1 Andiogusu Kini Demidiriasa igini mbira ibu dindi mbira iba solowara dombeneha dindi mini Kiridi laga wiagoha hene. Ai agali Andiogusu ibugua beba mbira gili buwa loma binigo mo miaga agali haguane timbunibi Yuda wali agalinaga agali haguanebi wali agali ibugua handaya ho haga bu karunaga agali haguanebi Saimono heagohondo beba gilibu peleneya.

2 Ibugua bi ogodagua lalu gili bini. Kini Andiogusuhanda Anduane Homogonaga loma binigo mo miaga agali haguane timbuni Saimono halu Yudia wali agalibi tíhondo bayale kemibe larama. 3 Agali ko hearume i̱ abanaga dindi ti karulai henego ai ayu i̱nime hongo halu lone mo yu dai buwa mo hongo halu abale bayale wiagagobi ngelo biabe bialu ko. Ami agali tagira howa dewaore i̱ biamogo bialu wai bilonaga yolo bialu haru halu íbu heledo. Ani bialu iba sibi dewa timbuniru mo manda manda bu wiai ko. 4 Iba sibi uruni yalu dindi mendehayagi puwa waitigi dewa i̱naga tanorubi dindi andaru bo labu hai halu mo ko haga biaru baba wai bulebero.

5 Ayu i̱nabi nde dagisi dewa tígua ngiaga wirimigo abale i̱ aba ibugua biyadagua mo wahai halu tígua yolo maru i̱ ngulene ngemigobi bibahende mo wahai haro. 6 Tí daluha munime biabe bulene ngago damene tínime bialu holene karulapego muni tíni taya bialu biabe tínime bialu holene nga laro. 7 Yarusalemehabi Anduane Homogonaga andahabi dagisi muni miaga wirugo yupe halu ayu waharogoni. Wai biaganeale wabu wu kemiru bibahendebi tano wai pabe hongohe bu mabubi ngemirubi uruni bibahende tíninaga giha ya harogoni. 8 Tígua kininaga muni andaha muni dano hole mo yiniyaguabi dano mani holenenagabi bibahende maniorebi ani wiaabo helonaga ayu mo waharogoni. 9 Mani i̱naga dindi ngago bibahende handameho howa haru kongi i̱na í̠naga mini yaraga howa mo daligaho helalu í̠naga wali agalibi Anduane Homogonaga andabi bibahende mini mo yaraga hai holebero. Anidagua beregola wali agali dindi bibahendeha karume tínaga mini mo yaraga hene mini leneore kemigo hondolebira, lene.

10 Mali handari mbira pira kariani maria (174) hayagola Andiogusu ibu dindi ibu aba mamalirunaga winiore wiagoria birule dai bini. Ami agali dewaore ibalu ibuha hatago hayagola Tiribo baba emene daga lene dege mbira hene. 11 Andiogusuhanda Tiribo baba wai biyagola Tiribo ibu ibida pialu iba solowara timbuni bereago angeha Doro tano wiagoha hado hene. 12 Tiribo ibugua manda bu handalu hearia ibunaga ami agali heneru dewaore piai hayagome ibugua wai bibe nahe ibu minalu boleneore wiayuane handalu ibu pora bialu pene. 13 Ani piyagola Andiogusu ibunaga ami agali wai biaga mugube pari wayaliru daosini handari mbirani pira kira (120,000) ami agali geni pialu wai biagabi daosini halira (8,000) nogo hosini biruwa wai biaga hearubi haru halu puwa Doro tano wiagoria wai bini. 14 Ibunaga iba sibi wiarume iba solowarani wai bialu heagola anidagua biyagome Andiogusuhanda Doro tano ho hagirabu yaanda hai hene. Ani bialu ibunaga ami agali hearume dindinibi solowaranibi wai biai hene. Ani bialu howa tano ogoniha mbiraoreli hangubi uba andatagi nabuleore lalu mamage baya hangu hai hene.

15 Horo ogoningi dege Numeniusu halu ibu baba haga hearume beba mbira gili buwa Lomo dindi wahalu dindi maruha kini hearunagabi dindi bibahendenagabi ta halu yu pugupugu bini. Beba ogoniha bi ogodagua lene.[a]

16 Lomonaga agali haguane Lusiusuhanda Kini Tolemihondo, Í̠ bayale kebe, lara. 17 Ani bialu Anduane Homogonaga loma binigo mo miaga agali haguane timbuni Saimono halu Yuda wali agalime habo nalolene bi ala lo wirimago lone mo hongo howa ina nenege haabo halu mandagi howa ina hamene dege lo holenaga habo nalolene bi ala lo wirimago lone mo hongo hama lalu bi yalu agali kirali ibiniya. 18 Libugua wai humbi mbira ngolome wabini genda magi kilogarama handari duria (500) inanaga wabu wia heneyago yalu ibiya. 19 Iname bi lo mbira halu Yuda dindi mo ko halu bo labu haga kinibi agali haguane bu karubi bibahendehondo beba ogo gili bialu piai helarama. 20 Tigua wai humbi wabu yalu ibiyagobi ina yamulene karulapego yamima larima. 21 Agali ko maru ibida pora bialu tí kemigoha ibiyagua nde tígua minalu Anduane Homogonaga loma binigo mo miaga agali haguane timbuni Saimono giha minu ya halimu. Ibunime howa agali ogonialego ti Yuda maname biaga winidagoale bilo minu milimu, lene.

22 Lusiusu ibugua bi ogoni dege gili bialu Kini Demidiriasahondobi Kini Adalusuhondobi Kini Ariadesehondobi Kini Asagesehondobi pelaga bini. 23 Bi ogoni dege gili bialu dindi maru Samasamesehabi Sabarada dindihabi Deloso dindihabi Mindoso dindihabi Sisiono dindihabi Karia dindihabi Samoso dindihabi Pambilia dindihabi Lisia dindihabi Haliganasusu dindihabi Lodese dindihabi Paselisi dindihabi Koso dindihabi Side dindihabi Aradusu dindihabi Godina dindihabi Nidusu dindihabi Saibarasa dindihabi Sairini dindihabi bibahendeoreha pelaiore hene. 24 Ani bialu beba mbira loma binigo mo miaga agali haguane timbuni Saimono hearia pelalu bini.

25 Kini Andiogusu ibugua Doro tanoha wai halu mende bini. Ibugua ami agali dewaore haru howa wai biagane masini dewa wabu wialu buwa tano ogoniore bo gialanda hole lowa bu hondo wahalu hene. Ibugua tano ho hagira biai ho heagola Tiribo tagira pobe naheore wini. 26 Ani bialu heagola Saimono ibugua Andiogusu biamogo bialu ami agali ibunagaore haga heneru daosini kira (2,000) mialu muni silibabi ngolobi dewaore talebu mialu wai biaganeale danda timu yandare ayu tibu wai humbibi dewaore tale bu mialu bini. 27 Ani biyagola Andiogusu ibugua mbirale uruni yamia nabi wahalu habo nalolene bi ala lo wiyago mo habo lalu bini. Ani bialu libu mo waitigi hene. 28 Andiogusu ibugua agali ibunaga nenege mbira mini Adenobiusu heago Saimonola bi lole pu lene. Ani laya handala ibugua puwa lalu, Ayu í̠na Yoba tanobi Gese tanobi wai pabe anda hongohe Yarusalemebi handaya ho kegoni. Ai tano uruni bibahende i̱ daluha dege wiai ka. 29 Í̠na dindi uruni mo ko hai harigoni. I̱naga dindiha mo ko halu genda holene dewa mo yu anda ibiri. I̱naga dindi wiaru dewa í̠ karulo ke. 30 Ai ayu í̠na i̱naga tano timbuni wiwaru í̠ karulariruni bibahende i̱ni ngiadai bibe laro. Ani bialu tano Yudia be tagirahayagi wini í̠ karulo kegonaga dagisi muni ngibe. 31 Anidagua nabuleyagua nde í̠na muni siliba genda magi kilogarama daosini nguira (15,000) tano uruni yolo ngialu muni ogonidagua dege halu mende dagisi mitangi bialubi mbirale mo ko hai haridagonagabi ngibe laro. Anidagua nabiriyagua nde wai bibiya laro, lalu bi lama pudaba lene.

32 Ani laya handala Adenobiusu ibu pialu Yarusaleme anda puwa ibugua Saimono yari biarubi ibunaga beledi ngolome wabinibi silibame wabinibi ibunaga tebolo dagiani wiaru handalu mana Saimonohanda biaga wiarubi handa dege bialu ibu mogo lo hendene. Ani hondowa ibugua Kini Andiogusunaga bi layago Saimono lamini. 33 Ani layagola Saimonohanda ladai bialu lalu, Iname dindibi mbirale tara tara ngarualebi dindi mendenaga mo page nabiore henego kemagoni ndobe. Bamba inanaga mamali giha yu haga winiru dege inane mo yu dai bigi bini wu kema. Mbirale uruni waitigime bamba mo pagebu yu pugu binigo yu dai bigi binigo ngema. 34 Mbirale ina mamalinaga mo page bini uruni mo yu dai bulene hariga ayu dege handarima. 35 Í̠na Yoba tano Gese tanola hale haribe. Tano kira ogoni laboha karume inanaga wali agali kagoha genda tara tara mo mialu inanaga dindi ngagobi mo ko haabo haga ka ndobe. Anidagua biagago ainde harugo tano kira ogonilabo yolo bialu muni siliba genda magi kilogarama daosini tebira (3,000) hangu nguliya, lene.

Ani layagola Adenobiusuhanda bi mbira ladai nabini. 36 Ibugua miniha tandaga timbuni halu kini hearia dai bini. Dai buwa ibugua kinihondo Saimonohanda bi layago lamiai halu Saimononaga yari biaria handayagobi andagaha wiarubi lamiai hene. Kini ibugua bi ogoni hale howa ibuguabi keba timbuni hene.

37 Horo ogoningi dege Tiribo ibu ohalu ibida iba sibi piyagoha pora bialu Odosia tano wiagoha pale pene. 38 Kini ibugua agali Sendebeusu heagohondo ami agali geni pialu wai biaga dewabi maru nogo hosini biruwa wai biaga hearubi talebu mialu dindi iba solowara bedagoha ngarunaga gabumane haguane hole pu lene. 39 Ani lowa Sendebeusuhondo Yuda wali agali baba wai bibe lene. Ani bialu Kederono tano baya hangu arema bialu wai pabe pangaru baya hangu hongohe wabu helalu bibe lene. Wai bulenaga manda buwa ani lene. Ani lalu kini ibunime Tiribo talima pene.

40 Sendebeusu ibugua pialu Yabane tano wiagoria anda puwa anda bu hearu bo gialapaya bialu mbirale wiaru mo ko howa bo labu halu hene. Ani bialu Yudia dindiha anda puwa wali agali dewa minu garabaya bialu bo wahai halu hene. 41 Ani bialu ibugua Kederono tano mo hongo howa lone arema bialu ibugua ami agali geni piagabi nogo hosini piagabi dewa tano ogoniha howa Yudiaha hariga pedagoha mamage puíbu bialu helonaga ani helene. Ibugua kini kagome bibe lalu lamiyadagua talialu ani bialu hene.

<- 1 MAGABI 141 MAGABI 16 ->