga waitigi bibahende mo luluya hai halu mo gi hai hene. Ani bialu ai Yuda ami tigua wai bialu wayali hayagonaga turu howa gao layagola waitigi dalu wahalu pene. 17 Anduane Homogo ibunime Yudasa baya hanguore handaya ho howa haru heagome mbirale tigua biyago bayale dege biai hene.

Andiogusu dauni ibugua haabo nalolene bi lo winigo ogo

(1 Magabi 6.48-63)

18 Ai kini ibugua wai Yudame biaga wiago baya hangu hondo manda biai howa ai Yuda dindiha tano wai pabe hongohe bu mabubi wiaru bo podahana halu karulole manda buwa ohowa wai henene. 19 Ani manda bialu puwa Yuda tinaga wai pabeanda hongohe Bedesu tano wiagoria anda pene. Ani puwa tano ogoni mulenaga wai hongo howa bialu hene. Ani bia biyagoyu Yudame ti bo heladai bini. Ani biyagola harugo lowa wai hongo howa biadaiore bialu hearia ibu lone boga hana hai hene. 20 Ani biyagola Yudasa ibugua tanoha wali agali wai bialu hearunaga dabudabu maru mo pelene. 21 Ani biyagola Yuda ami agali mbira mini Lodogusu henegome Yudasahanda ani biya lalu waitigi hearu lamini. Ani lamiyayago Yuda wali agalime handa walia howa agali Lodogusu ibuni minalu homelo bo wahene. 22 Ani biagola ai kini ibugua Bedesu wali agali baba baya hangu mandagi biruwa bi lalu, Ina wai nabi baya hangu hami̱ya, lalu habo nalolene bi lo wialu wali agali baba gi tigani bialu kini ibu pene. Ani bialu puwa kini ibugua Yudasala wai bialu hearia Yudasahanda kini bope halu wayali hene. 23 Ani bialu howa kini ibu hale halu hearia agali mbira mini Pilibi Andiogo tanoha gabumane biabe damene bibahende haru howa mamage habe leago lulu tagira piya layago hale hene. Ani hale howa ai kini ibunime ago bule harube toba halu mini naibiore ona hene. Ani howa ai ibugua Yuda wali agali baba bi lalu berene. Ani biruwa Yuda wali agalime bi ibuhondo bilonaga hale hayaru e̱ lalu ibugua, Ai Yuda wali agali tíninaga mana bialu haga winidago baya hangu talialu bialu halimu, lene. Ani lowa ti baba gi tigani bialu mbira lomabu delalu bini. Ani bialu ibugua Yarusalemeni Anduane Homogonaga anda heagobi anda ogoniha mbirale wiarubi bibahendenaga mini yaraga halu bini. 24 Ani bialu ibugua Yudasa Magabeusu ibu andagaha haru anda pialu libu nenegeore hene. Ani bialu agali mbira mini Hegemonidese heago dabalu ibu gabumane haru haga haguane dege mbira helowa ibugua dindi maru mini Tolemese tano howa pialu amuraore Gera tano tagira pedago haru howa handaya ho helo helene. 25 Ani bialu kini ibuni Tolemese tano pole pene. Wali agali dindi uruniha hearume kinihanda habo nalolene bi Yuda wali agali baba lo wiyayago manga halu mo waha lo manda bu hene. 26 Anigo Lisiasahanda heyu howa habo nalolene bi lo wiyago mo hongo halu bi lone la dege bini. Ibugua wali agali baba bi hendore lalu tinaga bu mini mo beregedaga bialu hene. Ani lalu wali agalime ibu baba mini mo mbiraore hai haya handala ibu Andiogo dai bini.

Te ogoni kini ibugua wai bule pialu hearia ainde wai bibe naheya handala ibuni andaga dai binigonaga ogoni hangu.

<- 2 MAGABI 12 2 MAGABI 14 ->