Sesuupuek 12

Fefin ma Sii

1 Tintof bakir e puek ulo balambat: Nenge fefin e afaf ine pisii, ma funiil ulo pikliu e kekow ma tikii sangful ma e u na angkeltot e ta ulo paklu are at kwin. 2 I e tian ma e tau bakir sak anwarow, i e ongker, fatfatat lo ma ku fasus.

3 Ming, neng e tintof e puek ulo balambat: Sii bakir e buuluum e fow, e mel e baba fis na paklu, ma tikii sangful na kom ulo, tura baba fis na at king ulo paklu. 4 Angku e saifufu e tikii galu lo tuul galung keltot tinglo batsok ka baspu iri ulo nal. Sii gii, e titi u famu ini e fefin a, se e fatfatat una fasus, usi ini eu eni e sikow biing eu fuut.

5 Fefin a e fasus ini e boron tamat, i “eu efe lo tongge nano ilo nal tura tungkan ri gow lo aen.”[a] Ma boroner kia, Deo ka kep kanek ini wiyat usi ma sia king kia. 6 Fefin a, e fin ka la ulo male biil, male Deo e sau fagatiufu tifi. Wa, riu efe lo ine tuan, lo tikii mar ma e u e atis ma e on e sangful na biing.

7 Wimi, ka mel e fapaket bakir ulo balambat. Maikel ma fan anggelo kia, ri fapaket tura sii bakir a. Ma sii bakir tura fan anggelo kia, ri fapaket tura ri. 8 Safle ri tibi fasi una kulef ri, iya, ka tek ti salu ri ulo balambat. 9 Sii bakir a, ri baspu ini — i e ta sii ting nangen, ri fotngi ini Satan, kaltu na berbero, se e tatatfe re tongge nano gii lo nal, ulo fan galgalun sal e sak — ri baspu ini ulo nal tiim tura fan anggelo kia.

10 Ma ming ya ongni e angkiimkiim e tau bakir tikin ulo balambat aregii,

“Gii, e sau puek e amfaliunge kiar tura rawas ma kepmale ke Deo kiar,

ma rawas ma mia e Mesaiya kia.

Anwarow kaltu na berbero ire fan tualikrer,

ri sau baspu ini gii lo nal.

I e ta kaltu gii ka tataufre fan tualikrer ilo anganggon famu ini e Deo kiar lo fan siat ma lo fam panambiing.

11 Tanga tualikrer, ri kulfi e kaltu gii Satan, tikin lo andadak lo Sikuan Sipsip

ma lo sunwar ri sesuupuek ini lo Yesus;

ri tibi sangfi e ninliu keri, biing ri ta ulo fan mafet, iya ri ka tibi sokeni e minet.

12 Iya balambat, fefeal,

ma gau ming a ka melmel ilo, gau fefeal!

Safle kiskam singe nal ma balang kasap,

anwarow kaltu na berbero e sau pu usi o!

I e balasak tikin anwarow e parfat tikin ini biing kia, e pospos.”

13 Biing sii bakir a, e pari ini iri sau baspu ini, i e fesi e fefin a, se e fasus ini e boron tamat. 14 Ri tau tife fefin a, um papa-u e ngo are manlam, usi ini eu of ku la ulo male ri sau fagatiufu tifi, ulo male e tek ti kaltu ilo. Wa, riu efe lo, lo biing, fam biing ma pansumbiing. 15 Ulo ngusu e sii bakir a, e kuekuf ine dan. Dan gii, e puek ka la ta dan bakir sak, ka usi e fefin a, usi ini dan e fasi una kepe ku la. 16 Safle nal e ulsi e fefin a, e ipki e ngusu ma ka kemi e dan gii, sii bakir a e kuekuf ini tinglo ngusu. 17 Iya, sii bakir a e balasak ini ma kala una la fapaket tura fanenger fan siksikow, seri a, ri ka ususi e fam fafanau ke Deo ma ri puse patpat lo fan warwar ke Yesus. 18 Sii bakir a, e ti ulo balang kiin lo kasap.

<- Sesuupuek 11 Sesuupuek 13 ->