1 Biing Sabat e rop, Maria Makdalen, Salome ma Maria tinow e Jeims ri tuul la fifiil fan wel e mel a konona sanuu una la mofo e fow e Yesus. 2 Biingbiing e mok sak lo biing baba tikii lo wik, wimi sekit ine pisii e fen, ri tuul fes una la ulo balang kenit. 3 Ma ri tuul ka bou fagatomnge iri, “Se eu filiitufu e fat kosngi e matangkon wilo balang kenit?”

4 Sakle biing ri akte matri, ri pari ini fumfat bakir sak ri sau filiitufu. 5 Biing ri kaulek ulo balang kenit, ri pari e guam e los lo kolos murmur tapak e kiiskiis ulo galu miil, ri ka kuufsak.

6 I ka war singri tuul, “Gam u tibi kuufsak. Kemi sik ine Yesus tingna Nasaret lewa ri ka paketmet ini, e sau matet. Par wagii, e tam ini tinglo tafu. 7 Sakle gam tuul u la peteng tifre fan disaipel ma Pita, ini i e la famu i gam ina Galili. Gam u la pari wa, aregii i kabuk peteng tif gam.”

8 Ri banban ma ri sangkut, gelefin a, ri la kosngi e balang kenit. Ri tibi war singe tikas, anwarow ri soke.

9 Yesus e matet lo biing baba tikii lo wik, e puek famu talo Maria Makdalen. Lewa ka feselufu e baba fis na tangwaner saksak tinglo. 10 I e la, ka la peteng fate re tongge, ri sau fesfes tiim tura Yesus. Tongge gii ri melmel tura sangkuuluung ma fatengis. 11 Biing ri ong ini Yesus e sam liu mil, ma ini i e sau pari, ri tibi titinge lo.

12 Wimi Yesus e puek ine neng e puek talo uneng lo ri, biing ru fes lala una la suu tingna Jerusalem. 13 Ru mil ru ka la sesngeni tifre fa lo ri, sakle ri tibi su la titinge lo sekit ming.

14 Wimi Yesus e puek talo tikii sangful ma e tikii na disaipel kia, biing ri enen. I e porau ri usi re tibi titinge, ma balbalri e kut una ong singre fa gii, ri kabuk pari ini e sau matet.

15 I e war singri, “La ilo mara male gii lo nal ma sesngeni e konona sunwar tifre mara tongge. 16 Se a ka titinge, ma ka kepe amfagu tarawen, eu mel e ninliu. Sakle se a ka tibi titinge, Deo eu fakutun aiya. 17 Deo e gow e mara mok na tibou fuut lo limre tongge ri titinge lo. Ma lo asang, riu feselufu e fan tangwaner saksak, ma riu gon tinglo fan warwar fuu kuriik. 18 Riu kepe fan sii ini e limlim ri, ma biing ri inmi e dan saksak sekit, eu tibi bero iri sekit; riu tow e limlim ri ilo tongge ri mase, riu liu.”

19 Wimi ine Taufi Yesus e sam gongon singri, Deo e kep kanek ini wilo balambat, ka kiis ulo galu miil lo Deo. 20 Wimi fan disaipel ri ka la, ma sesngeni e sunwar ulo mara male, Taufi e faim tura ri ma ka farawasngeni e ke sunwar ine fan tintof e fuut tiim tura.

<- Mak 15