1 Ainde mani howa Lisiasa ibu kini hanini howa gabumane agali haguane dege mende henego ibu te uruni hale howa keba timbuni hene. 2 Ani howa Lisiasa ibugua ami agali geni pialu wai biaga daosini dege pira halira (80,000) mo mogo bialu ami agali nogo hosini biruwa wai biaga dewaorebi mo mogo bu helalu bini. Ani bialu tigua Yuda hameigini baba wai bule tidiyu pene. Ani pialu howa Lisiasa ibunaga miniha Yarusaleme tano ngago Girigi dindi ngaru aria dege wiagimbu bu ngelo ibugua yamuleore manda bialu pene. 3 Ani bialu Ngode Datagaliwabenaga anda kagonaga muni dagisi dindi maru ngaruha howa dagisi biaga ngadagua dege ngi lole manda bialu pene. Anduane Homogonaga loma binigo mo miaga agali haguane mali mbira mbirani agali mbirame ibu muni mirago ibu ho aribia haga bilo hamelo hene. 4 Lisiasa ibugua Ngode Datagaliwabenaga hongo gibiore ngago mitangi nabiore hene. Ibugua ibunaga ami agali dewaore daga labe nahe hearubi nogo hosi hearubi nogo timbuni tara mini elebana wai biaga pira halira (80) hearubi uruninaga hongoni hana howa bialu hene. 5 Ani manda bialu Yudia dindiha anda ibuwa Bedesua tanoha wai bialu hene. Bedesua tano ogoni wai pabe hongoheore egeme bu mabubi emene kaundia dege Yarusaleme tanonaga abene unurayagi winigo ogoriani wai bialu hene. 6 Ai Lisiasahanda Yuda dindiha anda ibalu tano hongohe wiaru ho hagira bida layago hale howa Yudasa Magabeusu halu ibunaga ami agali bu hearubi Yuda wali agalibi tigua dugu timbuni bialu Anduane Homogohondo ti biamogo bule dahuliyali mbira ibila lowa bi lalu hene. 7 Ani lalu Magabeusu ibuni wai biagane ale wiaru mo yai halu wai bamba halu pene. Ibugua agali maru hearuhondo, Tí hamene baruago biamogo bialu wai bule maibidaba, lalu olene. Ani laya handala bibahende heyalu piai hene. Tini homolenehayagi mo embeda halu pene. 8 Tigua Yarusaleme tano kaware anda ibalu howa handalu hemiria agali mbira nogo hosini biralu gerai lalu bamba halu piyaria de hendene. Agali ogoni ibu aga pele karulalu wai biagane ale bibahende ngolome wabini hangu mo karulalu biaria de hendene. 9 Yuda ami agali bibahendeme de hondowa ti bibahendeme Ngode Datagaliwabehanda ti dara halu biamogo biyagonaga tigua ibunaga mini yaraga halu ibuhondo ka̱i̱ lene. Ani biyagola ibugua tinaga miniha mo hongo hai hene. Anidagua biyagome tinaga hongo gibiore ho howa waitigi ami agali baba wai bulene hongo karulape halu nogo tara gabua karu baba wai karulape bialu tigua tanoha wai pabe panga hongohe aeaneme bengena howa payatagi karu bo gialalu anda polene hongo karulape hene. 10 Ai tigua tidi yalu duguniore agali nogo hosini biralu bamba halu piyago erembiraha pene. Ngode Datagaliwabehanda ti dara halu agali ogoni ti hearia ibilenego ti haru pene. 11 Ani pialu tigua wai taraore budiale gabua timbuni lainonome hongo hagadagua howa agalini pogolo paga halu balu bo budabaga bialu mo ko howaore balu waitigi ami agali daosini dege pira mbirani mbira (11,000) bibahende bai halu ami agali nogo hosini biruwa wai biaga daosini mbirani handari waragaria (1,600) bibahende bo wahai halu ami agali maru bo taliatogo lai hene. 12 Ami agali dewaore timu hai hayagola tinaga danda timu yu wahalu ibida piai hene. Anigo Lisiasa ibuni homolenenaga gi halu ibida piyagome ibuni nahomene.
Lisiasahanda Yuda baba gi tigani binigo ogo
13 Lisiasa ibu ibida penedagoni ibu lulu howa ndo agalime ogoale bule lo manda bialu ibida pene. Ibugua wai bialu wayali habe nahe wiyago mitangi bialubi ibugua Hiburu hameigini uruni bope habe nahe kago manda bialubi ibida pene. Yuda tinaga Ngode Datagaliwabe hongohe gibiore kagome ti baya hangu handaya ho kago manda buwa ainde ibugua Yuda wali agali baba wai palima lalu bi lo mbira hole manda bini. 14 Ibugua Yuda wali agali baba bayale hole lowa bi bayale dewa lo wialu ibunaga kini kagomebi Yuda wali agali baba nenege holene karulape lelonaga ibugua baya hangu kini bime ladebodebo bialu haabo hene. 15 Magabeusu ibuguabi nde wali agali bayale helo biamogo bulene hamelo howa ibugua Lisiasahanda wai palima lalu bi layadagoni turu ho hene. Ani bialu Kini ibuguabi nde Magabeusuhanda wai palialu nenege hama lalu bi Lisiasa hearia gilibu pelenedago de hondowa karulapego ani bimi̱ya lalu tigua bi lo pelayadaru bibahende karulape lai hene.
16 Lisiasahanda beba gili bialu Yuda wali agalinaga bi lo pelenedagoni ogo
Lisiasahanda Yuda wali agalihondo horombeore lara. 17 Agali kirali tínaga bi i̱ hewaria lo yalu pudaba lene Yonela Abasalomola libugua beba gilibu wia harimiyago yalu ibiya. Tígua bi bebani gilibu ibilarimigo í̠na e̱ labe lalu bi lo wia harimiya. 18 Ani larimiyago hondowa bi tígua hale harimiyaruni bibahende kinihondo miai haru. Ani bialu mbirale i̱hondo hale harimiyaruni i̱na karulape lai haru. 19 Ainde tígua gabumane kago baba mini mo mbiraore ho harimiyagua nde i̱nabi mbirale tí biamogo bulene i̱naga hongo tahe ngago bialu holebero. 20 I̱na agali tínaga bi lahaga karubi agali i̱naga bi lahaga bu karubi tigua bi ogoni baya hangu dabo handalu lo tiga bidaba lalu lamiai haru. 21 Ai hondo halimu laro. I̱na beba ogo mali handari mbira pira mariani halira (148) kagola ege mini Diosogorindiusunaga horo pira kirani maria (24) layagola gili bero, lalu lo wia hene.
Kinihanda Lisiasa hearia beba gili bialu bi lo pelenego ogo
22 Kinihanda beba bo pelalu lalu,
Kini Andiogusuhanda ibu hamene Lisiasahondo, Í̠ bayale kebe, lalu mo bi la hara. 23 I̱ aba ibu piyago ayu ogoni mbirale bi pupu wiaga dama karu baba mandagi beda. Ainde ayu wali agali ina daluha bu karu bibahende bayale dege hai howa tini daluha biabe bulene ngaru tini handaya howa bialu haga haga bilo hame ledo. 24 Yuda wali agali tigua i̱ abahanda bilo hame layadagua i̱na Girigi dindinaga mana ngago taluwa bule hame nale tinaga mamali mana ngago bialu haabo holene hamelo ko. Ani howa tigua i̱hondo hale halu ti anidagua bulene hamelo kemago i̱na karulape labe laya. 25 Ani hale hayago ainde wali agali uruni ti gi nahe hendore dege wali agali hameigini tara tara dindi iname haru howa handayaho hene ngagoha karudagua dege helo hame ledo. Ti Anduane Homogonaga anda mo tiga bilo i̱na karulape lalu tinaga mamali mana bialu haga ngadagua bialu helobi i̱na karulape laru. 26 Aiore í̠na i̱naga bi ogoni tihondo lamialu ogodagua labe. Ina tí baba nenegeore hole hame ledema. Ani kemago tiha mogolalu miniha gi ho holene nawi. Tí hadapeho howa tíninaga biabe bulene ngago bialu holene nga, lalu kini ibugua bebani gilibu wia hene.
Kini ibugua beba gili bialu Yuda dindiha pelenego ogo
Kini Andiogusuhanda gabumane Yudiaha kagobi wali agalibi bibahendehondo bayale kemida lara. 28 Bibahende ale tí daluha ngaru bayale dege ngelo hamelo ko. I̱nibi nde bayale dege ko. 29 Menelausu ibugua i̱hondo langialu ogodagua laya. Tí tíni daluha dai bialu tínaga dindi andaru mbiraleru mo tiga bima polene hamelo kemi, laya. Anidagua bulene bayale. Tíni daluha dai biai halu tínaga dindi andaru mbirale wiyadaru mo tiga bima polene nga. 30 Bayalego wali agali bibahende ege ayu mini Sandigusu kagonaga horo pira tebira (30) naledaore dege tini dalu dai biai holene nga.*Mini Sandigusu ledagoni Girigi tinaga ege mende tebonela hengeneha (Pebuari Masi) tagira ibaga nga. Ai ege ogoni dege mini mende Diosogorindiusu laga wini. Tigua mbirale mbira gi holene nawiore. 31 Ani bialu tomo Yuda wali agalime nolene nawi lene ngago bibahende nane halimu. Mbirale Yuda tíni aria karu aria mbirame mana ogoni pugualu hene wiagua nde ayu howa ogoni ibu godi deni holene nawi. 32 Ayu i̱na Menelausu ibugua tínaga miniha mo palia holene karulo halimulonaga bi lelo ibu tí kemiria pu laro. 33 Hondo halimu laro. I̱na beba ogo mali handari mbirani pira mariani halira (148) ogonaga ege mini Sandigusu kagonaga horo pira mbirani duria (15) howa beba ogo gilibu wia haro, lene.
Lomoalime Yudaha beba gilibu pelenego ogo
34 Lomoali tiguabi nde Yuda dindiha beba mbira gilibu pela dege bini. Beba ogoniha bi ogodagua lalu gilibu wini.
Kuindiusu Memiusula Taidusu Maniusula libu Lomo wali agalinaga bi lagane howa libugua tíhondo bi lo wia hara. 35 Ai i̱namebi nde kininaga hanini Lisiasahanda bi layago karulape ledema. 36 Tígua bi uruni baya hangu mo tale bilimulo hame ledema. Ani bialu tígua mbirale kini ibugua hangu bulene ngago ogo lalu Lisiasahanda tíhondo layago baya hangu mo tale bilimu. Agali mbira tínaga bi la hagane ina baba bi lo tiga buluma̱ya abale ina kemaria ibilalimu. Ina Andiogo tanoha ibaga bialu polene kaware ngago abale ibilalimu. 37 Ainde tínaga mini ogobi wua harua lalu ina manda bu holoma̱ya nde tígua agali mbira mani ibilalimu. 38 Ai hondo halimu laro. Iname beba ogo mali handari mbira pira mariani halira (148) ogonaga ege mini Sandigusu kagonaga horo pira mbirani duria (15) layagola gilibu wia harama, lene.
<- 2 MAGABI 102 MAGABI 12 ->
aMini Sandigusu ledagoni Girigi tinaga ege mende tebonela hengeneha (Pebuari Masi) tagira ibaga nga. Ai ege ogoni dege mini mende Diosogorindiusu laga wini.
