1-2 Í̠na mbira bibelo hame ledogo ala langero. Iname wali agali bibahende karubi kini karubi gabumane bibahende karubi mitangi bialu Ngode Datagaliwabehondo bi lolene nga. Iname Ngode Datagaliwabehondo mitangi bulene ngadagua mitangi bialu mana tigabi bialu howa karulape holenebi mo palia holenebi yu holoma̱ya Ngode Datagaliwabehondo, Biamogo bia, lolenebi, Ngi, lolenebi, Ka̱i̱, lolenebi nga.✡Yar 29.7, Ese 6.10, Lm 13.1, Eb 6.18, Pb 4.6 3 Bi bayale lolene ogonibime inanaga Pele Ngiaga Ngode Datagaliwabe mo turu haga. 4 Ibugua wali agali bibahende pele mulene yu helobi mana henene ngago manda bu helobi hamelo ka.✡Ese 18.23, Yo 3.16-17, 17.3, 1 Ti 4.10, 2 Ti 2.25, 2 Pi 3.9 5 Ngode Datagaliwabe mbiraore hangu ka. Agali mbiraore Keriso Yasu kago ibu degeme dombegua howa Ngode Datagaliwabebi wali agalibi mo mbiraore haga ka.✡Lm 3.29-30, Ga 3.20, Hi 8.6, 9.15, 12.24 6 Keriso Yasuhanda wali agali bibahende haru dai biai hole horo pongo bo winigongiore ibugua ibuninaga holene pelene. Ogoningi Ngode Datagaliwabehanda wali agali bibahendeore pele mule hame lowa walia hoa ho winigobiore walia hene.✡Md 20.28, 1 Ko 1.6, Ga 1.4, Eb 1.7-9, 2 Te 1.10, Ta 1.3 7 Irane ogoninaga Ngode Datagaliwabehanda i̱ abosolo biabe buliya dabo helaya. Yuali ndo wali agali tara tara karuhondo henene lolene manabi Ngode Datagaliwabehondo mini mbiraore wulene manabi lawai haga holiya Ngode Datagaliwabehanda i̱ dabo heleayago ko. Bi o larogo tindule ndo heneneore larogoni.✡Ab 9.15, Ga 1.16, 2.7-8, Eb 3.7-8, 2 Ti 1.11

8 Keriso hameigini dindi bibahendeni karume Ngode Datagaliwabehondo bi laabo helo hamelo ko. Agali urunime tini Ngode Datagaliwabehondo loma bia hene howa keba holenebi lai lolenebi mbira miniha do nahe howa Ngode Datagaliwabehondo bi lalu holene nga.✡Ais 1.15, Mal 1.11, Yo 4.21

9 Ai bi mende ogo laro. Walime mine nahe howa agabi mbirale dongoneni karuledaru bayuwa karulolene nga. Mandari yáribi tingini yáribi mbirale ngolome wabini ngarubi pealobi aga yolo timbunime minirubi bulene nawi.✡1 Pi 3.3-5 10 Wali Ngode Datagaliwabenaga bi mana yu tiga biaga bedarume biabe bayale bulene nga.✡1 Ti 5.10 11 Walime mine nahe biruwa bi nale Ngode Datagaliwabe bi mana hale halu yu tiga bulene nga. 12-13 I̱na bi mbira larogo ogo. Ngode Datagaliwabehanda ala Adama wabuwa mani Iba wabini. Walime agali lawai helobi haru helobi helolene nawi. Walime bi naleore birulene nga.✡1 Ko 14.34✡Pig 2.7, 2.21-22, 1 Ko 11.8-9 14 Dama Heyolabeme Adama mo hondo nahe Iba ala mo hondo hayagola Ngode Datagaliwabe mana lowinigo wali biago ibugua puguai hene.✡Pig 3.1-6, 2 Ko 11.3 15 Ani binigo manda buwa walime waneigini taba hanalu biruwa Ngode Datagaliwabehondo mini mbiraore wu biruwabi gubalini ho biruwabi mini tigabi wu biruwabi mine nahe bialu birayagua Ngode Datagaliwabehanda ibu pele mulebira.